លោក To Lam អគ្គលេខាបក្ស និងជាប្រធានរដ្ឋវៀតណាមអញ្ជើញមកដល់ទីក្រុងប៉េកាំង ចាប់ផ្តើមដំណើរទស្សនកិច្ចផ្លូវរដ្ឋនៅចិន

នៅវេលាម៉ោង ៩:១៨ ព្រឹកថ្ងៃទី ១៤ ខែមេសា (ម៉ោងក្នុងតំបន់) យន្តហោះពិសេសដែលដឹកលោក To Lam អគ្គលេខាបក្ស និងជាប្រធានរដ្ឋវៀតណាម  និងលោកជំទាវ រួមជាមួយគណៈប្រតិភូជាន់ខ្ពស់វៀតណាមបានចុះចតនៅអាកាសយានដ្ឋានអន្តរជាតិប៉េកាំង។

លោក To Lam អគ្គលេខាបក្ស និងជាប្រធានរដ្ឋវៀតណាម អញ្ជើញមកដល់អាកាសយានដ្ឋានអន្ដរជាតិប៉េកាំង

អញ្ជើញទទួលស្វាគមន៍លោក To Lam អគ្គលេខាបក្សនិងជាប្រធានរដ្ឋវៀតណាម  និងលោកជំទាវ រួមជាមួយគណៈប្រតិភូជាន់ខ្ពស់វៀតណាមនៅអាកាសយានដ្ឋានអន្ដរជាតិប៉េកាំង មានលោក Yin Li លេខាគណៈកម្មាធិការបក្សទីក្រុងប៉េកាំង, លោក Liu Haixing ប្រធានគណៈទាក់ទងបរទេសមជ្ឈិមបក្សកុម្មុយនិស្តចិន, លោក He Wei ឯកអគ្គរដ្ឋទូតចិនប្រចាំនៅវៀតណាម និងលោក Pham Thanh Binh ឯកអគ្គរដ្ឋទូតវៀតណាមប្រចាំចិន រួមជាមួយកម្មាភិបាល និងបុគ្គលិកនៃស្ថានទូតវៀតណាមប្រចាំចិន រួមទាំងសហគមន៍ជនជាតិវៀតណាមនិងនិស្សិតវៀតណាមដែលកំពុងរស់នៅនិងសិក្សានៅប្រទេសចិន។

ដំណើរទស្សនកិច្ចផ្លូវរដ្ឋទៅកាន់ប្រទេសចិនលើកនេះ របស់លោក To Lam អគ្គលេខាបក្ស និងជាប្រធានរដ្ឋវៀតណាម  និងលោកជំទាវ រួមជាមួយគណៈប្រតិភូជាន់ខ្ពស់វៀតណាមដែលបង្ហាញការចាប់ផ្តើមថ្មីមួយក្នុងទំនាក់ទំនងទ្វេភាគីនៅពេលដែលប្រទេសទាំងពីរឈានចូលដំណាក់កាលអភិវឌ្ឍន៍ថ្មី៖ វៀតណាមឈានចូលយុគសម័យអភិវឌ្ឍន៍ថ្មីបន្ទាប់ពីមហាសន្និបាតលើកទី១៤ របស់បក្សកុម្មុយនិស្តវៀតណាមប្រកបដោយជោគជ័យ  ហើយប្រទេសចិនចាប់ផ្តើមអនុវត្តផែនការអភិវឌ្ឍន៍សេដ្ឋកិច្ចនិងសង្គមរយៈពេល ៥ ឆ្នាំ លើកទី ១៥។

លោក To Lam អគ្គលេខាបក្ស និងជាប្រធានរដ្ឋវៀតណាម និងលោកជំទាវ រួមជាមួយសហគមន៍ជនជាតិវៀតណាម និងនិស្សិតវៀតណាមនៅប្រទេសចិន

ដំណើរទស្សនកិច្ចនេះគឺជាឱកាសដ៏សំខាន់ដើម្បីលើកកម្ពស់ទំនាក់ទំនងជាយុទ្ធសាស្ត្រ និងកំណត់កម្រិតថ្មីសម្រាប់ទំនាក់ទំនងរវាងបក្សទាំងពីរ និងរដ្ឋទាំងពីរ។ ថ្នាក់ដឹកនាំជាន់ខ្ពស់នៃបក្សទាំងពីរ និងរដ្ឋទាំងពីរនឹងរួមគ្នាកំណត់ទិសដៅថ្មី​ និងការអភិវឌ្ឍក្នុងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគនិងទេសចរណ៍ ព្រមទាំងកិច្ចសហប្រតិបត្តិការក្នុងខ្សែសង្វាក់ផ្គត់ផ្គង់ និងខ្សែសង្វាក់ផលិតកម្ម ការអប់រំនិងបណ្តុះបណ្តាល វិទ្យាសាស្ត្រនិងបច្ចេកវិទ្យា ព្រមទាំងខិតខំសម្រេចបានគោលដៅអភិវឌ្ឍន៍ និងសេចក្តីប្រាថ្នារបស់ប្រទេសនីមួយៗ៕

បកប្រែដោយ Pham Diep