ទំនាក់ទំនងរវាងវៀតណាម និងសហព័ន្ធរុស្ស៊ី បន្តប្រពៃណីទំនាក់ទំនងល្អប្រសើរ

វាយតំលៃលើការអភិវឌ្ឍទំនាក់ទំនងវៀតណាម-រុស្ស៊ី ក្នុងរយៈពេលជាងពីរទសវត្សរ៍កន្លងមក ចាប់តាំងពីប្រទេសទាំងពីរបានបង្កើតទំនាក់ទំនងភាពជាដៃគូយុទ្ធសាស្ត្រមក លោកឯកអគ្គរដ្ឋទូត Dang Minh Khoi បានអះអាងថា ទំនាក់ទំនងទ្វេភាគីនាពេលនេះទទួលមរតកពីទំនាក់ទំនងមិត្តភាពពិសេសរវាងវៀតណាម និងអតីតសហភាពសូវៀត។ ក្រោយការផ្អាកមួយរយៈនៅដើមទសវត្សរ៍ឆ្នាំ១៩៩០ ដោយការប្តេជ្ញាចិត្ត និងការខិតខំប្រឹងប្រែងរបស់ថ្នាក់ដឹកនាំ និងប្រជាជននៃប្រទេសទាំងពីរ ទំនាក់ទំនងវៀតណាម-រុស្ស៊ី បានរីកចម្រើនយ៉ាងរឹងមាំ សក្តិសមក្នុងការបន្តប្រពៃណីទំនាក់ទំនងល្អរវាងប្រជាជនទាំងពីរ។ ប្រទេសទាំងពីរបានបង្កើតភាពជាដៃគូយុទ្ធសាស្ត្រក្នុងឆ្នាំ ២០០១ និងភាពជាដៃគូយុទ្ធសាស្ត្រលើគ្រប់ជ្រុងជ្រោយក្នុងឆ្នាំ ២០១២។ ក្រឡេកមើលទៅក្រោយរយៈពេល ២ ទសវត្សរ៍កន្លងមក ប្រទេសទាំងពីរអាចមានមោទនភាពចំពោះសមិទ្ធផលដែលពួកគេសម្រេចបានក្នុងទំនាក់ទំនងដែលកំពុងរីកចម្រើនកាន់តែទូលំទូលាយ ទាំងទទឹង និងជម្រៅ។

ទំនាក់ទំនងនយោបាយមានភាពជឿជាក់ខ្ពស់ តាមរយៈទម្រង់ និងយន្តការចម្រុះនៃកិច្ចសហប្រតិបត្តិការនយោបាយ ដូចជាការផ្លាស់ប្តូរគណៈប្រតិភូជាទៀងទាត់គ្រប់លំដាប់ថ្នាក់ ជាពិសេសថ្នាក់ខ្ពស់ ជួយមេដឹកនាំនៃប្រទេសទាំងពីរផ្លាស់ប្តូរព័ត៌មាន និងដឹកនាំការអភិវឌ្ឍន៍ទំនាក់ទំនងទ្វេភាគីភ្លាមៗ។ ភាគីទាំងពីរបានបង្កើត និងអនុវត្តប្រកបដោយប្រសិទ្ធភាពនូវយន្តការជាច្រើន ដូចជាកិច្ចប្រជុំគណៈកម្មាធិការអន្តររដ្ឋាភិបាល ការពិគ្រោះយុទ្ធសាស្ត្រ និងការពិគ្រោះយោបល់នយោបាយប្រចាំឆ្នាំ រួមចំណែកបង្កើនការយល់ដឹង និងការជឿទុកចិត្តគ្នាទៅវិញទៅមក បង្កើតមូលដ្ឋានសម្រាប់ជំរុញកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ។ វៀតណាម និងរុស្ស៊ីតែងតែគាំទ្រ និងសហការយ៉ាងជិតស្និទ្ធក្នុងអង្គការអន្តរជាតិ និងតំបន់ ដូចជាអង្គការសហប្រជាជាតិ សមាគមប្រជាជាតិអាស៊ីអាគ្នេយ៍ (អាស៊ាន) វេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) វេទិកាតំបន់អាស៊ាន (ARF) ...

លោក Dang Minh Khoi ឯកអគ្គរដ្ឋទូតវៀតណាមប្រចាំនៅសហព័ន្ធរុស្ស៊ី

កិច្ចសហប្រតិបត្តិការសេដ្ឋកិច្ច និងពាណិជ្ជកម្ម មានការរីកចម្រើនជាវិជ្ជមាន ជាមួយនឹងរយៈពេលដែលចំណូលទ្វេភាគីកើនឡើងពី ១០-១៥% ក្នុងមួយឆ្នាំ ដែលជាលទ្ធផលនៃការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងវៀតណាម និងសហភាពសេដ្ឋកិច្ចអាស៊ី-អឺរ៉ុប (EAEU)។ ទោះបីជាត្រូវបានរងផលប៉ះពាល់ដោយស្ថានភាពអស្ថិភាពនៅលើពិភពលោក និងក្នុងតំបន់ក៏ដោយ ក៏ទំហំពាណិជ្ជកម្មនៅឆ្នាំ ២០២៣ នៅតែឈានដល់ជាង ៣.៦ ពាន់លានដុល្លារអាមេរិក។ ទាក់ទងនឹងការវិនិយោគ រុស្ស៊ីមានគម្រោងជិត ២០០ នៅវៀតណាម ដោយមានទុនសរុបជិត ១ ពាន់លានដុល្លារ។

ការវិនិយោគរបស់វៀតណាមនៅរុស្ស៊ី បានកើនឡើងយ៉ាងខ្លាំងពីប្រហែល ១០០ លានដុល្លារអាមេរិកនៅដើមទសវត្សរ៍ឆ្នាំ ២០០០ ដល់ ៣ ពាន់លានដុល្លារក្នុងឆ្នាំ ២០២៣។ ការគូសបញ្ជាក់ដ៏សំខាន់ក្នុងកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរគឺការអភិវឌ្ឍខ្លាំងក្នុងវិស័យថាមពល ប្រេង និងឧស្ម័ន។ ភាគីទាំងពីរបានសហការគ្នាយ៉ាងល្អ និងប្រកបដោយប្រសិទ្ធភាពក្នុងការរុករក និងរុករកប្រេង និងឧស្ម័ន មិនត្រឹមតែនៅលើតំបន់ខ្ពង់រាបបាតសមុទ្រវៀតណាមប៉ុណ្ណោះទេ ថែមទាំងនៅលើទឹកដីនៃសហព័ន្ធរុស្ស៊ីជាមួយនឹងគម្រោងធំៗទៀតផង។ ក្រៅពីក្រុមហ៊ុនបណ្តាក់ទុនរួម Vietsovpetro ដែលជាក្រុមហ៊ុនឈានមុខគេក្នុងកិច្ចសហប្រតិបត្តិការលើវិស័យប្រេង និងឧស្ម័ន ភាគីទាំងពីរក៏មានក្រុមហ៊ុនបណ្តាក់ទុនរួមគ្នាផ្សេងៗទៀតដែលកំពុងដំណើរការយ៉ាងសកម្មនៅក្នុងប្រទេសទាំងពីរ។

ទាក់ទិននឹងសារៈសំខាន់នៃដំណើរទស្សនកិច្ចរបស់លោកប្រធានាធិបតី Vladimir Putin  ដើម្បីសម្រេចបាននូវសេចក្តីថ្លែងការណ៍រួមស្តីពីចក្ខុវិស័យនៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីររហូតដល់ឆ្នាំ ២០៣០ លោកឯកអគ្គរដ្ឋទូត Dang Minh Khoi បានឲ្យដឹងថា ព្រឹត្តិការណ៍នេះមានអត្ថន័យសំខាន់ជាពិសេសក្នុងបរិបទដែលប្រទេសទាំងពីរកំពុងព្យាយាមអនុវត្តនូវឯកសារទាំងអស់ខាងលើ។ ដំណើរទស្សនកិច្ចនេះមិនត្រឹមតែជាព្រឹត្តិការណ៍ការទូតដ៏សំខាន់ប៉ុណ្ណោះទេ ថែមទាំងបង្ហាញពីការគោរព និងការប្តេជ្ញាចិត្តរបស់រុស្ស៊ី ចំពោះទំនាក់ទំនងសហប្រតិបត្តិការពហុភាគីជាមួយវៀតណាមផងដែរ។ ប្រការនេះរួមចំណែកដល់ការពង្រឹងទំនាក់ទំនងមិត្តភាព និងភាពជឿជាក់គ្នាទៅវិញទៅមក បង្កើតមូលដ្ឋានគ្រឹះដ៏រឹងមាំសម្រាប់ការអភិវឌ្ឍ យ៉ាងទូលំទូលាយនៃទំនាក់ទំនងរវាងប្រទេសទាំងពីរនាពេលខាងមុខ។

ដំណើរទស្សនកិច្ចរបស់ប្រធានាធិបតី Vladimir Putin ក៏ជាឱកាសសម្រាប់មេដឹកនាំនៃប្រទេសទាំងពីរពិភាក្សា និងលើកឡើងវិធានការជាក់លាក់ ដើម្បីជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី រួមទាំងការជំរុញការអនុវត្តគម្រោងកិច្ចសហប្រតិបត្តិការសំខាន់ៗ ជាពិសេសលើវិស័យដូចជា ថាមពល ឧស្សាហកម្ម កសិកម្ម និងផ្សេងៗទៀត។

ក្នុងក្របខ័ណ្ឌនៃដំណើរទស្សនកិច្ចនេះ ថ្នាក់ដឹកនាំនៃប្រទេសទាំងពីរនឹងពិភាក្សា និងតម្រង់ទិសសម្រាប់ទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយរហូតដល់ឆ្នាំ ២០៣០។ គោលដៅរយៈពេលវែង និងផែនការសកម្មភាពជាក់លាក់នឹងត្រូវដាក់ចេញ ដើម្បីធានាការអភិវឌ្ឍប្រកបដោយចីរភាព និងប្រសិទ្ធភាពនៃទំនាក់ទំនងទ្វេភាគីនាពេលខាងមុខ។  នេះក៏ជាឱកាសសម្រាប់ប្រទេសទាំងពីរដើម្បីបញ្ជាក់ពីការប្តេជ្ញាចិត្តក្នុងកិច្ចសហប្រតិបត្តិការក្នុងបញ្ហាអន្តរជាតិ និងតំបន់។ ការសម្របសម្រួលយ៉ាងជិតស្និទ្ធនៅក្នុងវេទិកាពហុភាគី និងអង្គការអន្តរជាតិនានានឹងរួមចំណែកដល់សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។ លើសពីនេះ ដំណើរទស្សនកិច្ចរបស់ប្រធានាធិបតីរុស្ស៊ីនឹងបង្កើតសន្ទុះថ្មីសម្រាប់ការផ្លាស់ប្តូរវប្បធម៌ និងការទូតរវាងប្រជាជន និងប្រជាជន។ កម្មវិធីសហប្រតិបត្តិការវប្បធម៌ អប់រំ និងទេសចរណ៍ នឹងត្រូវបានផ្សព្វផ្សាយយ៉ាងខ្លាំងក្លា រួមចំណែកពង្រឹងការយល់ដឹង និងការតភ្ជាប់រវាងប្រជាជនទាំងពីរ។ លោកឯកអគ្គរដ្ឋទូត Dang Minh Khoi បានសម្តែងនូវជំនឿថា ដំណើរទស្សនកិច្ចលើកនេះរបស់លោកប្រធានាធិបតី Vladimir Putin នឹងជាព្រឹត្តិការណ៍ដ៏សំខាន់មួយ ដោយកត់សម្គាល់ការអភិវឌ្ឍដ៏រឹងមាំ និងនិរន្តរភាពនៃទំនាក់ទំនងពិសេសរវាងវៀតណាម និងសហព័ន្ធរុស្ស៊ី ធ្វើឱ្យទំនាក់ទំនងទ្វេភាគីយ៉ាងរឹងមាំលើមាគ៌ាបើកចំហឆ្ពោះទៅអនាគតល្អ មិត្តភាពស្មោះត្រង់ និងភាពជាដៃគូយុទ្ធសាស្ត្រគ្រប់ជ្រុងជ្រោយក្នុងយុគសម័យថ្មី។

លោកឯកអគ្គរដ្ឋទូត Dang Minh Khoi សង្ឃឹមថា ដោយមានទំនាក់ទំនងល្អរវាងប្រទេសទាំងពីរ ដំណើរទស្សនកិច្ចផ្លូវរដ្ឋរបស់ លោក Vladimir Putin ប្រធានាធិបតីរុស្ស៊ី មកកាន់វៀតណាម នឹងនាំមកនូវការកម្លាំងចលករលើកទឹកចិត្តថ្មីសម្រាប់ប្រទេសទាំងពីរដើម្បីធ្វើកិច្ចសហប្រតិបត្តិការកាន់តែជិតស្និទ្ធ និងកាន់តែមានប្រសិទ្ធភាព រួមគ្នាឆ្ពោះទៅអនាគតដ៏ល្អប្រសើរ៕

បកប្រែដោយ Minh Trung