អាស៊ានឯកភាពខ្ពស់ក្នុងបណ្តាបញ្ហាអាទិភាពជាយុទ្ធសាស្ត្រ

លោក កៅ គឹមហួន អគ្គលេខាធិការអាស៊ាន នៅក្នុងសន្និសីទសារព័ត៌មាន (រូបថត៖ vnanet.vn)

មានប្រសាសន៍នៅក្នុងកិច្ចប្រជុំនោះ លោកអគ្គលេខាធិការអាស៊ាន បានថ្លែងថា ប្រធានបទអាស៊ានឆ្នាំនេះ «រួមគ្នាតម្រង់ទិសអនាគត» ឆ្លុះបញ្ចាំងពីសេចក្តីប្រាថ្នារបស់តំបន់ និងជាស្ពានតភ្ជាប់ដ៏សំខាន់មួយ ខណៈដែលអាស៊ានកំពុងផ្លាស់ប្តូរទៅកាន់យុគសម័យថ្មីសម្រាប់សហគមន៍។ លោក កៅ គឹមហួន បានថ្លែងថា កិច្ចប្រជុំរដ្ឋមន្ត្រីការបរទេសអាស៊ានដែលទើបបញ្ចប់នាពេលថ្មីៗនេះ នៅទីក្រុងសេប៊ូ ប្រទេសហ្វីលីពីន ដោយសម្រេចបាននូវការឯកភាពខ្ពស់លើបញ្ញាអាទិភាពជាយុទ្ធសាស្ត្រ ដោយមានគោលបំណងពង្រឹងសាមគ្គីភាពផ្ទៃក្នុង និងបង្កើនតួនាទីជាមជ្ឈភាពរបស់អាស៊ាននៅក្នុងបរិបទតំបន់ និងសកលលោកមានការប្រែប្រួលជាច្រើន។ កិច្ចប្រជុំនេះបានផ្ញើសារសកម្មភាពមួយស្តីពីការពង្រឹងសាមគ្គីភាព ការសម្របសម្រួល និងការរួមគ្នាដោះស្រាយបញ្ហាប្រឈមរបស់តំបន់នៅក្នុងពិភពលោកមានការប្រែប្រួលជាច្រើន។

លោក កៅ គឹមហួន អគ្គលេខាធិការ បានសង្កត់ធ្ងន់ថា ប្រទេសហ្វីលីពីន ក្នុងនាមជាប្រធានអាស៊ាននៅឆ្នាំ២០២៦ កំពុងខិតខំពង្រឹងតួនាទីមជ្ឈភាពរបស់អាស៊ាន ដោយការលើកកម្ពស់ទំនុកចិត្តជាយុទ្ធសាស្ត្រតាមរយៈការសន្ទនាប្រកបដោយចីរភាព និងការប្រកាន់ខ្ជាប់នូវច្បាប់អន្តរជាតិ។ នៅឆ្នាំនេះ អាទិភាពរបស់ប្រទេសហ្វីលីពីនផ្តោតលើសសរស្តម្ភសំខាន់ៗចំនួនបីគឺ៖ សន្តិភាព និងសន្តិសុខ ត្រូវបានផ្តល់អាទិភាពចម្បង រួមទាំងការលើកកម្ពស់កិច្ចសហប្រតិបត្តិការនាវាចរណ៍ និងការប្រយុទ្ធប្រឆាំងនឹងឧក្រិដ្ឋកម្មអន្តរជាតិ។ សសរស្តម្ភទីពីរគឺការលើកកម្ពស់សេដ្ឋកិច្ចរបស់ប្លុក ជាមួយនឹងគោលដៅគឺវិបុលភាព - សមាហរណកម្មសេដ្ឋកិច្ច ផ្តោតលើគោលដៅអាទិភាព រួមទាំងការពង្រីកក្របខ័ណ្ឌនានានៃសហគមន៍សេដ្ឋកិច្ចអាស៊ាន ដូចជាកិច្ចព្រមព្រៀងពាណិជ្ជកម្មទំនិញអាស៊ាន (ATIGA) យន្តការច្រកទ្វារអាស៊ានតែមួយ និងកិច្ចសហប្រតិបត្តិការសេដ្ឋកិច្ចឌីជីថល ដើម្បីលើកកម្ពស់ការតភ្ជាប់ទីផ្សារ ការវិនិយោគ និងកំណើនក្នុងអាស៊ាន។ សសរស្តម្ភទីបីគឺ សង្គម-វប្បធម៌ អាស៊ាននឹងផ្តោតលើបញ្ហាទាក់ទងនឹងការផ្តល់អំណាចដល់ប្រជាជន ជាពិសេសការរួមបញ្ចូលគ្នាជាប្រព័ន្ធនៃបញ្ញាសិប្បនិម្មិត (AI) បញ្ហាយុវជន និងការការពារពលករចំណាកស្រុកជាដើម។ លោក កៅ គឹមហួន បានសង្កត់ធ្ងន់ថា ស្នូលនៃសកម្មភាពអាស៊ានគឺ "រួមគ្នាតម្រង់ទិសអនាគតនៃនាវាមួយដែលយើងទាំងអស់គ្នាកំពុងនៅលើនាវានោះ"។

លោក កៅ គឹមហួន អគ្គលេខាធិការអាស៊ាន ប្រកាសលទ្ធផលនៃកិច្ចប្រជុំរដ្ឋមន្ត្រីអាស៊ាន (រូបថត៖ vnanet.vn)

លោក កៅ គឹមហួន អគ្គលេខាធិការអាស៊ាន ក៏បានសង្កត់ធ្ងន់ទៅលើបញ្ហាមួយចំនួនទាក់ទងនឹងការលើកកម្ពស់កិច្ចសហប្រតិបត្តិការ និងការតភ្ជាប់ផ្ទៃក្នុង បញ្ហាប្រឈមសន្តិសុខក្នុងតំបន់ និងសកលលោកដែលប៉ះពាល់ដល់អាស៊ាន រួមទាំងការបញ្ជាក់ជាថ្មីនូវចំណុចឯកភាពគ្នាទាំងប្រាំ (5PC) ជាក្របខ័ណ្ឌសំខាន់សម្រាប់ដោះស្រាយវិបត្តិនៅមីយ៉ាន់ម៉ា បណ្តាវិធានការសន្តិភាពរវាងកម្ពុជា និងថៃ និងបញ្ហាសមុទ្រខាងកើត។

លោកអគ្គលេខាធិការអាស៊ាន បានបញ្ជាក់ថា ដោយប្រកាន់ខ្ជាប់នូវចក្ខុវិស័យអាស៊ានស្តីពីឥណ្ឌូ-ប៉ាស៊ីហ្វិក (AOIP) និងចក្ខុវិស័យសហគមន៍អាស៊ានឆ្នាំ២០៤៥ អាស៊ានមានគោលបំណងពង្រឹងស្ថាបត្យកម្មតំបន់មួយដែលផ្អែកលើច្បាប់ មានសមត្ថភាពស្តារឡើងវិញ និងឆ្លើយតបទៅនឹងបញ្ហាប្រឈមភូមិសាស្ត្រនយោបាយដែលកំពុងលេចចេញ តាមរយៈកិច្ចសហប្រតិបត្តិការយុទ្ធសាស្ត្រដែលផ្តល់ផលប្រយោជន៍ទៅវិញទៅមក។

លោក កៅ គឹមហួន អគ្គលេខាធិការអាស៊ាន បានចែករំលែកថា ដោយចូលដល់ឆ្នាំទីបួននៃការកាន់តំណែងរបស់លោក លោកនៅតែផ្តោតលើការធានាការផ្លាស់ប្តូរដោយជោគជ័យពីចក្ខុវិស័យសហគមន៍អាស៊ានឆ្នាំ២០២៥ ទៅជាការចាប់ផ្តើមនៃ “អាស៊ានឆ្នាំ២០៤៥៖ អនាគតរួមរបស់យើង” ជាពិសេសដោយសារឆ្នាំនេះ គឺជាខួបលើកទី៥០ នៃសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍ (TAC) - ជាមូលដ្ឋានគ្រឹះនៃសន្តិភាពក្នុងតំបន់៕

បកប្រែដោយ Duy Hoan