ព្រឹត្តិការណ៍ប្រវត្តិសាស្ត្រនេះមិនត្រឹមតែបង្ហាញពីការផ្លាស់ប្តូរពីពាណិជ្ជកម្មធម្មតាទៅជាកិច្ចសហប្រតិបត្តិការយុទ្ធសាស្ត្រពហុស្រទាប់ប៉ុណ្ណោះទេ ប៉ុន្តែវាថែមទាំងលើកកម្ពស់ឋានៈរបស់វៀតណាម ដោយផ្លាស់ប្តូរវាពីអ្នកទទួលជំនួយទៅជាដៃគូយុទ្ធសាស្ត្រ ដោយសហការជាមួយសហភាពអឺរ៉ុបដើម្បីបង្កើតកិច្ចសហប្រតិបត្តិការក្នុងទីផ្សារកាន់តែទូលំទូលាយ។

ការប្តេជ្ញាចិត្តរួមគ្នាដើម្បីសន្តិភាព និងវិបុលភាព

សេចក្តីថ្លែងការណ៍រួមស្តីពីការដំឡើងទំនាក់ទំនងវៀតណាម-សហភាពអឺរ៉ុបទៅជាភាពជាដៃគូយុទ្ធសាស្ត្រគ្រប់ជ្រុងជ្រោយត្រូវបានដាក់ចេញក្នុងអំឡុងពេលដំណើរទស្សនកិច្ចថ្មីៗនេះទៅកាន់ប្រទេសវៀតណាមរបស់ លោក Antonio Costa ប្រធានក្រុមប្រឹក្សាអឺរ៉ុប តាមការអញ្ជើញរបស់ លោក Luong Cuong ប្រធានរដ្ឋ។

សេចក្តីថ្លែងការណ៍រួមបានបញ្ជាក់យ៉ាងច្បាស់ថា៖ ការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងសហភាពអឺរ៉ុបគឺផ្អែកលើសមិទ្ធផលលេចធ្លោនៃទំនាក់ទំនងទ្វេភាគីក្នុងរយៈពេល ៣៥ ឆ្នាំកន្លងមក ជាមួយនឹងសក្តានុពលទូលំទូលាយនៃកិច្ចសហប្រតិបត្តិការ និងទំនុកចិត្តយ៉ាងមុតមាំលើអនាគតភ្លឺស្វាងនៃទំនាក់ទំនងទ្វេភាគី ដែលមានគោលបំណងបំពេញតាមសេចក្តីប្រាថ្នារបស់ប្រជាជននៃភាគីទាំងពីរ។ ភាគីទាំងពីរបានបញ្ជាក់ពីសារៈសំខាន់នៃភាពជាដៃគូដែលផ្អែកលើផលប្រយោជន៍រួម និងតម្លៃរួមនៃសន្តិភាព សន្តិសុខ និងវិបុលភាពក្នុងសណ្តាប់ធ្នាប់អន្តរជាតិដែលផ្អែកលើច្បាប់លើមូលដ្ឋានច្បាប់អន្តរជាតិ។

leftcenterrightdel
លោក Luong Cuong ប្រធានរដ្ឋវៀតណាម​ និងលោក Antonio Costa ប្រធានក្រុមប្រឹក្សាអឺរ៉ុប អញ្ជើញចូលរួមកិច្ចពិភាក្សា

លោក Luong Cuong ប្រធានរដ្ឋ បានសង្កត់ធ្ងន់ថា៖ វៀតណាមចាត់ទុកសហភាពអឺរ៉ុបជាដៃគូអាទិភាពកំពូលមួយរបស់ខ្លួននៅក្នុងគោលនយោបាយការបរទេសរបស់ខ្លួន ហើយចង់អភិវឌ្ឍទំនាក់ទំនងស៊ីជម្រៅ និងទូលំទូលាយជាមួយសហភាពអឺរ៉ុប ក៏ដូចជាពង្រឹងទំនាក់ទំនងមិត្តភាព និងកិច្ចសហប្រតិបត្តិការជាបន្តបន្ទាប់ជាមួយប្រទេសជាសមាជិកសហភាពអឺរ៉ុប។ លោក អាន់តូនីញ៉ូ កូស្តា ប្រធានក្រុមប្រឹក្សាអឺរ៉ុប ក៏បានបញ្ជាក់ផងដែរថា សហភាពអឺរ៉ុបចាត់ទុកវៀតណាមជាដៃគូសំខាន់នៅក្នុងតំបន់អាស៊ាន និងក្នុងយុទ្ធសាស្ត្រឥណ្ឌូ-ប៉ាស៊ីហ្វិក ដែលជាដៃគូដែលមានភាពស្រដៀងគ្នាជាមួយសហភាពអឺរ៉ុបក្នុងការគោរពច្បាប់អន្តរជាតិ និងគាំទ្រពាណិជ្ជកម្មសេរី និងសេរីភាពនៃការធ្វើនាវាចរណ៍។

ក្នុងក្របខ័ណ្ឌនៃភាពជាដៃគូយុទ្ធសាស្ត្រគ្រប់ជ្រុងជ្រោយ ភាគីទាំងពីរបន្តពង្រឹងកិច្ចសហប្រតិបត្តិការដើម្បីនាំមកនូវផលប្រយោជន៍ជាក់ស្តែង និងរួមចំណែកដល់សន្តិភាព ស្ថិរភាព កិច្ចសហប្រតិបត្តិការ និងវិបុលភាពនៅក្នុងតំបន់ទាំងពីរ និងពិភពលោក។ ដូច្នេះ ភាគីទាំងពីរនឹងសម្របសម្រួលអនុវត្តខ្លឹមសារនៃសេចក្តីប្រកាសរួម ជាមួយនឹងទិសដៅសំខាន់ៗចំនួនប្រាំមួយរួមមាន៖ កិច្ចសហប្រតិបត្តិការនយោបាយ; ទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ; កិច្ចសហប្រតិបត្តិការសន្តិភាព ការពារជាតិ និងសន្តិសុខ; កិច្ចសហប្រតិបត្តិការវិទ្យាសាស្ត្រ និងបច្ចេកវិទ្យា និងការផ្លាស់ប្តូរប្រជាជនទៅប្រជាជន; កិច្ចសហប្រតិបត្តិការអភិវឌ្ឍន៍ប្រកបដោយចីរភាព និងបរិយាប័ន្ន; និងកិច្ចសហប្រតិបត្តិការក្នុងវិស័យកសិកម្ម សេដ្ឋកិច្ចសមុទ្រ ការអភិរក្សមហាសមុទ្រ និងធ្វើអាជីវកម្មប្រកបដោយចីរភាព។

ក្របខ័ណ្ឌភាពជាដៃគូយុទ្ធសាស្ត្រទូលំទូលាយរវាងវៀតណាម និងសហភាពអឺរ៉ុប បានបញ្ជាក់ពីជំហររបស់វៀតណាមថាជា "តំណភ្ជាប់យុទ្ធសាស្ត្រ" ដែលមិនអាចជំនួសបាននៅក្នុងរចនាសម្ព័ន្ធសន្តិសុខ និងសេដ្ឋកិច្ចថ្មីនៃតំបន់ឥណ្ឌូ-ប៉ាស៊ីហ្វិក។ នេះគឺជាជំហាននិមិត្តរូបដ៏ខ្ពស់មួយដែលបង្ហាញពីទំនុកចិត្តនយោបាយ និងប្រសិទ្ធភាពនៃផលប្រយោជន៍សេដ្ឋកិច្ច ដោយជួយវៀតណាមបំពេញ "ផែនទីការទូតកម្រិតខ្ពស់" របស់ខ្លួន ជាមួយនឹងបណ្តាញទំនាក់ទំនងកម្រិតខ្ពស់ជាមួយមហាអំណាច និងអង្គការតំបន់សំខាន់ៗទាំងអស់របស់ពិភពលោក រួមទាំងសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខអង្គការសហប្រជាជាតិ (P5) ក្រុមប្រទេសឧស្សាហកម្មទាំងប្រាំពីរ (G7) និងក្រុមប្រទេសអភិវឌ្ឍន៍ និងសេដ្ឋកិច្ចកំពុងរីកចម្រើនឈានមុខគេទាំងម្ភៃ (G20)។

ឱកាសរីកចម្រើន ភ្ជាប់នឹងបញ្ហាប្រឈសម

ក្របខ័ណ្ឌថ្មីនៃទំនាក់ទំនងវៀតណាម-សហភាពអឺរ៉ុបមិនត្រឹមតែពង្រីកមាត្រដ្ឋានប៉ុណ្ណោះទេ ថែមទាំងធ្វើឱ្យគុណភាពនៃកិច្ចសហប្រតិបត្តិការកាន់តែស៊ីជម្រៅនៅក្នុងវិស័យយុទ្ធសាស្ត្រផងដែរ។ សម្រាប់វៀតណាម ភាពជាដៃគូយុទ្ធសាស្ត្រទូលំទូលាយជាមួយសហភាពអឺរ៉ុបបង្កើតឱកាសរីកចម្រើនមួយក្នុងការអភិវឌ្ឍ ដែលជួយពង្រឹងតួនាទីរបស់វៀតណាមជាស្ពានតភ្ជាប់ដ៏សំខាន់រវាងសហភាពអឺរ៉ុប និងតំបន់ឥណ្ឌូ-ប៉ាស៊ីហ្វិក។ ទំនុកចិត្តនយោបាយកាន់តែខ្ពស់អាចឱ្យមានកិច្ចសហប្រតិបត្តិការកាន់តែជិតស្និទ្ធរវាងភាគីទាំងពីរនៅក្នុងវេទិកាពហុភាគី និងលើបញ្ហាសកល។

ចំពោះប្រទេសវៀតណាម ខ្លឹមសារនៃភាពជាដៃគូយុទ្ធសាស្ត្រគ្រប់ជ្រុងជ្រោយជាមួយសហភាពអឺរ៉ុប បង្ហាញពីការទទួលស្គាល់ «តម្លៃស្រដៀងគ្នា» ក្នុងការអភិវឌ្ឍប្រកបដោយចីរភាព ដែលបញ្ជាក់ថា វៀតណាមលែងជាប្រទេសកំពុងអភិវឌ្ឍន៍ផលិតកម្មដែលមានតម្លៃទាបទៀតហើយ ប៉ុន្តែត្រូវបានទទួលស្គាល់ដោយសហភាពអឺរ៉ុបថាជាដៃគូដែលមានតួនាទីស្មើគ្នាក្នុងការដោះស្រាយបញ្ហាសកលដូចជា ការប្រែប្រួលអាកាសធាតុ ថាមពលស្អាត និងសន្តិសុខដែនសមុទ្រ។ ប្រធានក្រុមប្រឹក្សាអឺរ៉ុប បានថ្លែងថា ឋានៈរបស់វៀតណាមជាដៃគូយុទ្ធសាស្ត្រគ្រប់ជ្រុងជ្រោយដំបូងគេរបស់សហភាពអឺរ៉ុបនៅក្នុងអាស៊ាន បង្ហាញពីភាពជិតស្និទ្ធ និងចក្ខុវិស័យរួមគ្នានៅក្នុងពិភពលោកដែលមិនអាចទាយទុកជាមុនបាន។

ការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម មិនមែនគ្រាន់តែជាកាយវិការការទូតនោះទេ ប៉ុន្តែជាការគណនាយុទ្ធសាស្ត្រដ៏សំខាន់មួយនៅក្នុងបរិបទនៃភូមិសាស្ត្រនយោបាយអន្តរជាតិដ៏ស្មុគស្មាញ។ ចំពោះសហភាពអឺរ៉ុប វៀតណាមមិនមែនគ្រាន់តែជា «ទីតាំងប្រកួតប្រជែងក្នុងវិស័យពាណិជ្ជកម្ម» នោះទេ ប៉ុន្តែវាក៏ជាការសាកល្បងសមត្ថភាពរបស់អឺរ៉ុបក្នុងការសម្របខ្លួនទៅនឹងសណ្តាប់ធ្នាប់ពិភពលោកពហុប៉ូលថ្មីផងដែរ។ ភាពជោគជ័យក្នុងទំនាក់ទំនងជាមួយវៀតណាម នឹងក្លាយជាកម្លាំងចលករមួយដើម្បីជួយសហភាពអឺរ៉ុបឱ្យជ្រៀតចូលកាន់តែជ្រៅទៅក្នុងតំបន់ឥណ្ឌូ-ប៉ាស៊ីហ្វិក។ សហភាពអឺរ៉ុបកំពុងខិតខំអះអាងតួនាទីរបស់ខ្លួនជាអង្គភាពភូមិសាស្ត្រនយោបាយសកល មិនត្រឹមតតែជាទ្វីបចាស់នោះទេ ខណៈដែលវៀតណាមគឺជាសេដ្ឋកិច្ចស្វាហាប់ដែលមានទីតាំងភូមិសាស្ត្រនយោបាយកណ្តាលនៅអាស៊ីអាគ្នេយ៍ ភាពជាដៃគូយុទ្ធសាស្ត្រជាមួយវៀតណាមផ្តល់ឱ្យសហភាពអឺរ៉ុបនូវដៃគូដែលអាចទុកចិត្តបានដើម្បីបង្កើនឥទ្ធិពលរបស់ខ្លួននៅក្នុងតំបន់ក្នុងបរិបទនៃការប្រកួតប្រជែងជាយុទ្ធសាស្ត្រដ៏ខ្លាំងក្លា។

ការផ្លាស់ប្តូរបៃតង និងការធ្វើបរិវត្តកម្មឌីជីថល គឺជាសសរស្តម្ភថ្មីពីរដ៏សំខាន់នៅក្នុងដំណាក់កាលផ្លាស់ប្តូរនៃកិច្ចសហប្រតិបត្តិការវៀតណាម-សហភាពអឺរ៉ុប។ ជាមួយនឹងធនធានហិរញ្ញវត្ថុ និងបច្ចេកវិទ្យារបស់ខ្លួន ដែលផ្តល់នូវបច្ចេកវិទ្យា និងស្តង់ដារបៃតងឈានមុខគេលើពិភពលោក សហភាពអឺរ៉ុបអាចគាំទ្រវៀតណាមក្នុងការអនុវត្តភាពជាដៃគូសេដ្ឋកិច្ចរួមគ្នាសម្រាប់ការផ្លាស់ប្តូរថាមពលយុត្តិធម៌ (JETP) ការអភិវឌ្ឍហេដ្ឋារចនាសម្ព័ន្ធបៃតង សេដ្ឋកិច្ចរង្វង់ និងបច្ចេកវិទ្យាស៊ីមីកុងដុកទ័រ។ ក្របខ័ណ្ឌភាពជាដៃគូយុទ្ធសាស្ត្រដ៏ទូលំទូលាយអាចត្រូវបានគេមើលឃើញថាជា "លិខិតឆ្លងដែន" សម្រាប់វៀតណាមដើម្បីទទួលបានដើមទុនដែលមានគុណភាពខ្ពស់ពីយុទ្ធសាស្ត្រច្រកទ្វារសកលរបស់សហភាពអឺរ៉ុប ដោយគាំទ្រដល់ការផ្លាស់ប្តូរទៅជាសេដ្ឋកិច្ចឌីជីថល និងបៃតង។ ផ្ទុយទៅវិញ វៀតណាមមានតម្រូវការយ៉ាងខ្លាំងសម្រាប់ថាមពលកកើតឡើងវិញ និងហេដ្ឋារចនាសម្ព័ន្ធប្រកបដោយចីរភាព និងជាទីផ្សារនាំចេញបច្ចេកវិទ្យាបៃតង និងសេវាកម្មហិរញ្ញវត្ថុសម្រាប់សាជីវកម្មសហភាពអឺរ៉ុប។

ទោះជាយ៉ាងណាក៏ដោយ បញ្ហាប្រឈមក្នុងការអនុវត្តភាពជាដៃគូយុទ្ធសាស្ត្រដ៏ទូលំទូលាយរវាងវៀតណាម និងសហភាពអឺរ៉ុបក៏មានសារៈសំខាន់ផងដែរ ជាពិសេសទាក់ទងនឹងស្តង់ដារខ្ពស់របស់សហភាពអឺរ៉ុប គម្លាតនៃកម្រិតអភិវឌ្ឍន៍ ស្ថាប័ន និងហេដ្ឋារចនាសម្ព័ន្ធ។ អ្នកវិភាគចង្អុលបង្ហាញថា រួមជាមួយនឹងឱកាស ក៏មានតម្រូវការតឹងរ៉ឹងទាក់ទងនឹងស្តង់ដារ និងភាពបត់បែនផងដែរ។ សហភាពអឺរ៉ុបកំពុងអនុវត្តបទប្បញ្ញត្តិយ៉ាងតឹងរ៉ឹងដូចជាយន្តការកែតម្រូវព្រំដែនកាបូន បទប្បញ្ញត្តិប្រឆាំងការកាប់បំផ្លាញព្រៃឈើ និងស្តង់ដារស្តីពីការងារ និងសិទ្ធិមនុស្ស។ សហគ្រាសវៀតណាមត្រូវបង្ខំចិត្តសម្របខ្លួនយ៉ាងឆាប់រហ័ស ប្រសិនបើពួកគេមិនចង់ត្រូវបានដកចេញពីទីផ្សារ។ ដើម្បីស្រូបយកដើមទុន និងបច្ចេកវិទ្យាខ្ពស់ពីសហភាពអឺរ៉ុប វៀតណាមត្រូវកែលម្អបរិយាកាសវិនិយោគរបស់ខ្លួនយ៉ាងខ្លាំង កែទម្រង់នីតិវិធីរដ្ឋបាល និងលើកកម្ពស់គុណភាពធនធានមនុស្សរបស់ខ្លួនឱ្យស្របតាមស្តង់ដារអន្តរជាតិ។

បកប្រែដោយ Duy Hoan