ប្រភពធនធានអាណិកជនវៀតណាមនៅក្នុងប្រព័ន្ធអេកូឡូស៊ីធុរកិច្ចបង្កើតថ្មី

អាណិកជនវៀតណាម ជាធនធានដ៏សំខាន់!

សហគមន៍អាណិកជនវៀតណាម កំពុងបង្ហាញពីតួនាទីកាន់តែសំខាន់របស់ខ្លួននៅក្នុងការអភិវឌ្ឍសេដ្ឋកិច្ចសង្គមរបស់ប្រទេសវៀតណាម តាមរយៈធនធានហិរញ្ញវត្ថុ ចំណេះដឹង បច្ចេកវិទ្យា និងបណ្តាញសកល។ ប្រាក់បញ្ញើទៅប្រទេសវៀតណាមពីអាណិកជននៅតែរក្សានៅកម្រិតខ្ពស់ និងមានស្ថិរភាពអស់រយៈពេលជាច្រើនឆ្នាំ។ ដូច្នេះ ចំនួនសរុបនៃប្រាក់បញ្ញើទៅប្រទេសវៀតណាមពីអាណិកជនក្នុងរយៈពេល ១០ ឆ្នាំចុងក្រោយនេះបានឈានដល់ជាង ១៩០ ពាន់លានដុល្លារអាមេរិក នាំឱ្យប្រទេសវៀតណាមស្ថិតក្នុងចំណោមប្រទេសទាំង ១០ ដែលទទួលបានប្រាក់បញ្ញើពីអាណិកជនច្រើនជាងគេបំផុតនៅលើពិភពលោក។ ទីក្រុងហូជីមិញគឺជាតំបន់ដែលទទួលបានប្រាក់បញ្ញើពីអាណិកជនច្រើនជាងគេបំផុតទូទាំងប្រទេស ដែលស្រូបយកចំនួនប្រហែល ៦០% នៃប្រាក់បញ្ញើពីអាណិកជនសរុប ហេតុនោះបានក្លាយជាប្រភពធនធានដ៏សំខាន់នៃដើមទុនបន្ថែមសម្រាប់ការវិនិយោគក្នុងការអភិវឌ្ឍសេដ្ឋកិច្ចសង្គម។ ធនធានអាណិកជនវៀតណាមមិនត្រឹមតែជាប្រាក់បញ្ញើពីអាណិកជនប៉ុណ្ណោះទេ ប៉ុន្តែថែមទាំងចំណេះដឹង បទពិសោធន៍ និងជាពិសេសបណ្តាញហេដ្ឋារចនាសម្ព័ន្ធព័ត៌មានដែលជួយដល់បុគ្គល និងធុរកិច្ចនៅក្នុងប្រព័ន្ធអេកូឡូស៊ីធុរកិច្ចបង្កើតថ្មី។

យោងតាមអ្នកជំនាញ ប្រទេសវៀតណាមឥឡូវនេះបានបង្កើតសមាសធាតុពេញលេញគួរសមនៃប្រព័ន្ធអេកូឡូស៊ីធុរកិច្ចបង្កើតថ្មី៖ ធុរកិច្ចបង្កើតថ្មី មូលនិធិវិនិយោគ កម្មវិធីគាំទ្រ មជ្ឈមណ្ឌលនវានុវត្តន៍ និងការតំរង់ទិសគោលនយោបាយជាតិ។ ចំណុចខ្លាំងលេចធ្លោនៃប្រព័ន្ធអេកូឡូស៊ីធុរកិច្ចបង្កើតថ្មីរបស់វៀតណាមគឺ៖ ទំហំទីផ្សារធំ ចំនួនប្រជាជនវ័យក្មេង និងស្មារតីសហគ្រិនភាពខ្ពស់ រួមជាមួយនឹងការកំណត់វិទ្យាសាស្ត្រ និងបច្ចេកវិទ្យា និងការផ្លាស់ប្តូរឌីជីថលជាសសរស្តម្ភនៃការអភិវឌ្ឍ។ ទោះជាយ៉ាងណាក៏ដោយ បើប្រៀបធៀបទៅនឹងប្រព័ន្ធអេកូឡូស៊ីចាស់ទុំនៅក្នុងប្រទេសអភិវឌ្ឍន៍នៅក្នុងតំបន់ ប្រទេសវៀតណាមនៅតែមានចន្លោះប្រហោងធំៗចំនួនបី៖ ដើមទុនកំណើនមានកំណត់សម្រាប់ការពង្រីក និងអន្តរជាតូបនីយកម្ម; កង្វះប្រព័ន្ធសម្រាប់អភិបាលកិច្ច ការគ្រប់គ្រងហានិភ័យ និងតម្លាភាពហិរញ្ញវត្ថុស្របតាមស្តង់ដារអន្តរជាតិ; ការសម្របសម្រួលរវាងសាកលវិទ្យាល័យ អាជីវកម្ម មូលនិធិវិនិយោគ និងស្ថាប័នគ្រប់គ្រងមិនទាន់រលូននៅឡើយទេ។ បច្ចុប្បន្ននេះ សកម្មភាពចាប់ផ្តើមអាជីវកម្មត្រូវការការគាំទ្រយ៉ាងសំខាន់ មិនត្រឹមតែទាក់ទងនឹងហិរញ្ញវត្ថុប៉ុណ្ណោះទេ ប៉ុន្តែថែមទាំងទាក់ទងនឹងចំណេះដឹង បទពិសោធន៍ និងជំនាញផងដែរ។ អ្នកបញ្ញវន្តវៀតណាមនៅបរទេសគឺជាធនធានដ៏សំខាន់សម្រាប់បំពេញចន្លោះប្រហោងទាំងនេះ និងកសាងប្រទេសវៀតណាមទៅជាប្រទេសចាប់ផ្តើមអាជីវកម្ម។

ទោះជាយ៉ាងណាក៏ដោយ សហគមន៍ចាប់ផ្តើមអាជីវកម្ម និងនវានុវត្តន៍នៅវៀតណាមមិនទាន់បានប្រើប្រាស់ធនធានរបស់ជនជាតិវៀតណាមនៅបរទេសបានប្រសិទ្ធភាពនៅឡើយទេ។ ទន្ទឹមនឹងនេះ សហគមន៍អាណិកជនវៀតណាមនៅតែប្រឈមមុខនឹងឧបសគ្គមួយចំនួននៅពេលត្រឡប់ទៅប្រទេសវៀតណាមវិញដើម្បីរស់នៅ ឬវិនិយោគ។ នៅក្នុងសិក្ខាសាលា "អាណិកជនជាមួយនិងឱកាសវិនិយោគនៅវៀតណាម៖ ការលុបបំបាត់ឧបសគ្គ - ការដោះសោធនធាន" ដែលទើបតែបានប្រារព្ធឡើងនៅទីក្រុងហូជីមិញ ប្រតិភូអញ្ជើញចូលរួមបានកត់សម្គាល់ថា ឧបសគ្គចម្បងៗស្ថិតនៅក្នុងនីតិវិធីរដ្ឋបាលទាក់ទងនឹងការស្នាក់នៅ និងការផ្ទៀងផ្ទាត់អត្តសញ្ញាណ។ នីតិវិធីវិនិយោគនៅតែមានច្រើនជំហាន និងខ្វះការតភ្ជាប់គ្នាទៅវិញទៅមក។ ការលំបាកក្នុងការចូលប្រើប្រព័ន្ធព័ត៌មានច្បាប់ដែលច្បាស់លាស់ និងស៊ីសង្វាក់គ្នា ជាពិសេសទាក់ទងនឹងបទប្បញ្ញត្តិថ្មី...

ប្រតិភូអាណិកជនវៀតណាមចូលរួមសិក្ខាសាលា “ពង្រីកធនធានអាណិកជនវៀតណាម ក្នុងការទាញយកអត្ថប្រយោជន៍ពីសមិទ្ធផលនៃបដិវត្តន៍ឧស្សាហកម្មលើកទី៤ ដើម្បីបម្រើដល់ការអភិវឌ្ឍទីក្រុងហូជីមិញ”

កិច្ចខិតខំប្រឹងប្រែងដើម្បីដោះសោធនធាន

នៅក្នុងបរិបទដែលប្រទេសវៀតណាមកំពុងចូលដល់ដំណាក់កាលថ្មីនៃការអភិវឌ្ឍជាមួយនឹងគោលនយោបាយជាច្រើន ប្រព័ន្ធអេកូឡូស៊ីធុរកិច្ចបង្កើតថ្មីត្រូវបានចាត់ទុកថាជាបណ្តាញដ៏មានប្រសិទ្ធភាពមួយសម្រាប់ស្រូបយកធនធានពីអាណិកជនវៀតណាម។ ដើម្បីប្រែក្លាយដើមទុន ចំណេះដឹង និងបទពិសោធន៍អន្តរជាតិរបស់អាណិកជនវៀតណាម ទៅជាគម្រោងវិនិយោគជាក់ស្តែងនោះ រដ្ឋបានអនុវត្តគោលនយោបាយជាច្រើនដូចជា៖ ការលើកលែងទិដ្ឋាការរយៈពេលវែង ការពង្រីកសិទ្ធិកាន់កាប់លំនៅដ្ឋាន និងទ្រព្យសម្បត្តិស្របច្បាប់ ការបង្កលក្ខណងាយស្រួលសម្រាប់រក្សាសញ្ជាតិ ឬបញ្ជាក់ប្រភពដើមវៀតណាម និងលើកកម្ពស់កម្មវិធីភ្ជាប់អ្នកបញ្ញវន្ត និងសហគ្រិនសកលដើម្បីទាក់ទាញបទពិសោធន៍ផ្ទេរបច្ចេកវិទ្យា និងការគ្រប់គ្រង...

ទីក្រុងហូជីមិញគឺជាតំបន់ដែលទាក់ទាញប្រាក់បញ្ញើពីអាណិកជនច្រើនជាងគេនៅក្នុងប្រទេស ដោយទទួលបានប្រហែល ៩ ទៅ ១០ ពាន់លានដុល្លារអាមេរិកជារៀងរាល់ឆ្នាំ។ ទន្ទឹមនឹងនេះ ប្រព័ន្ធអេកូឡូស៊ីធុរកិច្ចបង្កើតថ្មីរបស់ទីក្រុងហូជីមិញមានធុរកិច្ចប្រមាណ ២,០០០ ដោយផ្តោតលើវិស័យដូចជា បញ្ញាសិប្បនិម្មិត បច្ចេកវិទ្យាហិរញ្ញវត្ថុ ពាណិជ្ជកម្មអេឡិចត្រូនិក និងកសិកម្មបច្ចេកវិទ្យាខ្ពស់។ ទីក្រុងនេះមានគោលបំណងធ្វើឱ្យប្រព័ន្ធអេកូឡូស៊ីនេះមានភាពច្នៃប្រឌិត និងស្ថិតក្នុងចំណោមទីក្រុងទាំង ១០០ ដែលមានថាមពលខ្លាំងបំផុតនៅទូទាំងពិភពលោកនៅឆ្នាំ ២០៣០។

នៅក្រៅប្រទេស អាណិកជនវៀតណាមជាច្រើនក៏តែងតែតាមដានយ៉ាងដិតដល់នូវការអភិវឌ្ឍនៃមាតុភូមិ។ ក្នុងពេលជាមួយគ្នានេះ ពួកគេចង់វិនិយោគ និងចូលរួមចំណែកបទពិសោធន៍ បណ្តាញ និងចំណេះដឹងអន្តរជាតិរបស់ពួកគេទៅក្នុងប្រព័ន្ធអេកូឡូស៊ីធុរកិច្ចបង្កើតថ្មីនៅវៀតណាម។ ក្នុងនាមជាសហគ្រិនវៀតណាមនៅក្រៅប្រទេសដែលកំពុងប្រតិបត្តិការនៅប្រទេសជប៉ុន លោក Phan Xuan Hieu នាយកក្រុមហ៊ុន Akira Japan Joint Stock Company និងជាប្រធានផ្នែកលើកកម្ពស់ពាណិជ្ជកម្ម និងវិនិយោគនៃសមាគមពាណិជ្ជកម្មវៀតណាម នៅប្រទេសជប៉ុន ជឿជាក់ថាដើម្បីទាក់ទាញធនធានពីអាណិកជនវៀតណាម ចូលទៅក្នុងប្រព័ន្ធអេកូឡូស៊ីធុរកិច្ចបង្កើតថ្មី ចាំបាច់ត្រូវផ្លាស់ប្តូរពីផ្នត់គំនិតចលនា ទៅជាផ្នត់គំនិតរៀបចំគោលនយោបាយរយៈពេលវែង។

លោក Phan Xuan Hieu បានលើកឡើងដំណោះស្រាយចំនួនបួនក្រុម៖ ទីមួយ ការកសាងយន្តការច្បាប់ដែលមានស្ថិរភាព និងមានតម្លាភាពសម្រាប់ការវិនិយោគឆ្លងដែន។ អាណិកជនវៀតណាមអាចទទួលយកហានិភ័យទីផ្សារ ប៉ុន្តែស្ថិរភាពគោលនយោបាយគឺមានសារៈសំខាន់ណាស់។ ទីពីរ ការបង្កើតមូលនិធិវិនិយោគរួមគ្នារវាងរដ្ឋ និងអាណិកជនវៀតណាម ប្រការនេះនឹងបង្កើតទំនុកចិត្ត និងចែករំលែកហានិភ័យ ជាពិសេសនៅក្នុងវិស័យបច្ចេកវិទ្យាខ្ពស់ និងនវានុវត្តន៍។ ទីបី ការបង្កើតបណ្តាញអ្នកជំនាញវៀតណាមនៅក្រៅប្រទេសក្នុងតួនាទីជាទីប្រឹក្សាយុទ្ធសាស្ត្រ។ ដូច្នេះ អាណិកជនវៀតណាម មិនត្រឹមតែអាចចូលរួមចំណែកដោយដើមទុនប៉ុណ្ណោះទេ ប៉ុន្តែថែមទាំងចូលរួមក្នុងក្រុមប្រឹក្សាភិបាល ផ្ទេរបច្ចេកវិទ្យា និងចែករំលែកស្តង់ដារអភិបាលកិច្ចអន្តរជាតិផងដែរ។ ទីបួន បង្កើតមជ្ឈមណ្ឌលនវានុវត្តន៍វៀតណាម-អន្តរជាតិ ដើម្បីភ្ជាប់ធុរកិច្ចបង្កើតថ្មីក្នុងស្រុកជាមួយបណ្តាញសកលនៃអាជីវកម្ម និងវិនិយោគិន។ ប្រសិនបើប្រព័ន្ធអេកូឡូស៊ីត្រូវបានធ្វើឱ្យល្អឥតខ្ចោះទាក់ទងនឹងស្ថាប័ន អភិបាលកិច្ច និងការតភ្ជាប់អន្តរជាតិ សហគមន៍អាណិកជនវៀតណាមនឹងក្លាយជាកម្លាំងដ៏សំខាន់មួយនៅក្នុងដំណើរការនេះ៕

បកប្រែដោយ Minh Trung