លើកកម្ពស់ការយល់ដឹងផ្នែកច្បាប់សម្រាប់ជនរួមជាតិ
កប.អនឡាញ - ដោយកំណត់ថា តំបន់ជនជាតិភាគតិច និងតំបន់ភ្នំនៅមានការលំបាកជាច្រើន កម្រិតយល់ដឹងរបស់ប្រជាជនមិនស្មើគ្នា ការយល់ដឹងផ្នែកនយោបាយ និងច្បាប់របស់ប្រជាជននៅមានកម្រិតនៅឡើយ ស្ថាប័នមានសមត្ថកិច្ចស្រុក Vo Nhai ខេត្ត Thai Nguyen វៀតណាម តែងតែយកចិត្តទុកដាក់លើការឃោសនា ផ្សព្វផ្សាយ និងអប់រំច្បាប់ដល់ជនរួមជាតិភាគតិច ដើម្បីជួយជនរួមជាតិលើកកម្ពស់ការយល់ដឹង រួមចំណែកការពារ និងរក្សាសន្តិសុខនយោបាយ សុវត្ថិភាពសង្គម។
Vo Nhai ជាស្រុកមួយនៅតំបន់ភ្នំនៃខេត្ត Thai Nguyen ដែលមានជនរួមជាតិភាគតិចជាង ៧០%។ តំបន់ជនជាតិភាគតិចជាច្រើននៅតែមានទំនៀមទម្លាប់ចាស់កម្រិល អំពើហឹង្សាក្នុងគ្រួសារ ឬកាប់បំផ្លាញព្រៃឈើ។ល។ ដូច្នេះ ដើម្បីលើកកំពស់ចំណេះដឹងផ្នែកច្បាប់របស់ប្រជាជន ស្រុក Vo Nhai បានសហការជាមួយមជ្ឈមណ្ឌលជំនួយផ្នែកច្បាប់របស់ខេត្ត Thai Nguyen និងស្ថាប័នជំនាញ រៀបចំសន្និសីទផ្សព្វផ្សាយច្បាប់នៅភូមិ និងឃុំនានាក្នុងស្រុក។
ទន្ទឹមនឹងការរៀបចំសន្និសីទតាមភូមិ ស្ថាប័ននានានៃស្រុក Vo Nhai ក៏សហការជាមួយអ្នកមានប្រជាប្រិយភាពក្នុងសហគមន៍ ដើម្បីទៅដល់គ្រួសារនីមួយៗ ដើម្បីឃោសនា និងចលនាប្រជាពលរដ្ឋគោរពច្បាប់យ៉ាងម៉ឺងម៉ាត់ និងរួមដៃគ្នាការពារសន្តិសុខ សណ្តាប់ធ្នាប់។
ទន្ទឹមនឹងនោះ រាល់ពេលមានឯកសារច្បាប់ថ្មី មជ្ឈមណ្ឌលវប្បធម៌ កីឡា និងគមនាគមន៍ស្រុក បានសហការជាមួយការិយាល័យយុត្តិធម៌ ឬ កងកម្លាំងមានសមត្ថកិច្ច ដើម្បីឃោសនាដោយផ្ទាល់ ឬតាមប្រព័ន្ធឧឃោសនសព្ទ។ វិធីសាស្រ្តនេះបាននាំមកនូវលទ្ធផលវិជ្ជមាន ដោយសារប្រជាជននៅតំបន់ដាច់ស្រយាលអាចស្តាប់ដើម្បីទទួលចំណេះដឹងផ្នែកច្បាប់។
លោក Hoang Van Thao អនុប្រធានការិយាល័យយុត្តិធម៌ស្រុក Vo Nhai បានឲ្យដឹងថា “តាមរយៈទម្រង់ផ្សេងៗនៃការឃោសនា និងការអប់រំអំពីច្បាប់នៅតាមភូមិ និងទីប្រជាជន ប្រជាពលរដ្ឋបានអនុវត្តល្អនូវច្បាប់ ដោយកំណត់សកម្មភាពខុសច្បាប់ដែលប្រជាពលរដ្ឋមិនបានដឹងពីមុន”។
ជាពិសេស ដើម្បីធ្វើពិពិធកម្មទម្រង់នៃការផ្សព្វផ្សាយច្បាប់ដល់ប្រជាជន ស្រុក Vo Nhai ក៏បានអនុវត្តការធ្វើបរិវត្តកម្មឌីជីថលក្នុងការឃោសនា ដើម្បីនាំមកនូវលទ្ធផលវិជ្ជមានផងដែរ។
អាចមើលឃើញថា ការផ្សព្វផ្សាយ អប់រំ និងលើកកម្ពស់ចំណេះដឹងផ្នែកច្បាប់ដល់ជនរួមជាតិភាគតិចនៅស្រុក Vo Nhai មានសារៈសំខាន់ក្នុងការអនុវត្តប្រកបដោយប្រសិទ្ធភាពនូវគោលនយោបាយជនជាតិ តាមរយៈនោះ មិនត្រឹមតែលើកកំពស់ការយល់ដឹងរបស់ប្រជាជនប៉ុណ្ណោះទេ ថែមទាំងរួមចំណែកជម្រុញការអភិវឌ្ឍសេដ្ឋកិច្ចសង្គមនៅមូលលដ្ឋានទៀតផង៕
បកប្រែដោយ Thuy Anh