តភ្ជាប់ធុរកិច្ចទេសចរណ៍ខេត្ត Ninh Thuan (ប្រទេសវៀតណាម) និងរដ្ឋ Kerala - ប្រទេសឥណ្ឌា
កប.អនឡាញ - នាព្រឹកថ្ងៃទី ១ ខែមិថុនា គណៈកម្មាធិការប្រជាជនខេត្ត Ninh Thuan បានសហការជាមួយស្ថានអគ្គកុងស៊ុលឥណ្ឌាប្រចាំទីក្រុងហូជីមិញ រៀបចំកិច្ចប្រជុំតភ្ជាប់ធុរកិច្ចទេសចរណ៍ខេត្ត Ninh Thuan និងរដ្ឋ Kerala (ប្រទេសឥណ្ឌា) ដោយមានការចូលរួមពីប្រតិភូចំនួន ៧០ នាក់ ដែលតំណាងស្ថាប័នមានសមត្ថកិច្ច ធុរកិច្ចទេសចរណ៍ និងប្រព័ន្ធផ្សព្វផ្សាយនៃមូលដ្ឋានទាំងពីរ។
នៅក្នុងកិច្ចប្រជុំ ប្រតិភូបានផ្លាស់ប្តូរព័ត៌មានអំពីសក្តានុពល ផលិតផលទេសចរណ៍របស់រដ្ឋ Kerala និងផលិតផលទេសចរណ៍មានប្រៀបខ្លាំង ព្រមទាំងបេតិកភណ្ឌធម្មជាតិ និងវប្បធម៌ពិសេសរបស់ខេត្ត Ninh Thuan ដែលត្រូវបានទទួលស្គាល់ដោយ UNESCO។
លោក Neelkanth Pararath ស្ថាបនិកក្រុមហ៊ុន WebCRSTravel ប្រធានគណៈប្រតិភូធុរកិច្ចទេសចរណ៍ឥណ្ឌាបានវាយតម្លៃថា Ninh Thuan មានទេសភាពដ៏ស្រស់ស្អាត និងមានសក្តានុពលដើម្បីអភិវឌ្ឍទេសចរណ៍។ ឱកាសសហប្រតិបត្តិការរវាងធុរកិច្ច និងទីផ្សារទេសចរណ៍នៃមូលដ្ឋានទាំងពីរកាន់តែរីកចម្រើន ខណៈពេលនេះមានជើងហោះហើរត្រង់ពីប្រទេសឥណ្ឌាទៅកាន់មូលដ្ឋាននានារបស់វៀតណាមដោយចំណាយពេលហោះហើរត្រឹមតែ ៥ ម៉ោងប៉ុណ្ណោះ។
លោក Neelkanth Pararath បានចាត់ទុកថា ធុរកិច្ចសេវាកម្មទេសចរណ៍វៀតណាមត្រូវផ្តល់កន្លែងស្នាក់នៅល្អ និងសកម្មភាពពិសោធន៍សម្បូរបែប ជាពិសេសមានមុខម្ហូបសមស្របតាមប្រពៃណីឥណ្ឌា។ មូលដ្ឋានក៏ត្រូវមានព័ត៌មានអំពីគោលដៅទេសចរណ៍ជាភាសាអង់គ្លេស និងភាសាឥណ្ឌាសម្រាប់ភ្ញៀវទេសចរស្វែងយល់...
លោក Nguyen Long Bien អនុប្រធានគណៈកម្មាធិការប្រជាជនខេត្ត Ninh Thuan បានចាត់ទុកថា កិច្ចប្រជុំតភ្ជាប់ធុរកិច្ចនៃមូលដ្ឋានទាំងពីរជាព្រឹត្តិការណ៍សំខាន់ដើម្បីបង្ហាញសក្តានុពល គុណសម្បត្តិ និងគោលនយោបាយទាក់ទាញវិនិយោគ និងភ្ញៀវទេសចរ។ ទន្ទឹមនឹងនោះ ព្រឹតិការណ៍នេះក៏បង្កើតឱកាសសម្រាប់ការតភ្ជាប់ និងកិច្ចសហប្រតិបត្តិការរវាងធុរកិច្ចនៃមូលដ្ឋានទាំងពីរផងដែរ។
ថ្នាក់ដឹកនាំគណៈកម្មាធិការប្រជាជនខេត្ត Ninh Thuan បានឲ្យដឹងថា ខេត្តនឹងបន្តធ្វើឲ្យប្រសើរឡើងថែមទៀតនូវបរិយាកាសវិនិយោគ ផ្តោតលើការកៀរគរធនធានដើម្បីវិនិយោគលើហេដ្ឋារចនាសម្ព័ន្ធទេសចរណ៍ ជាពិសេសហេដ្ឋារចនាសម្ព័ន្ធដឹកជញ្ជូនតភ្ជាប់ទៅកាន់មណ្ឌលទេសចរណ៍ និងគោលដៅទេសចរណ៍នានា បង្កើនសុវត្ថិភាព សន្តិសុខសម្រាប់ភ្ញៀវទេសចរ ការពារបរិស្ថាន និងជំរុញការផ្សព្វផ្សាយទេសចរណ៍។ ទន្ទឹមនឹងនោះ រក្សា និងលើកកម្ពស់តម្លៃវប្បធម៌នៅមូលដ្ឋាន លើកកំពស់គុណភាពបណ្តុះបណ្តាលធនធានមនុស្សទេសចរណ៍ និងកសាងខេត្ត Ninh Thuan ក្លាយជាគោលដៅទេសចរណ៍ប្រកបដោយសុវត្ថិភាព និងមិត្តភាព។
ក្នុងឱកាសនេះ តំណាងខេត្ត Ninh Thuan និងស្ថានអគ្គកុងស៊ុលឥណ្ឌាប្រចាំទីក្រុងហូជីមិញបានធ្វើជាសាក្សីក្នុងពិធីចុះហត្ថលេខាលើអនុស្សរណៈយោគយល់គ្នា (MOU) រវាងក្រុមហ៊ុន WebCRSTravel របស់ឥណ្ឌា និងសមាគមទេសចរណ៍ខេត្ត Ninh Thuan និង Hoan My Resort។ នេះជាជំហានសំខាន់មួយដែលបើកឱកាសអភិវឌ្ឍន៍វិស័យទេសចរណ៍សម្រាប់អង្គភាពទេសចរណ៍ និងមូលដ្ឋានចំនួនពីរ៕
បកប្រែដោយ Thanh Cong