បញ្ជាការដ្ឋានយោធភូមិភាគទី៧ អញ្ជើញទៅសួរសុខទុក្ខ និងជូនពរឆ្នាំថ្មីប្រពៃណីជាតិខ្មែរដល់បញ្ជាការដ្ឋានយោធភូមិភាគទី ១ នៃកងយោធពលខេមរភូមិន្ទ

ក្នុងបរិយាកាសដ៏កក់ក្ដៅ និងស្និទ្ធស្នាល តាងនាមឱ្យបញ្ជាការដ្ឋានយោធភូមិភាគទី៧ លោកឧត្តមសេនីយ៍ត្រី Tran Vinh Ngoc ប្រធាននយោបាយនៃបញ្ជាការដ្ឋានយោធភូមិភាគទី៧ បានជូនពរជ័យមង្គលវិបុលសុខ មហាប្រសើរជូនចំពោះថ្នាក់ដឹកនាំបញ្ជាការដ្ឋានយោធភូមិភាគទី១ និងឧត្តមសេនីយ៍ នាយទាហាន នាយទាហានរង និងពលទាហាននៃយោធភូមិភាគទី ១ នៃកងយោធពលខេមរភូមិន្ទ។ លោកឧត្តមសេនីយ៍ត្រី Tran Vinh Ngoc អបអរសាទរចំពោះសមិទ្ធផលសេដ្ឋកិច្ចសង្គមដែលប្រទេសកម្ពុជាសម្រេចបានក្នុងប៉ុន្មានឆ្នាំកន្លងមក។ ក្រោមព្រះរាជកិច្ចដឹកនាំរបស់ព្រះមហាក្សត្រ និងការដឹកនាំដ៏ឈ្លាសវៃរបស់រាជរដ្ឋាភិបាលដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី សេដ្ឋកិច្ច និងសង្គមរបស់កម្ពុជាទទួលបានលទ្ធផលសំខាន់ៗជាច្រើន ហើយការពារជាតិ និងសន្តិសុខនយោបាយត្រូវបានរក្សាស្ថិរភាព។ លទ្ធផលទាំងនេះ មានការរួមចំណែកយ៉ាងសំខាន់ពីយោធភូមិភាគ ១ នៃកងយោធពលខេមរភូមិន្ទ។

លោកឧត្តមសេនីយ៍ត្រី Tran Vinh Ngoc ជូនពរឆ្នាំថ្មីជូនចំពោះលោកឧត្តមសេនីយ៍ទោ លី សុរ៉ារិទ្ធ (រូបថត៖ baoquankhu7.vn)

លោកឧត្តមសេនីយ៍ត្រី Tran Vinh Ngoc ប្រធាននយោបាយនៃបញ្ជាការដ្ឋានយោធភូមិភាគទី៧ បានថ្លែងអំណរគុណចំពោះរាជរដ្ឋាភិបាល និងថ្នាក់ដឹកនាំអង្គភាពនានានៃកងយោធពលខេមរភូមិន្ទដែលបានជួយគាំទ្រយោធភូមិភាគទី ៧ សម្រេចបាននូវរាល់ភារកិច្ចដែលប្រគល់ជូន។

ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ អង្គភាពនានានៃបញ្ជាការដ្ឋានយោធភូមិភាគទី ៧ បានរៀបចំគណៈប្រតិភូជាច្រើនដើម្បីទៅសួរសុខទុក្ខ និងជូនពរឆ្នាំថ្មីដល់អង្គភាពនានារបស់កម្ពុជា ប្រការនេះរួមចំណែកកសាងសាមគ្គីភាព និងទំនាក់ទំនង “អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ និរន្តរភាពយូរអង្វែង” រវាងវៀតណាម និងកម្ពុជា។

លោកឧត្តមសេនីយ៍ត្រី Tran Vinh Ngoc ប្រគល់អំណោយជូនចំពោះបញ្ជាការដ្ឋានយោធភូមិភាគទី១ នៃកងយោធពលខេមរភូមិន្ទក្នុងឱកាសចូលឆ្នាំថ្មីប្រពៃណីជាតិខ្មែរ (រូបថត៖ baoquankhu7.vn)

លោកឧត្តមសេនីយ៍ទោ លី សុរ៉ារិទ្ធ មេបញ្ជាការយោធភូមិភាគទី ១ នៃកងយោធពលខេមរភូមិន្ទ បានថ្លែងអំណរគុណយ៉ាងជ្រាលជ្រៅជូនចំពោះលោកឧត្តមសេនីយ៍ត្រី Tran Vinh Ngoc និងគណៈប្រតិភូ ដែលមកជូនពរដល់ឧត្តមសេនីយ៍ នាយទាហាន នាយទាហានរង និងពលទាហាន ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ ទន្ទឹមនឹងនោះ លោកឧត្តមសេនីយ៍ទោ លី សុរ៉ារិទ្ធ ថ្លែងអំណរគុណចំពោះការជួយគាំទ្រទាំងសម្ភារៈ និងស្មារតីរបស់បញ្ជាការដ្ឋានយោធភូមិភាគទី ៧ នាពេលកន្លងមក។ លោកឧត្តមសេនីយ៍ទោ លី សុរ៉ារិទ្ធ ជូនពរឱ្យចំណងសាមគ្គីភាពរវាងយោធភូមិភាគទី ៧ នៃកងទ័ពប្រជាជនវៀតណាម និងយោធភូមិភាគទី១ នៃកងយោធពលខេមរភូមិន្ទកម្ពុជា កាន់តែល្អប្រសើរ និងរឹងមាំ៕

បកប្រែដោយ Pham Diep