រូបរាងថ្មីនៅឃុំ Phu My
កប.អនឡាញ - ឃុំ Phu My (ស្រុក My Tu ខេត្ត Soc Trang) ពីមុនជាឃុំក្រីក្រ ដោយមានជនជាតិខ្មែរជាង ៩៣% រស់នៅ មានហេដ្ឋារចនាសម្ព័ន្ធ និងជីវភាពរស់នៅរបស់ប្រជាជនជួបការលំបាកជាច្រើន។
ទោះបីជាយ៉ាងណាក៏ដោយ ជាមួយនឹងការអនុវត្តស្របគ្នានៃគោលនយោបាយគាំទ្រ ជាពិសេសកម្មវិធីគោលដៅជាតិសម្រាប់ការអភិវឌ្ឍសេដ្ឋកិច្ចសង្គមរបស់ជនជាតិភាគតិច និងតំបន់ភ្នំសម្រាប់រយៈពេល២០២១-២០៣០; ដំណាក់កាលទី ១ ពីឆ្នាំ ២០២១ ដល់ឆ្នាំ២០២៥ (កម្មវិធី ១៧១៩) ឆ្នាំនេះ ប្រជាពលរដ្ឋខ្មែរនៅPhu My ប្រារព្ធពិធីបុណ្យចូលឆ្នាំថ្មី ក្នុងភាពរំជើបរំជួលរីករាយដោយសារតែរូបរាងជនបទ មើលទៅហាក់ដូចជាមានសម្លៀកបំពាក់ថ្មី។
ត្រលប់មក Phu My វិញថ្ងៃនេះ ដើរលើផ្លូវបេតុងពីទីកណ្តាលឃុំឆ្ពោះទៅភូមិនានា វាមិនពិបាកទេសម្រាប់យើងខ្ញុំមើលឃើញផ្ទះខ្ពស់ៗរឹងមាំ សាលារៀនធំទូលាយ និងវត្តខ្មែរដ៏អស្ចារ្យ។ ដើម្បីទទួលបានសមិទ្ធផលនេះ គឺដោយសារតែ មានទុនឧបថ្ថម្ភ ការវិនិយោគលើការសាងសង់នូវរាល់សំណង់ផ្លូវគមនាគមន៍ជនបទ និងការអនុវត្តគម្រោងក្រោមកម្មវិធី ១៧១៩ ដោយហេតុនេះជួយឃុំ Phu My ឈានទៅដល់គោលដៅជនបទថ្មីនៅចុងឆ្នាំ ២០២៣។
|
|
ដោយទទួលបានឥណទានអនុគ្រោះពីកម្មវិធី១៧១៩ បានជួយគ្រួសារក្រីក្រជាច្រើនមានទុនសម្រាប់ចិញ្ចឹមគោយកទឹកដោះ |
តាមរយៈការស្រាវជ្រាវ យើងបានដឹងថា ការអនុវត្តកម្មវិធី ១៧១៩ ចាប់ពីឆ្នាំ ២០២២ ដល់បច្ចុប្បន្ន ឃុំ Phu My បានបញ្ចេញថវិកាឧបត្ថម្ភផ្ទះជូនប្រជាពលរដ្ឋចំនួន ៦៥ គ្រួសារ ជួយផ្លាស់ប្តូរការងារសម្រាប់ ២៩ គ្រួសារ និងការផ្គត់ផ្គង់ទឹកប្រើប្រាស់ដល់ ២៩ គ្រួសារ។ លើសពីនេះ ឃុំក៏បានអនុវត្តគម្រោងសាងសង់ផ្លូវជនបទចំនួន ២ ខ្សែ ដោយមានទុនវិនិយោគសរុបជាង ៣.៦ ពាន់លានដុង។ ក្នុងនាមជាគ្រួសារមួយក្នុងចំណោមគ្រួសារដែលទទួលបានការគាំទ្រលំនៅដ្ឋាន លោក Lieu Khenl នៅភូមិ Bung Coc ឃុំ Phu My បានមានប្រសាសន៍ថា៖ “គ្រួសាររបស់ខ្ញុំជាគ្រួសារក្រីក្រដែលជួបការលំបាកខាងលំនៅឋាន ហើយត្រូវបានឧបត្ថម្ភដោយរដ្ឋាភិបាលមូលដ្ឋានចំនួន ៤៤ លានដុង បានជួយខ្ញុំឲ្យមាន ផ្ទះធំទូលាយ។ នេះជាការព្រួយបារម្ភ និងការលើកទឹកចិត្តដ៏ធំរបស់រដ្ឋ សម្រាប់គ្រួសារខ្ញុំ”។
និយាយជាមួយយើងខ្ញុំ លោក Vo Van Vu ប្រធានគណៈកម្មាធិការប្រជាជនឃុំ Phu My បានមានប្រសាសន៍ថា៖ “ការអនុវត្តកម្មវិធី ១៧១៩ ពិតជាកម្លាំងចលករក្នុងការជំរុញការអភិវឌ្ឍសេដ្ឋកិច្ចសង្គមមូលដ្ឋាន។ មកដល់បច្ចុប្បន្ន គម្រោងធ្វើពិពិធកម្មជីវភាពរស់នៅ គំរូកាត់បន្ថយភាពក្រីក្រ; ការគាំទ្រការអភិវឌ្ឍផលិតកម្មតាមខ្សែសង្វាក់តម្លៃ... ជាមួយនឹងដើមទុនសរុបជាង ២ ពាន់លានដុងដែលបានដាក់ពង្រាយបានជួយឱ្យគ្រួសារដែលទទួលផលកើនឡើងក្នុងជីវិត។
មិនត្រឹមតែលើកកំពស់គំរូអភិវឌ្ឍសេដ្ឋកិច្ចប៉ុណ្ណោះទេ ក្នុងរយៈពេលថ្មីៗនេះ ឃុំ Phu My ក៏បានផ្តោតការយកចិត្តទុកដាក់លើការវិនិយោគលើការកសាងហេដ្ឋារចនាសម្ព័ន្ធសំខាន់ៗ ការកៀរគរប្រភពទុនវិនិយោគដើម្បីកសាង និងលើកកំពស់ប្រព័ន្ធផ្លូវជនបទ ឬសំណង់ប្រព័ន្ធធារាសាស្ត្រ...។ អាស្រ័យហេតុនេះ ឃុំ Phu My កាន់តែរីកចម្រើន។ បច្ចុប្បន្ននេះ ផ្លូវលំឃុំ អន្តរឃុំ មានប្រវែងជាង ១៣ គីឡូម៉ែត្រ ត្រូវបានចាក់បេតុង គ្រប់ភូមិ និងផ្លូវលំ អន្តរភូមិទាំងអស់ ត្រូវបានធ្វើថ្មីរឹងមាំ។ ភូមិទាំង ៧ លើ៧ នៃឃុំទាំងអស់ត្រូវតាមស្តង់ដារភូមិវប្បធម៌ និងមានផ្ទះសហគមន៍ និងកន្លែងលេងកីឡា ដើម្បីធានាបាននូវតម្រូវការវប្បធម៌ និងកីឡារបស់ប្រជាជន។ លំនៅឋានរឹងមាំ និងពាក់កណ្តាលរឹងមាំសម្រេចបាន ៨៩%។ គិតត្រឹមដល់ដំណាច់ឆ្នាំ ២០២៣ ចំណូលជាមធ្យមរបស់ប្រជាជននឹងឡើងដល់ ៥៧ លានដុង; គ្រួសារក្រីក្រមានតែ 6 គ្រួសារប៉ុណ្ណោះ (ស្រូបយក ០.១៥%); កម្មករដែលបានបណ្តុះបណ្តាលឈានដល់ ៧១%; ៩៩.៧% នៃគ្រួសារមានទឹកស្អាត; ១០០% នៃគ្រួសារមានអគ្គិសនីប្រើប្រាស់តាមបណ្តាញសុវត្ថិភាព។
ក្រៅពីនោះ គំរូ “បំភ្លឺផ្លូវជនបទ” ក៏នាំមកនូវលទ្ធផលជាក់ស្តែងក្នុងចលនាប្រឡងប្រណាំង “ប្រទេសទាំងមូលរួមដៃគ្នាកសាងជនបទថ្មី” នៅ Phu My។ គំរូ "បំភ្លឺផ្លូវជនបទ" លើកដំបូងបានអនុវត្តនៅចុងឆ្នាំ ២០១៧ នៅភូមិបេកតុន មានប្រវែងជិត ២ គីឡូម៉ែត្រ រួមទាំងអំពូលភ្លើងចំនួន ៩២ ដើម ដែលផលិតដោយចំណាយថវិកាសរុបជាង ១០០ លានដុង ដែលបានរួមចំណែកដោយប្រជាជន។ មកទល់នឹងពេលនេះ ឃុំទាំងមូលមានគំរូ "បំភ្លឺផ្លូវជនបទ" ចំនួន ៦ ភូមិ ត្រូវបានដាក់ពង្រាយ លើ៧ភូមិ ដោយមានប្រវែងប្រហែល ១៦ គីឡូម៉ែត្រ មានអំពូលភ្លើងហើយ ។ លោក Ma Luong Thien មេភូមិ Ta Bien ឃុំ Phu My បានមានប្រសាសន៍ថា៖ ពីមុនផ្លូវអន្តរភូមិមានសភាពតូចចង្អៀត និងងងឹតនៅពេលយប់ ប្រជាពលរដ្ឋដែលមកធ្វើការយប់ជ្រៅតែងតែព្រួយបារម្ភ ព្រោះមានបង្កប់នូវគ្រោះថ្នាក់ច្រើន។ ចាប់តាំងពីមានអគ្គិសនីមក មិនត្រឹមតែបង្កភាពងាយស្រួលដល់ប្រជាពលរដ្ឋក្នុងការធ្វើដំណើរប៉ុណ្ណោះទេ ប៉ុន្តែស្ថានភាពសន្តិសុខ និងសណ្តាប់ធ្នាប់នៅក្នុងភូមិក៏ត្រូវបានធានាផងដែរ ហើយគ្រោះថ្នាក់ចរាចរណ៍បានថយចុះគួរឲ្យកត់សម្គាល់ថែមទៀត”។
ការផ្លាស់ប្តូរមុខមាត់នៅឃុំ Phu My គឺជាភស្តុតាងជាក់ស្តែងនៃគោលការណ៍ណែនាំ និងគោលនយោបាយត្រឹមត្រូវរបស់បក្ស និងរដ្ឋ សាមគ្គីភាព កិច្ចខិតខំប្រឹងប្រែងរួមគ្នា និងអស់ពីចិត្តរបស់គ្រប់កម្រិត និងគ្រប់វិស័យបានជួយប្រជាជនខ្មែរមានជីវភាពរស់នៅល្អបំផុត មានលក្ខខណ្ឌសម្រាប់ការធ្វើផលិតកម្ម ការអភិវឌ្ឍសេដ្ឋកិច្ច និងការលើកកម្ពស់ជីវភាពរស់នៅ។
បកប្រែដោយ Minh Trung