កម្ពុជាតែងតែចាត់ទុកវៀតណាមជាប្រទេសជិតខាងដ៏ល្អ និងស្មោះត្រង់

លោក To Lam អគ្គលេខាបក្ស និងសម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា

លោក To Lam អគ្គលេខាបក្ស បានបញ្ជាក់ថា បក្ស និងរដ្ឋវៀតណាម តែងតែផ្តល់អាទិភាពខ្ពស់ចំពោះទំនាក់ទំនងមិត្តភាពជាមួយកម្ពុជា និងគាំទ្រការអភិវឌ្ឍប្រកបដោយសន្តិភាព និងស្ថិរភាពរបស់កម្ពុជា។ លោក To Lam អគ្គលេខាបក្ស បានជម្រាបជូនថា បន្ទាប់ពីបញ្ចប់ដោយជោគជ័យនៃមហាសន្និបាតលើកទី ១៤ របស់បក្សកុម្មុយនិស្តវៀតណាម និងការបោះឆ្នោតជ្រើសតាំងសមាជិកសភា នីតិកាលទី ១៦ និងក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ ២០២៦-២០៣១ នោះ សម័យប្រជុំលើកទី១ នៃរដ្ឋសភា នីតិកាលទី១៦ នឹងតែងតាំងមុខតំណែងថ្នាក់ដឹកនាំ រៀបចំរចនាសម្ព័ន្ធក្បាលម៉ាស៊ីនដឹកនាំគ្រប់លំដាប់ថ្នាក់ និងអនុវត្តយ៉ាងសកម្មនូវសេចក្តីសម្រេចដែលបានកំណត់ដោយមហាសន្និបាតបក្សនីតិកាលទី១៤។

លោក To Lam អគ្គលេខាបក្ស ទទួលជួបសម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា

សម្តេចកិត្តិសង្គហបណ្ឌិត ម៉ែន សំអន បានអបអរសាទរជូន​ចំពោះវៀតណាម ដែលបានរៀបចំការបោះឆ្នោតជ្រើសតាំងសមាជិករដ្ឋសភា នីតិកាលទី១៦ និងក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ២០២៦-២០៣១ ដោយជោគជ័យ។ សម្តេចកិត្តិសង្គហបណ្ឌិត ម៉ែន សំអន បានសម្តែងទំនុកចិត្តថា ក្រោមការដឹកនាំដ៏ឈ្លាសវៃ និងចក្ខុវិស័យវែងឆ្ងាយរបស់បក្សកុម្មុយនិស្តវៀតណាម ដែលដឹកនាំដោយលោក To Lam អគ្គលេខាបក្សនោះ វៀតណាមនឹងបន្តអភិវឌ្ឍ និងសម្រេចបាននូវគោលដៅដែលបានកំណត់។ សម្តេចកិត្តិសង្គហបណ្ឌិត ម៉ែន សំអន បានសម្តែងការរីករាយចំពោះសមិទ្ធផលដ៏ធំធេងដែលវៀតណាមសម្រេចបាន និងចាត់ទុកវាក៏ជាសមិទ្ធផលរបស់កម្ពុជាផងដែរ។

សម្តេចកិត្តិសង្គហបណ្ឌិត ម៉ែន សំអន បានមានប្រសាសន៍ថា កម្ពុជាក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី តែងតែយកចិត្តទុកដាក់ និងចាត់ទុកប្រទេសវៀតណាមជាប្រទេសជិតខាងដ៏ល្អ និងស្មោះត្រង់ ដោយតែងតែជួយគ្នាទៅវិញទៅមកក្នុងគ្រាលំបាក ជាពិសេសជំនួយពីកងទ័ពស្ម័គ្រចិត្ត និងប្រជាជនវៀតណាមក្នុងការរំដោះកម្ពុជាចេញពីរបបប្រល័យពូជសាសន៍នៅថ្ងៃទី៧ ខែមករា ឆ្នាំ១៩៧៩។ សម្តេចកិត្តិសង្គហបណ្ឌិត ម៉ែន សំអន បានរំលឹក​ឡើងវិញ​នូវប្រសាសន៍របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជាថា បើគ្មានជំនួយពីកងទ័ពស្ម័គ្រចិត្តវៀតណាម កម្ពុជាក៏គ្មានអ្វីៗដូចថ្ងៃនេះទេ។ រណសិរ្សកម្ពុជាបានបញ្ជាក់ថា ខ្លួនតែងតែផ្តល់អាទិភាពដល់ការផ្សព្វផ្សាយព័ត៌មានដល់យុវជនជំនាន់ក្រោយអំពីតម្លៃប្រវត្តិសាស្ត្រនៃទំនាក់ទំនងទ្វេភាគី។ សម្តេចកិត្តិសង្គហបណ្ឌិត ម៉ែន សំអន បានចែករំលែកជាមួយនឹងការវាយតម្លៃរបស់លោក To Lam អគ្គលេខាបក្សថាទំនាក់ទំនងទ្វេភាគីកំពុងអភិវឌ្ឍជាមួយនឹងការជឿទុកចិត្ត ភាពជិតស្និទ្ធ ហើយកិច្ចសហប្រតិបត្តិការសេដ្ឋកិច្ចកាន់តែរឹងមាំ និងមានឱកាសរីកចម្រើនបន្ថែមទៀត ដោយខិតខំសម្រេចបាននូវទំហំពាណិជ្ជកម្ម ២០ ពាន់លានដុល្លារអាមេរិកនាពេលឆាប់ៗនេះ។ សម្តេចកិត្តិសង្គហបណ្ឌិត ម៉ែន សំអន ក៏បានវាយតម្លៃខ្ពស់ចំពោះការបង្កើនការផ្លាស់ប្តូរប្រជាជន រួមទាំងការជួសជុលស្តូបមិត្តភាពកម្ពុជា-វៀតណាម បាន​ឆ្លុះបញ្ចាំងពីប្រពៃណីមិត្តភាព និងសាមគ្គីភាពរវាងប្រជាជនទាំងពីរ។ សម្តេចកិត្តិសង្គហបណ្ឌិត ម៉ែន សំអន បានបញ្ជាក់ថា រណសិរ្សកម្ពុជានឹងសម្របសម្រួលយ៉ាងជិតស្និទ្ធជាមួយរណសិរ្សមាតុភូមិវៀតណាម ដើម្បីលើកកម្ពស់ការផ្លាស់ប្តូរប្រជាជន កិច្ចសហប្រតិបត្តិការវប្បធម៌ វិស័យសុខាភិបាល ការអប់រំ-បណ្តុះបណ្តាល ជាពិសេស កិច្ចសហប្រតិបត្តិការរវាងបណ្តាខេត្តនៅសងខាងព្រំដែន។

ទិដ្ឋភាពនៃជំនួប

លោក To Lam អគ្គលេខាបក្ស និងសម្តេចកិត្តិសង្គហបណ្ឌិត ម៉ែន សំអន បានសម្តែងទំនុកចិត្តថា ទំនាក់ទំនងសហប្រតិបត្តិការរវាងគណបក្សទាំងពីរ និងប្រទេសទាំងពីរនឹងបន្តពង្រឹង និងអភិវឌ្ឍប្រកបដោយប្រសិទ្ធភាពដើម្បីផលប្រយោជន៍របស់ប្រជាជននៃប្រទេសទាំងពីរ រួមចំណែកដល់សន្តិភាព និងស្ថិរភាពនៅក្នុងតំបន់ និងពិភពលោក ព្រមទាំងបញ្ជាក់ថា ចំណមិត្តភាពវៀតណាម-កម្ពុជាមានលក្ខណៈពិសេស និងមិនអាចកាត់ថ្លៃបាន ដែលត្រូវតែរក្សា ពូនជ្រំ ពង្រឹង និងអភិវឌ្ឍសម្រាប់មនុស្សជំនាន់ក្រោយ៕

បកប្រែដោយ Duy Hoan