យោងតាម “ការស្ទាបស្ទង់មតិផ្លូវចិត្តធុរកិច្ច EU-ASEAN” លើកទី ១១ ដែលទើបតែចេញផ្សាយ ៧៣% នៃធុរកិច្ចអ៊ឺរ៉ុបបានឲ្យដឹងថា តំបន់នេះកាន់តែមានសារៈសំខាន់ចំពោះប្រាក់ចំណូលសកលរបស់ពួកគេក្នុងរយៈពេលពីរឆ្នាំកន្លងមក។ គួរកត់សម្គាល់ថា សម្រាប់ក្រុមហ៊ុនដែលកំពុងស្វែងរកការធ្វើបរិវត្តកម្មខ្សែសង្វាក់ផ្គត់ផ្គង់ដើម្បីចៀសវាងការយកពន្ធ សមាគមប្រជាជាតិអាស៊ីអាគ្នេយ៍ (អាស៊ាន) គឺជាជម្រើសកំពូល។
ភាពទាក់ទាញរបស់អាស៊ានមិនត្រឹមតែនៅក្នុងប្រទេសដែលមានសក្តានុពលដូចជា វៀតណាម ឥណ្ឌូនេស៊ី ម៉ាឡេស៊ី និងថៃប៉ុណ្ណោះទេ ថែមទាំងនៅក្នុងភាពសម្បូរបែបនៃទីផ្សារទៀតផង ដែលជួយបង្កើតភាពធន់ខ្ពស់ចំពោះភាពតក់ស្លុតពីខាងក្រៅ។ ភាពធន់គឺសំខាន់ណាស់។ ពីផលប៉ះពាល់នៃការរាតត្បាតនៃជំងឺកូវីដ-១៩ រហូតដល់ការដំឡើងពន្ធចុងក្រោយបង្អស់របស់សហរដ្ឋអាមេរិក ព្រឹត្តិការណ៍ទាំងនេះបានក្លាយទៅជាការកត់សម្គាល់យ៉ាងច្បាស់អំពីភាពផុយស្រួយនៃខ្សែសង្វាក់ផ្គត់ផ្គង់សកល។ សម្រាប់ធុរកិច្ចរបស់សហភាពអឺរ៉ុប (EU) សំណួរគឺលែងជាបញ្ហាថាតើអាស៊ានមានសារៈសំខាន់ឬអត់ ប៉ុន្តែផ្ទុយទៅវិញ តើការចូលរួមរបស់ពួកគេជាមួយអាស៊ានគួរតែស៊ីជម្រៅប៉ុណ្ណា។
    |
 |
|
ផលិតផលដេរសម្រាប់នាំចេញទៅកាន់ទីផ្សារសហរដ្ឋអាមេរិក និងសហភាពអឺរ៉ុប (រូបថត៖ vnanet.vn) |
* ផលប្រយោជន៍រួម និងការទាក់ទាញទ្វេភាគី
ភាពទាក់ទាញរបស់អាស៊ានគឺអាចយល់បាន។ ជាមួយនឹងចំនួនប្រជាជនច្រើនជាង ៦៧០ លាននាក់ និងសេដ្ឋកិច្ចដែលព្យាករណ៍ថានឹងធំជាងគេទី ៤ របស់ពិភពលោកនៅឆ្នាំ ២០៣០ តំបន់នេះមានធាតុផ្សំទាំងអស់ដែលអ្នកវិនិយោគកំពុងស្វែងរក៖ ចំនួនប្រជាជនវ័យក្មេង ការកើនឡើងនៃការប្រើប្រាស់វណ្ណៈកណ្តាល នគរូបនីយកម្មយ៉ាងឆាប់រហ័ស និងកំណែទម្រង់សេដ្ឋកិច្ចរឹងមាំ។
បរិបទភូមិសាស្ត្រនយោបាយបន្ថែមតម្លៃអាស៊ាន។ ខណៈពេលដែលសហរដ្ឋអាមេរិកបានបង្កើនវិធានការដើម្បីបង្អាក់ពាណិជ្ជកម្ម ប្រទេសចិនកំពុងជំរុញលើកកម្ពស់កិច្ចព្រមព្រៀងពាណិជ្ជកម្មសេរីជាមួយអាស៊ាន (ACFTA 3.0) ដែលត្រូវបានរំពឹងថានឹងចុះហត្ថលេខាដោយថ្នាក់ដឹកនាំនៅក្នុងខែតុលា។
ចំពេលការប្រកួតប្រជែងអំណាចរវាងមហាអំណាច អាទិភាពរបស់អាស៊ានតែងតែរក្សាតុល្យភាពយុទ្ធសាស្ត្រ និងចៀសវាងការជ្រើសរើសភាគី។ នៅក្នុងការស្ទង់មតិមួយដែលធ្វើឡើងដោយវិទ្យាស្ថានស្រាវជ្រាវ ISEAS-Yusof Ishak សហភាពអឺរ៉ុបតែងតែជា "របាំងការពារហានិភ័យ" ត្រូវបានជ្រើសរើសចំពោះអស្ថិរភាពដែលកើតចេញពីការប្រកួតប្រជែងរវាងសហរដ្ឋអាមេរិក និងចិន។
រីឯអឺរ៉ុបក៏មានភាពទាក់ទាញយ៉ាងច្បាស់លាស់ផងដែរ។ តំបន់នេះគាំទ្រដល់សណ្តាប់ធ្នាប់ពាណិជ្ជកម្មពហុភាគីដែលផ្អែកលើច្បាប់ មានកេរ្តិ៍ឈ្មោះសម្រាប់ភាពស៊ីសង្វាក់គ្នា គួរឲ្យជឿទុកចិត្ត និងដើរតួនាទីត្រួសត្រាយក្នុងការអភិវឌ្ឍសេដ្ឋកិច្ចប្រកបដោយចីរភាព។ សំខាន់ជាងនេះទៅទៀត ការចូលរួមកាន់តែស៊ីជម្រៅរបស់សហភាពអឺរ៉ុបនៅក្នុងតំបន់អាស៊ីអាគ្នេយ៍នឹងមិនត្រឹមតែផ្តល់ផលប្រយោជន៍ដល់អង្គភាពអាជីវកម្មអឺរ៉ុបប៉ុណ្ណោះទេ ថែមទាំងជំរុញអាទិភាពផ្ទាល់ខ្លួនរបស់អាស៊ានទៀតផង ដូចជាការពង្រឹងភាពធន់នៃខ្សែសង្វាក់ផ្គត់ផ្គង់ ការគាំទ្រសេដ្ឋកិច្ចឌីជីថល និងការអនុវត្តកិច្ចសន្យាប្រកបដោយនិរន្តរភាព។
ទោះយ៉ាងណាក៏ដោយ សហគមន៍ធុរកិច្ចជឿថា វត្តមានរបស់ EU មិនគ្រប់គ្រាន់ទេ។ ជិត ៨០% នៃធុរកិច្ចឆ្លើយសំណួរមានអារម្មណ៍ថា ពួកគេកំពុងជួបការលំបាកបើធៀបនឹងដៃគូប្រកួតប្រជែងមកពីប្រទេសជប៉ុន កូរ៉េខាងត្បូង ចិន និងអូស្ត្រាលី ដែលជាប្រទេសដែលមានកិច្ចព្រមព្រៀងពាណិជ្ជកម្មសេរី (FTAs) ទូទាំងអាស៊ាន។
* ហេតុអ្វី FTA អន្តរតំបន់គឺជាចាំបាច់?
មានវឌ្ឍនភាពគួរឱ្យកត់សម្គាល់នៅកម្រិតទ្វេភាគីរវាងសេដ្ឋកិច្ចអាស៊ីអាគ្នេយ៍ និងសហភាពអឺរ៉ុប។ FTA របស់ EU-ឥណ្ឌូនេស៊ី ត្រូវបានបញ្ចប់នៅថ្ងៃទី ២៣ ខែកញ្ញា បន្ទាប់ពីការចរចាជិតមួយទសវត្សរ៍ ដោយបំពេញបន្ថែមលើ FTAs ដែលចូលជាធរមានរវាងប្លុកនេះ ជាមួយសិង្ហបុរី និងវៀតណាម។ ម៉ាឡេស៊ី ថៃ និងហ្វីលីពីនក៏បានបន្តការចរចាជាមួយសហភាពអឺរ៉ុបផងដែរ។
ទោះជាយ៉ាងណា កិច្ចខិតខំប្រឹងប្រែងទាំងនេះនៅតែបែកខ្ញែក។ ជាមួយនឹងការប្រមូលផ្តុំនៃកិច្ចព្រមព្រៀងទ្វេភាគីជាជាងកិច្ចព្រមព្រៀងប្លុកមួយទៅប្លុកមួយ អឺរ៉ុបមានហានិភ័យត្រូវបានគេមើលឃើញថាជា "ដៃគូលំដាប់ទីពីរ" - មានប្រយោជន៍ ប៉ុន្តែមិនអាចខ្វះបាន។
ដូច្នេះ ការជម្រុញ FTA រវាងសហភាពអឺរ៉ុប-អាស៊ាន គឺចាំបាច់។ កិច្ចព្រមព្រៀងបែបនេះនឹងបើកទ្វារចូលទៅកាន់ទីផ្សារទាំងមូល ដែលអនុញ្ញាតឱ្យក្រុមហ៊ុនអឺរ៉ុបពង្រីកកាន់តែមានប្រសិទ្ធភាពនៅទូទាំងអាស៊ីអាគ្នេយ៍។ ភាគីក្រុមហ៊ុនអាស៊ានក៏អាចចូលទៅក្នុងទីផ្សារអ្នកប្រើប្រាស់ដ៏ធំបំផុតមួយរបស់ពិភពលោកផងដែរ។ FTA អន្តរតំបន់មួយក៏នឹងកាត់បន្ថយ "ការកកិត" នៅក្នុងខ្សែសង្វាក់ផ្គត់ផ្គង់ដោយការចុះសម្រុងគ្នានឹងស្តង់ដារបទប្បញ្ញត្តិ។
សម្រាប់ភាគីអឺរ៉ុប ការរាំងស្ទះនៃខ្សែសង្វាក់ផ្គត់ផ្គង់ និងការប្រណាំងដើម្បីដឹកនាំរលកនៃកំណើនប្រកបដោយនិរន្តរភាព បង្កើតកម្លាំងចលករថ្មី សម្រាប់សហភាពអឺរ៉ុបជំនះឧបសគ្គកន្លងមក។
សរុបមក លក្ខខណ្ឌបច្ចុប្បន្ននេះហាក់ដូចជាអំណោយផលជាងពេលណាទាំងអស់សម្រាប់កិច្ចព្រមព្រៀងជាប្រវត្តិសាស្ត្ររវាងតំបន់សេដ្ឋកិច្ចទាំងពីរនេះ៕
បកប្រែដោយ Huyen Trang