សហគ្រាសវៀតណាមរួមចំណែកអភិវឌ្ឍមូលដ្ឋាននានារបស់កម្ពុជា

លោក ញ៉ែម សំអឿន អភិបាលខេត្តរតនគិរី បានមានប្រសាសន៍ថា៖ ខ្ញុំសប្បាយចិត្តណាស់ និងជឿជាក់ថា មិនត្រឹមតែប្រជាជនក្នុងខេត្តរតនគិរីប៉ុណ្ណោះទេ ថែមទាំងប្រជាជននៅតាមបណ្តាខេត្ត-ក្រុងនានាក៏អាចមកធ្វើការនៅទីនេះបានដែរ។ បើយើងនិយាយអំពីគោលនយោបាយ ប្រាក់បៀវត្សរ៍ និងលំនៅឋាន ខ្ញុំវាយតម្លៃក្រុមហ៊ុនថាធ្វើបានល្អណាស់។ ប្រាក់បៀវត្សរ៍របស់កម្មករម្នាក់ៗប្រហែល ២៥០ ដុល្លារ/ខែ ប្រសិនបើនរណាម្នាក់មានជំនាញ និងបទពិសោធន៍ខ្ពស់ ពួកគេនឹងទទួលបានប្រាក់បៀវត្សរ៍ខ្ពស់ជាង។ ខ្ញុំសង្ឃឹមថាក្រុមហ៊ុននឹងបន្តវិនិយោគបន្ថែមទៀត។ លើសពីនេះ ភាគីទាំងពីរ អាជ្ញាធរ និងក្រុមហ៊ុនក៏ត្រូវពង្រឹងកិច្ចសហប្រតិបត្តិការ និងជួយគ្នាទៅវិញទៅមកនៅពេលមានបញ្ហាកើតឡើង។

លោក ញ៉ែម សំអឿន អភិបាលខេត្តរតនគិរី (ខាងឆ្វេងដៃ) (រូបថត៖ vov.vn)

រីឯលោក Nguyen Minh Vu ឯកអគ្គរដ្ឋទូត បានថ្លែងអំណរគុណចំពោះអាជ្ញាធរខេត្តមណ្ឌលគិរី និងខេត្តរតនគិរី ដែលបានបង្កើតលក្ខខណ្ឌអំណោយផលសម្រាប់សហគ្រាសវៀតណាមក្នុងការវិនិយោគ និងអភិវឌ្ឍប្រកបដោយស្ថិរភាពនៅក្នុងមូលដ្ឋាន។ លោកឯកអគ្គរដ្ឋទូតសង្ឃឹមថា ខេត្តនឹងបន្តជួយឧបត្ថម្ភសហគ្រាសវៀតណាម ដើម្បីទទួលបានការអាទិភាពក្រោមកម្មវិធីអភិវឌ្ឍន៍ភូមិភាគឦសាន្តកម្ពុជា ដំណាក់កាល ២០២៥-២០២៨ ទន្ទឹមនឹងនោះ បង្កើតលក្ខខណ្ឌផ្លូវច្បាប់អំណោយផលសម្រាប់សហគមន៍អាណិកជនវៀតណាម ឲ្យមានជីវភាពរស់នៅប្រកបដោយស្ថិរភាព និងសមាហរណកម្មក្នុងសង្គម។

ទិដ្ឋភាពនៃជំនួបធ្វើការរវាងលោក Nguyen Minh Vu ឯកអគ្គរដ្ឋទូត និងគណៈប្រតិភូខេត្តរតនគិរី (រូបថត៖ vov.vn)

ក្នុងកម្មវិធីការងារ គណៈប្រតិភូក៏បានទៅសួរសុខទុក្ខតំណាងអាណិកជនវៀតណាមនៅក្នុងតំបន់ ទស្សនាក្រុមហ៊ុនអភិវឌ្ឍន៍កៅស៊ូ Dak Lak-មណ្ឌលគិរី ក្រុមហ៊ុនក្រុងប៊ុករតនគិរី និងតំបន់ពហុកសិកម្មកូនមុំ របស់សម្ព័ន្ធក្រុមហ៊ុន THACO។ លោកឯកអគ្គរដ្ឋទូតបានលើកសរសើរចំពោះស្មារតីជំនះពុះពារការលំបាករបស់អាណិកជនវៀតណាម ក៏ដូចជាកម្មាភិបាល និងកម្មករនៃសហគ្រាសវៀតណាម។ ទន្ទឹមនឹងនោះ លោក Nguyen Minh Vu ឯកអគ្គរដ្ឋទូត ក៏បានវាយតំលៃខ្ពស់ចំពោះការរួមចំណែកជាក់ស្តែងរបស់សហគ្រាសវៀតណាមក្នុងការបង្កើតការងារ ជួយសហគមន៍ និងរួមចំណែកជំរុញទំនាក់ទំនងវៀតណាម-កម្ពុជាផងដែរ៕

បកប្រែដោយ Huyen Trang