ពង្រឹងទំនាក់ទំនងនិងកិច្ចសហប្រតិបត្តិការរវាងបណ្ដាខេត្តជាប់ព្រំដែនវៀតណាម-កម្ពុជា

ក្នុងក្របខ័ណ្ឌនៃកិច្ចប្រជុំនេះ លោក Bui Thanh Son ឧបនាយករដ្ឋមន្ត្រីវៀតណាម បានចូលជួបសម្តែងការគួរសមជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោក Bui Thanh Son ឧបនាយករដ្ឋមន្ត្រីវៀតណាម ចូលជួបសម្តែងការគួរសមជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា

កិច្ចប្រជុំបានប្រព្រឹត្តទៅក្នុងបរិយាកាសស្និទ្ធស្នាលនិងយោគយល់គ្នា ក្រោមប្រធានបទ "សន្តិភាព ស្ថិរភាព និងការអភិវឌ្ឍប្រកបដោយចីរភាពនៃបណ្ដាខេត្តជាប់ព្រំដែន"។ ភាគីទាំងពីរបានផ្លាស់ប្តូរទស្សនៈគ្នានិងបង្ហាញពីការប្តេជ្ញាចិត្តក្នុងការថែរក្សា និងអភិវឌ្ឍទំនាក់ទំនង និងកិច្ចសហប្រតិបត្តិការរវាងបណ្ដាខេត្តជាប់ព្រំដែនវៀតណាម-កម្ពុជា ក្រោមពាក្យស្លោក "អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និរន្តរភាពយូរអង្វែង" ព្រមទាំងបន្តកសាងនិងថែរក្សាខ្សែព្រំដែនវៀតណាម-កម្ពុជា ឲ្យក្លាយជាខ្សែព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព។

កិច្ចប្រជុំបានវាយតម្លៃខ្ពស់ចំពោះការអនុវត្តលទ្ធផលនៃកិច្ចប្រជុំលើកទី១២ ស្តីពីកិច្ចសហប្រតិបត្តិការនិងការអភិវឌ្ឍបណ្ដាខេត្តជាប់ព្រំដែនវៀតណាម-កម្ពុជាដែលធ្វើឡើងចាប់ពីថ្ងៃទី២៣ ដល់ថ្ងៃទី២៥ ខែមេសា ឆ្នាំ២០២៣ នៅខេត្ត Tay Ninh (វៀតណាម)។ ភាគីទាំងពីរក៏បានកត់សម្គាល់ថា ទំនាក់ទំនងនិងកិច្ចសហប្រតិបត្តិការដ៏ល្អរវាងអាជ្ញាធរនិងសមត្ថកិច្ចនៃបណ្ដាខេត្តជាប់ព្រំដែនវៀតណាម-កម្ពុជាក្នុងរយៈពេលថ្មីៗនេះ ដែលបានបន្តរក្សា និង​ការពារសន្តិសុខ សណ្តាប់ធ្នាប់ និងស្ថិរភាពនៅតាមបណ្តោយតំបន់ព្រំដែននៃប្រទេសទាំងពីរ ព្រមទាំងលើកកម្ពស់ការអភិវឌ្ឍសេដ្ឋកិច្ចសង្គម និងលើកស្ទួយជីវភាពរស់នៅរបស់ប្រជាជននៅតំបន់ព្រំដែន។

លោក Bui Thanh Son ឧបនាយករដ្ឋមន្ត្រីវៀតណាមចូលរួមកិច្ចប្រជុំលើកទី១៣ ស្តីពីកិច្ចសហប្រតិបត្តិការ និងការអភិវឌ្ឍបណ្ដាខេត្តជាប់ព្រំដែនវៀតណាម-កម្ពុជា

ប្រតិភូទាំងឡាយចូលរួមកិច្ចប្រជុំ

អង្គប្រជុំបានសង្កត់ធ្ងន់លើការពង្រឹងកិច្ចសហប្រតិបត្តិការរវាងបណ្ដាខេត្តជាប់ព្រំដែនវៀតណាម-កម្ពុជាក្នុងវិស័យសំខាន់ៗជាច្រើន រួមមាន៖ ការពារជាតិ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ផ្លាស់ប្ដូរពាណិជ្ជកម្មឆ្លងដែន ការវិនិយោគនិងការគ្រប់គ្រងច្រកទ្វារព្រំដែន ការដឹកជញ្ជូនឆ្លងដែន ការអភិវឌ្ឍហេដ្ឋារចនាសម្ព័ន្ធនិងការតភ្ជាប់ខណ្ឌសីមា ការបោះបង្គោលព្រំដែនគោក  កសិកម្ម សុខាភិបាល ថាមពល បរិស្ថាន និងធនធានទឹក ទេសចរណ៍ ព័ត៌មាន ច្បាប់ និងយុត្តិធម៌ ធនាគារ ការគ្រប់គ្រងរដ្ឋបាលនៅមូលដ្ឋាន ការផ្លាស់ប្ដូរវប្បធម៌និងការផ្លាស់ប្ដូរប្រជាជននិងប្រជាជន។

អង្គប្រជុំបានឯកភាពលើកទឹកចិត្តអាជ្ញាធរនៃបណ្ដាខេត្តជាប់ព្រំដែនវៀតណាម-កម្ពុជា បន្តជួបជុំគ្នានិងផ្លាស់ប្តូរយោបល់គ្នាយ៉ាងហោចណាស់ម្តងក្នុងមួយឆ្នាំ ដើម្បីពិនិត្យឡើងវិញនូវវឌ្ឍនភាពនៃការអនុវត្តលទ្ធផលនៃកិច្ចសហប្រតិបត្តិការក្នុងវិស័យថ្មី ព្រមទាំងដាក់ចេញទិសដៅ ដើម្បីពង្រឹងនិងពង្រីកទំនាក់ទំនងសហប្រតិបត្តិការរវាងអាជ្ញាធរនៃបណ្ដាខេត្តជាប់ព្រំដែននៃប្រទេសទាំងពីរ ដើម្បីលើកកម្ពស់ការអភិវឌ្ឍនៃបណ្ដាខេត្តជាប់ព្រំដែន។

ភាគីទាំងពីរបានឯកភាពគ្នារៀបចំកិច្ចប្រជុំស្ដីពីកិច្ចសហប្រតិបត្តិការ និងអភិវឌ្ឍបណ្ដាខេត្តជាប់ព្រំដែនវៀតណាម-កម្ពុជាលើកទី១៤ ក្នុងឆ្នាំ២០២៦ នៅប្រទេសវៀតណាម៕

បកប្រែដោយ Thanh Cong