គណៈប្រតិភូជាន់ខ្ពស់កម្ពុជាបំពេញទស្សនកិច្ចការងារនៅខេត្ត Ninh Binh

នៅក្នុងជំនួបធ្វើការនេះ លោក Tran Huy Tuan សមាជិកគណៈកម្មាធិការមជ្ឈិមនៃបក្សកុម្មុយនិស្តវៀតណាម និងជាលេខានៃគណៈកម្មាធិការបក្សខេត្ត Ninh Binh សម្តែងសេចក្តីសោមនស្សរីករាយដោយបានទទួលស្វាគមន៍គណៈប្រតិភូមកកាន់ខេត្ត Ninh Binh។ ដោយសង្កត់ធ្ងន់លើទំនាក់ទំនងមិត្តភាពជាប្រពៃណីរវាងវៀតណាម និងកម្ពុជា លោក Tran Huy Tuan បញ្ជាក់ថា នេះគឺជាទ្រព្យសម្បត្តិដ៏មានតម្លៃរបស់ប្រទេសទាំងពីរ ដែលត្រូវបានពូនជ្រំអស់រយៈពេលជាច្រើនជំនាន់។ គណៈកម្មាធិការបក្ស អាជ្ញាធរ និងប្រជាជនខេត្តតែងតែយកចិត្តទុកដាក់ចំពោះទំនាក់ទំនងដ៏ល្អនេះ។ ព្រមទាំង ខេត្តមានបំណងបង្កើនការផ្លាស់ប្តូរ និងកិច្ចសហប្រតិបត្តិការជាមួយមូលដ្ឋាននានារបស់ប្រទេសកម្ពុជា។ តាមរយៈនោះ ជម្រុញការបង្កើតទំនាក់ទំនងសហប្រតិបត្តិការនៅថ្នាក់ខេត្ត ដោយរួមចំណែកដល់ការពង្រឹង និងពង្រីកចំណងមិត្តភាពរវាងប្រទេសទាំងពីរ ឲ្យកាន់តែស៊ីជម្រៅ ជាក់ស្តែង និងមានប្រសិទ្ធភាព។

លោក Tran Huy Tuan មានប្រសាសន៍នៅក្នុងជំនួប (រូបថត៖ nhandan.vn)

ដោយថ្លែងអំណរគុណចំពោះការទទួលស្វាគមន៍យ៉ាងកក់ក្តៅពីថ្នាក់ដឹកនាំខេត្ត Ninh Binh សម្តេចកិត្តិសង្គហបណ្ឌិត ម៉ែន សំអន បានអបអរសាទរចំពោះសមិទ្ធផលអភិវឌ្ឍន៍ដ៏លេចធ្លោរបស់ខេត្តនាពេលកន្លងមក។ បន្ទាប់ពីដំណើរទស្សនកិច្ចចំនួនបីលើកនៅខេត្តនេះ សម្តេចកិត្តិសង្គហបណ្ឌិត ម៉ែន សំអន បានសម្តែងនូវចំណាប់អារម្មណ៍ចំពោះការអភិវឌ្ឍគួរឲ្យកត់សម្គាល់ ជាពិសេស ហេដ្ឋារចនាសម្ព័ន្ធកាន់តែប្រសើរឡើង ការដឹកជញ្ជូនកាន់តែងាយស្រួល ហើយការរីកចម្រើននៅក្នុងវិស័យទេសចរណ៍។ សម្តេចកិត្តិសង្គហបណ្ឌិត ម៉ែន សំអន បានសម្តែងទំនុកចិត្តថា ខេត្ត Ninh Binh នឹងបន្តសម្រេចបាននូវគោលដៅអភិវឌ្ឍន៍ដែលបានកំណត់។

សម្តេចកិត្តិសង្គហបណ្ឌិត ម៉ែន សំអន បានឲ្យដឹងថា ការរក្សាទំនាក់ទំនងសហប្រតិបត្តិការមិត្តភាពគ្រប់ជ្រុងជ្រោយ ជាមួយវៀតណាមនៅគ្រប់លំដាប់ថ្នាក់ និងរវាងអង្គការមហាជន គឺជាគោលនយោបាយយូរអង្វែងរបស់គណបក្សប្រជាជនកម្ពុជា។ គ្រប់លំដាប់ថ្នាក់ គ្រប់ស្ថាប័ន និងមូលដ្ឋាននានានៃប្រទេសទាំងពីរ បានអនុវត្តគោលនយោបាយរបស់ថ្នាក់ដឹកនាំជាន់ខ្ពស់យ៉ាងសកម្ម ដោយពង្រឹងការផ្លាស់ប្តូរ កិច្ចសហប្រតិបត្តិការ និងការជួយគាំទ្រគ្នាទៅវិញទៅមក ជាពិសេសក្នុងគ្រាលំបាកដូចជាការផ្ទុះឡើងនៃជំងឺរាតត្បាត និងគ្រោះមហន្តរាយធម្មជាតិ។

គណៈប្រតិភូជាន់ខ្ពស់នៃក្រុមប្រឹក្សាជាតិនៃរណសិរ្សសាមគ្គីភាព និងអភិវឌ្ឍន៍កម្ពុជា បំពេញទស្សនកិច្ចនៅខេត្ត Ninh Binh (រូបថត៖ nhandan.vn)

ដោយវាយតម្លៃខ្ពស់ចំពោះសក្តានុពលសម្រាប់កិច្ចសហប្រតិបត្តិការក្នុងវិស័យផ្សេងៗ ជាពិសេសវិស័យទេសចរណ៍ វប្បធម៌ និងសាសនា សម្តេចកិត្តិសង្គហបណ្ឌិត ម៉ែន សំអន បានអះអាងថា នឹងបន្តផ្តោតលើការជម្រុញកិច្ចសហប្រតិបត្តិការ និងបង្កើនការផ្លាស់ប្តូររវាងខេត្ត Ninh Binh និងមូលដ្ឋានដទៃទៀតរបស់កម្ពុជា ដោយរួមចំណែកដល់ការអភិវឌ្ឍប្រកបដោយចីរភាពនូវទំនាក់ទំនងវៀតណាម-កម្ពុជា។

នៅថ្ងៃដដែលនោះ គណៈប្រតិភូបានទៅទស្សនាតំបន់ទេសចរណ៍ Tam Chuc៕

បកប្រែដោយ Thuy Anh