កិច្ចប្រជុំទ្វេភាគីស្តីពីការការពារព្រំដែនរវាងខេត្ត Lam Dong និងខេត្តមណ្ឌលគីរី

ក្នុងបរិយាកាសសាមគ្គីភាព មិត្តភាព និងការជឿទុកចិត្តគ្នាទៅវិញទៅមក កិច្ចពិភាក្សាបានវាយតម្លៃប្រព័ន្ធបង្គោលព្រំដែនគោកនៅតំបន់មួយចំនួនដែលមានច្រាំងទន្លេកំពុងជួបប្រទះនឹងការបាក់ដី បង្កហានិភ័យដល់ខ្សែព្រំដែន និងសុវត្ថិភាពនៃបង្គោលព្រំដែន។

ទិដ្ឋភាពនៃកិច្ចពិភាក្សា (រូបថត៖ baolamdong.vn)

ថ្លែងនៅក្នុងកិច្ចប្រជុំ លោក Nguyen Minh អនុប្រធានគណៈកម្មាធិការប្រជាជនខេត្ត ប្រធានគណៈកម្មាធិការដឹកនាំកិច្ចការព្រំដែនខេត្ត បានសង្កត់ធ្ងន់ថា លទ្ធផលនៃការពិនិត្យលើកនេះបង្ហាញពីកិច្ចសហការយ៉ាងជិតស្និទ្ធ និងមានប្រសិទ្ធភាពរវាងមូលដ្ឋានទាំងពីរ។ ព្រមទាំង នេះជាមូលដ្ឋានសំខាន់សម្រាប់ភាគីទាំងពីរពិភាក្សាអំពីដំណោះស្រាយបច្ចេកទេសដើម្បីការពារប្រព័ន្ធបង្គោលព្រំដែនគោក និងរក្សាព្រំដែនប្រកបដោយសន្តិភាព ស្ថិរភាព និងយូរអង្វែង។

ក្នុងកិច្ចប្រជុំនោះ លោក ហ៊ាញ ប៊ុណ្ណា អភិបាលរងខេត្តមណ្ឌលគីរី បានបញ្ជាក់ថា ការពិនិត្យ និងកិច្ចប្រជុំលើកនេះ បានពង្រឹងបន្ថែមទៀតនូវទំនាក់ទំនងសាមគ្គីភាព និងមិត្តភាពរវាងខេត្តទាំងពីរ។ នេះជាមូលដ្ឋានសម្រាប់ភាគីទាំងពីរបង្កើនកិច្ចសហការក្នុងការគ្រប់គ្រង និងការពារព្រំដែនរួម។

គណៈប្រតិភូទាំងពីរ ថតរូបទុកជាអនុស្សាវរីយ៍នៅក្នុងកិច្ចពិភាក្សា (រូបថត៖ baolamdong.vn)

ដោយផ្អែកលើមូលដ្ឋាននេះ ភាគីទាំងពីរបានឯកភាពគ្នាជួសជុលនិងពង្រឹងដើម្បីការពារច្រាំងទន្លេ និងគ្រឹះនៃបង្គោលព្រំដែន ព្រមទាំងអនុវត្តវិធានការរយៈពេលខ្លី និងរយៈពេលវែង ដោយសមស្របនឹងលក្ខខណ្ឌជាក់ស្តែង និងបទប្បញ្ញត្តិនៅបច្ចុប្បន្ន។

នៅចុងបញ្ចប់នៃកិច្ចពិភាក្សា តំណាងនៃគណៈប្រតិភូទាំងពីរបានចុះហត្ថលេខាលើកំណត់ហេតុនៃការពិនិត្យទ្វេភាគី ដែលជាមូលដ្ឋានសម្រាប់រាយការណ៍ដល់ស្ថាប័នមានសមត្ថកិច្ច ដើម្បីពិចារណា និងចេញសេចក្តីសម្រេចចិត្តស្ដីពីការអនុវត្ត រួមចំណែកដល់ការកសាងព្រំដែនវៀតណាម-កម្ពុជា ប្រកបដោយសន្តិភាព ស្ថិរភាព សហប្រតិបត្តិការ និងការអភិវឌ្ឍ៕

បកប្រែដោយ Thuy Anh