លើកកម្ពស់កំណើនសេដ្ឋកិច្ច និងការធ្វើសមាហរណកម្មក្នុងអាស៊ាន

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ ក្នុងកិច្ចប្រជុំ​ (រូ​បថត៖ vnanet.vn)

ថ្លែងក្នុងពិធីនៅថ្ងៃទី៤ ខែមីនា ឆ្នាំ២០២៦  សម្តេចបវធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ ដើរតួជាវេទិកាសំខាន់មួយរបស់រាជរដ្ឋាភិបាល ដើម្បីលើកទឹកចិត្តដល់ការចូលរួមរបស់វិស័យឯកជនកាន់តែច្រើននៅក្នុងកំណើនសេដ្ឋកិច្ចរបស់ប្រទេសកម្ពុជា។

សម្តេចធីបតី បានគូសបញ្ជាក់ថា ប្រទេសកម្ពុជាបានលើកកម្ពស់យ៉ាងខ្លាំងនូវកំណើនដែលជំរុញដោយនវានុវត្តន៍ ដើម្បីបង្កើនភាពប្រកួតប្រជែងទាំងថ្នាក់ជាតិ និងថ្នាក់តំបន់ នៅក្នុងពេលសេដ្ឋកិច្ចពិភពលោក ផ្តោតលើឌីជីថល និងនិរន្តរភាពកាន់តែខ្លាំងឡើង។

សម្តេចធីបតី មានប្រសាសន៍ថា ៖ «ប្រទេសកម្ពុជាបានឱបក្រសោបគំរូនៃការបើកចំហរជាយុទ្ធសាស្ត្រ ជាមជ្ឈមណ្ឌលឌីជីថល និងឧស្សាហកម្មដែលកំពុងរីកចម្រើននៅក្នុងតំបន់អាស៊ាន»។

សម្តេចធិបតី នាយករដ្ឋមន្ត្រី ក៏បានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំរបស់កម្ពុជាចំពោះដំណើររបស់ខ្លួនឆ្ពោះទៅរកឋានៈជាប្រទេសមានចំណូលខ្ពស់ ដោយឈរលើនិរន្តរភាព នវានុវត្តន៍ និងការធ្វើសមាហរណកម្មតំបន់កាន់តែស៊ីជម្រៅ។

ប្រតិភូអញ្ជើញចូលរួមកិច្ចប្រជុំ​ (រូប​ថត៖ vnanet.vn)

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា បានមានប្រសាសន៍ថា កិច្ចប្រជុំកំពូលនេះឆ្លុះបញ្ចាំងពីភាពជាដៃគូដ៏រឹងមាំ និងយូរអង្វែងរវាងសភាពាណិជ្ជកម្មកម្ពុជា និងអាស៊ាន និងដៃគូនៅទូទាំងសភាពាណិជ្ជកម្មអន្តរជាតិ និងសមាគមពាណិជ្ជកម្ម។

អ្នកឧកញ៉ា គិត ម៉េង បានកត់សម្គាល់ថា សេដ្ឋកិច្ចពិភពលោកបច្ចុប្បន្នកំពុងប្រឈមមុខនឹងបញ្ហាប្រឈមសំខាន់ៗ រួមទាំងការប្រកួតប្រជែងជាយុទ្ធសាស្ត្រក្នុងចំណោមមហាអំណាចធំៗ រលកថ្មីៗនៃវិធានការពន្ធឯកតោភាគី និងសកម្មភាពសងសឹក ក៏ដូចជាការកើនឡើងនៃជម្លោះ ដែលបានប៉ះពាល់ដោយផ្ទាល់ដល់ទស្សនវិស័យកំណើននៅក្នុងអាស៊ាន និងកម្ពុជា។

នៅក្នុងបរិយាកាសនេះ អ្នកឧកញ៉ា គិត ម៉េង បានសង្កត់ធ្ងន់ថា ចំណុចខ្លាំងរបស់អាស៊ានមិនមែនស្ថិតនៅក្នុងការជ្រើសរើសភាគីនោះទេ ប៉ុន្តែស្ថិតនៅក្នុងការរក្សាភាពបើកចំហអព្យាក្រឹតភាព និងចំណុចកណ្តាល។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា មានប្រសាសន៍​ក្នុងកិច្ចប្រជុំ (រូប​ថត៖​ vnanet.vn)

អ្នកឧកញ៉ា មានប្រសាសន៍ថា ៖«ភារកិច្ចរួមរបស់យើងគឺរក្សាអាស៊ានជាកម្លាំងរួម ដែលជាកម្លាំងមួយ ជំរុញកិច្ចសន្ទនា រក្សាការតភ្ជាប់ទីផ្សារ និងធានាថាកិច្ចសហប្រតិបត្តិការសេដ្ឋកិច្ចនៅតែត្រូវបានគ្រប់គ្រងដោយយុត្តិធម៌ តម្លាភាព និងការគោរពគ្នាទៅវិញទៅមក»។

ទោះបីជាមានឧបសគ្គសកលក៏ដោយ អ្នកឧកញ៉ា គិត ម៉េង បានបន្ថែមថា អាស៊ាន និងកម្ពុជានៅតែបន្តមានភាពធន់ ថាមវន្ត និងឱកាស។ អ្នកឧកញ៉ា បានសង្កត់ធ្ងន់ថា «ការណ៍នេះនឹងមិនកើតឡើងដោយចៃដន្យទេ។ វានឹងជាលទ្ធផលនៃការជ្រើសរើសគោលនយោបាយដោយមានកិច្ចសហប្រតិបត្តិការក្នុងតំបន់ដ៏រឹងមាំ និងការចូលរួមប្រកបដោយចីរភាពពីវិស័យឯកជន»។

កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ ដែលប្រារព្ធឡើងក្រោមប្រធានបទ “ការផ្លាស់ប្តូរអាស៊ាន៖ នវានុវត្តន៍ សមាហរណកម្ម និងការវិវត្តន៍ឧស្សាហកម្ម” ត្រូវបានរៀបចំឡើងដោយសហការជាមួយសភាពាណិជ្ជកម្មអន្តរជាតិ និងសមាគមអាជីវកម្មផ្សេងៗនៅក្នុងប្រទេសកម្ពុជា និងនៅទូទាំងរដ្ឋសមាជិកអាស៊ាន។

អ្នកចូលរួមរួមមានមន្ត្រីរដ្ឋាភិបាលជាន់ខ្ពស់ ឯកអគ្គរដ្ឋទូត តំណាងស្ថាប័នសំខាន់ៗក្នុងតំបន់ សមាជិក ASEAN-BAC ក្រុមហ៊ុនអន្តរជាតិឈានមុខគេដែលកំពុងប្រតិបត្តិការនៅក្នុងប្រទេសកម្ពុជា និងទីផ្សារអាស៊ានដ៏ទូលំទូលាយ ក៏ដូចជាអ្នកជំនាញឧស្សាហកម្មផងដែរ៕

បកប្រែដោយ Duy Hoan