កិច្ចប្រជុំស្តីពីការត្រៀមរៀបចំជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជា

លោកឧត្តមសេនីយ៍ឯក Hoang Xuan Chien សមាជិកគណៈអចិន្ត្រៃយ៍ នៃគណៈកម្មាធិការបក្សយោធាមជ្ឈិម សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេស ប្រធានគណៈប្រតិភូក្រសួងការពារប្រទេសវៀតណាម អញ្ជើញជាអធិបតីកិច្ចប្រជុំនេះ។ ខាងភាគីកម្ពុជាមាន លោកឧត្តមសេនីយ៍ឯក ផាត វិបុលសុភ័ក្រ្ត អគ្គនាយករង អគ្គនាយកដ្ឋាននយោបាយ និងកិច្ចការបរទេស និងជានាយក នាយកដ្ឋានទាក់ទងអន្តរជាតិ ក្រសួងការពារជាតិ ប្រធានគណៈប្រតិភូក្រសួងការពារជាតិកម្ពុជា។

ប្រតិភូចូលរួមកិច្ចប្រជុំ

កិច្ចប្រជុំនេះមានការចូលរួមពី៖ លោកឧត្តមសេនីយ៍ឯក Nguyen Truong Thang សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេស លោកឧត្តមសេនីយ៍ឯក Le Duc Thai សមាជិកគណៈកម្មាធិការមជ្ឈិមបក្ស មេបញ្ជាការកងទ័ពការពារព្រំដែន និងថ្នាក់ដឹកនាំស្ថាប័ននៃក្រសួងការពារប្រទេស យោធភូមិភាគទី៧ និងខេត្ត Tay Ninh។

នៅក្នុងកិច្ចប្រជុំនេះ ស្ថាប័នមុខងារ និងអង្គភាពនានានៃក្រសួងការពារប្រទេស និងបញ្ជាការដ្ឋានយោធភូមិភាគទី៧ បានរាយការណ៍អំពីការត្រៀមរៀបចំជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជា។ គណៈប្រតិភូក្រសួងការពារជាតិកម្ពុជាបានសម្តែងមតិ និងឯកភាពលើខ្លឹមសារសំខាន់ៗនៃកម្មាវិធីជួបប្រាស្រ័យមិត្តភាព។

ដូចដែលបានគ្រោងទុក កម្មវិធីជួបប្រាស្រ័យមិត្តភាពការពារជាតិព្រំដែនវៀតណាម-កម្ពុជាលើកទី២ រួមមានសកម្មភាពសំខាន់ៗដូចជា៖ ពិធីទទួលបដិសណ្ឋារកិច្ច និងពិធីជូនដំណើរគណៈប្រតិភូជាន់ខ្ពស់ ពិធីដាំដើមឈើមិត្តភាព ការធ្វើលំហាត់សមផ្នែកពេទ្យយោធារួមគ្នា ពិធីសម្ពោធសាលាបឋមសិក្សា Ben Cau ពិធីចងសម្ព័ន្ធមេត្រីភាពរវាងទីប្រជុំជននៅសងខាងព្រំដែន ជំនួបប្រាស្រ័យមិត្តភាពរវាងនាយទាហានវ័យក្មេងការពារព្រំដែននៃប្រទេសទាំងពីរ ពិធីជប់លៀង...

នៅកម្ពុជា សកម្មភាពនានានឹងប្រព្រឹត្តទៅរួមមាន៖ ពិធីបញ្ចុះបឋមសិលាសាងសង់សាលាបឋមសិក្សា សាំង សុវណ្ណា ស្រុកស្វាយទាប ខេត្តស្វាយរៀង អញ្ជើញទស្សនកិច្ចនៅអង្គភាពមួយនៃកងយោធពលខេមរភូមិន្ទ។ នៅច្រកទ្វារព្រំដែនអន្តរជាតិម៉ុកបៃ (វៀតណាម) និងច្រកទ្វារព្រំដែនអន្តរជាតិបាវិត (កម្ពុជា) នឹងប្រព្រឹត្តទៅពីធីគោរព និងលាបពណ៌បង្គោលព្រំដែនលេខ១៧១ និងការយាមល្បាតព្រំដែនរួមគ្នា...

លោកឧត្តមសេនីយ៍ឯក Hoang Xuan Chien មានប្រសាសន៍ក្នុងកិច្ចប្រជុំ

មានប្រសាសន៍ក្នុងកិច្ចប្រជុំ លោកឧត្តមសេនីយ៍ឯក Hoang Xuan Chien បានមានប្រសាសន៍ថា៖ ជំនួបប្រាស្រ័យមិត្តភាពការពារជាតិព្រំដែនវៀតណាម - កម្ពុជា គឺជាព្រឹត្តិការណ៍នយោបាយ ការទូតការពារជាតិដ៏សំខាន់បំផុត។ ព្រឹត្តិការណ៍នេះមិនត្រឹមតែកំណត់លើវិសាលភាពនៃវិស័យយោធាការពារជាតិ ឬកិច្ចសហប្រតិបត្តិការរវាងកងទ័ពនៃប្រទេសទាំងពីរប៉ុណ្ណោះទេ ថែមទាំងបង្ហាញយ៉ាងច្បាស់នូវទស្សនៈការបរទេសរបស់បក្ស និងរដ្ឋវៀតណាមចំពោះកម្ពុជា ដែលជាប្រទេសជិតខាងមានទំនាក់ទំនងសាមគ្គីភាពជាប្រពៃណីដ៏យូរអង្វែង។ ជំនួបប្រាស្រ័យនេះនឹងបង្កើតនូវកម្លាំងជំរុញថ្មី ជំរុញការអភិវឌ្ឍន៍សេដ្ឋកិច្ចសង្គម ពង្រឹងការការពារជាតិ-សន្តិសុខ កសាងព្រំដែនមួយប្រកបដោយសន្តិភាព មិត្តភាព កិច្ចសហប្រតិបត្តិការដើម្បីអភិវឌ្ឍន៍ទៅវិញទៅមក រួមចំណែកជំរុញយ៉ាងខ្លាំងនូវការជួបប្រាស្រ័យរវាងប្រជាជននៃប្រទេសទាំងពីរ៕

បកប្រែដោយ Duy Hoan