កូរ៉េខាងត្បូងជំរុញកិច្ចសហប្រតិបត្តិការវិស័យសាធារណៈ និងឯកជន និងគាំទ្រការនាំចេញផលិតផលទៅកាន់វៀតណាម
កប.អនឡាញ - នាថ្ងៃទី ១០ ខែកក្កដា ក្រសួងសហគ្រាសធុនតូច និងមធ្យម និងចាប់ផ្ដើមអាជីវកម្មរបស់កូរ៉េខាងត្បូង បានចុះហត្ថលេខាលើកិច្ចព្រមព្រៀងសហប្រតិបត្តិការជាមួយ Lotte Mart និង Lotte Global Logistics នៅទីក្រុងសេអ៊ូល ដើម្បីជួយគាំទ្រសហគ្រាសធុនតូច និងមធ្យមរបស់កូរ៉េខាងត្បូងដែលនាំចេញផលិតផលទៅកាន់ទីផ្សារវៀតណាម។
តាមរយៈកិច្ចព្រមព្រៀងនេះ ក្រសួងសហគ្រាសធុនតូច និងមធ្យម និងចាប់ផ្តើមអាជីវកម្ម Lotte Mart និង Lotte Global Logistics បានព្រមព្រៀងគ្នាក្នុងការបង្កើតប្រព័ន្ធកិច្ចសហប្រតិបត្តិការ និងជួយគាំទ្រការនាំចេញផលិតផលមានគុណភាពខ្ពស់នៃសហគ្រាសធុនតូច និងមធ្យមរបស់កូរ៉េខាងត្បូងទៅបរទេស។
តាមគម្រោង ពិធីបុណ្យ “រួមដំណើរនាខែកញ្ញា” ដែលរៀបចំឡើងដោយក្រសួងសហគ្រាសធុនតូច និងមធ្យម និងចាប់ផ្តើមអាជីវកម្ម ក្នុងបំណងជំរុញការប្រើប្រាស់ផលិតផលល្អរបស់កូរ៉េខាងត្បូង ត្រូវបានគេរំពឹងថានឹងដាក់បង្ហាញផលិតផលរបស់កូរ៉េខាងត្បូងក្នុងបណ្តាញលក់ទំនិញនៅហាណូយ ដោយមានការជួយគាំទ្រពី Lotte Mart និង Lotte Global Logistics។
|
|
ស្តង់នៅក្នុងហាង Lotte Mart នៅទីក្រុងសេអ៊ូល ប្រទេសកូរ៉េខាងត្បូង (រូបថត៖ vnanet.vn) |
គណៈកម្មាធិការរៀបចំនឹងបង្កើតបណ្តាញលក់ផលិតផលរបស់ធុរកិច្ចកូរ៉េខាងត្បូងនៅហាង Lotte Mart នៅបរទេស និងផ្សព្វផ្សាយផលិតផលតាមរយៈបណ្តាញផ្សាយតាមអ៊ីនធឺណិត និងផ្ទាល់របស់ Lotte Mart។
ទន្ទឹមនឹងនេះ ក្រុមហ៊ុន Lotte Global Logistics នឹងជួយគាំទ្រការដឹកជញ្ជូន និងភស្តុភារពាក់ព័ន្ធនឹងការពង្រីកអាជីវកម្មរបស់សហគ្រាសធុនតូច និងមធ្យមនៅបរទេស។ សហគ្រាសធុនតូច និងមធ្យម នឹងទទួលបានការផ្ដល់យោបល់លើការនាំចេញពីអ្នកជំនាញ ដើម្បីបង្កើតយុទ្ធសាស្ត្រភស្តុភារសមស្របទៅនឹងលក្ខណៈផលិតផល និងស្នើវិធានការកាត់បន្ថយថ្លៃដើម៕
បកប្រែដោយ Thuy Anh