សារខ្លាំងៗស្តីពីការធ្វើសមាហរណកម្មគ្រប់ជ្រុងជ្រោយ និងការកែលម្អបរិយាកាសវិនិយោគរបស់ទីក្រុង Hai Phong

ព្រឹត្តិការណ៍នេះត្រូវបានរៀបចំឡើងក្នុងឱកាសនៃសម័យប្រជុំលើកទី ៣ ឆ្នាំ ២០២៥ របស់ក្រុមប្រឹក្សាពិគ្រោះយោបល់ធុរកិច្ច APEC (ABAC III) នៅទីក្រុង Hai Phong។ លោក Luong Cuong ប្រធានរដ្ឋវៀតណាម អញ្ជើញចូលរួម និងមានប្រសាសន៍ក្នុងសន្និសីទ។

មានប្រសាសន៍ក្នុងសន្និសីទនេះ លោក Luong Cuong ប្រធានរដ្ឋវៀតណាម បានសង្កត់ធ្ងន់ថា សន្និសីទជំរុញការវិនិយោគនៅទីក្រុង Hai Phong មិនត្រឹមតែជាព្រឹត្តិការណ៍ដ៏មានអត្ថន័យសម្រាប់ទីក្រុងប៉ុណ្ណោះទេ ថែមទាំងជាសារខ្លាំងៗអំពីស្មារតីនៃការធ្វើសមាហរណកម្មយ៉ាងសកម្មនិងគ្រប់ជ្រុងជ្រោយ សេចក្តីប្រាថ្នាអភិវឌ្ឍន៍ និងការប្តេជ្ញាចិត្តក្នុងការកែលម្អបរិយាកាសវិនិយោគរបស់វៀតណាម។ ការរៀបចំសន្និសីទនេះបង្ហាញពីស្មារតីសកម្ម ការតភ្ជាប់កិច្ចសហប្រតិបត្តិការ និងចក្ខុវិស័យជាយុទ្ធសាស្ត្ររបស់ទីក្រុង Hai Phong ជាទីក្រុងដែលកំពុងលេចឡើងជាមជ្ឈមណ្ឌលសេដ្ឋកិច្ច-ឧស្សាហកម្ម-logistics  ដ៏សំខាន់នៃតំបន់​ភាគខាងជើង និងទូទាំងប្រទេស។

លោក Luong Cuong ប្រធានរដ្ឋវៀតណាមមានប្រសាសន៍ក្នុងសន្និសីទ

លោកប្រធានរដ្ឋវៀតណាម គូសបញ្ជាក់ថា យើងកំពុងមើលឃើញពីការផ្លាស់ប្តូរយ៉ាងឆាប់រហ័សនូវភូមិសាស្ត្រនយោបាយ បច្ចេកវិទ្យា និងបរិយាកាសវិនិយោគនិងការធ្វើអាជីវកម្ម។ ក្នុងបរិបទនោះ ការឆ្លើយតបយ៉ាងឆាប់រហ័ស និងស្ថាបនា គឺជាកត្តាសំខាន់សម្រាប់គ្រប់ខឿនសេដ្ឋកិច្ច។ ទីក្រុង Hai Phong ជាមួយនឹងកំពង់ផែសមុទ្រ ឧស្សាហកម្ម និងទីក្រុងឆ្លាតវៃ គឺជាមូលដ្ឋានដែលប្រមូលផ្ដុំកត្តាទាំងអស់នេះ។

បច្ចុប្បន្នវៀតណាមជាចំណុចភ្លឺមួយនៃកំណើនសេដ្ឋកិច្ចនៅអាស៊ី ដោយមានទំហំនាំចូលនាំចេញសរុបជាង ៧៨៦ ពាន់លានដុល្លារក្នុងឆ្នាំ ២០២៤ វៀតណាមស្ថិតក្នុងលំដាប់កំពូលទាំង ២០ ក្នុងពាណិជ្ជកម្មអន្តរជាតិលើពិភពលោក។ វៀតណាមក៏ជាគោលដៅវិនិយោគដ៏ទាក់ទាញដោយមានប្រទេស និងតំបន់ដែនដីជិត ១៥០ ចូលមកវិនិយោគនៅវៀតណាម។ វៀតណាមបានក្លាយជាតំណភ្ជាប់ដ៏សំខាន់មួយក្នុងសង្វាក់ផលិតកម្ម និងការផ្គត់ផ្គង់ជាសកល។ ទីក្រុង Hai Phong គឺជាច្រកផ្លូវសម្រាប់ការនាំចេញធំបំផុតនៅភាគខាងជើង និងដើរតួនាទីកាន់តែសំខាន់ក្នុងតំបន់។

លោក Luong Cuong ប្រធានរដ្ឋវៀតណាម និងប្រតិភូចូលរួមសន្និសីទ

វៀតណាមស្វាគមន៍វិនិយោគិនមកពីអាស៊ី អឺរ៉ុប ទ្វិបអាមេរិក និងខឿនសេដ្ឋកិច្ច APEC ដែលបានជ្រើសរើសទីក្រុង Hai Phong ជាកន្លែងអនុវត្តគម្រោងធំៗ ចាប់ពីឧស្សាហកម្មបន្ទាប់បន្សំ ផលិតអេឡិចត្រូនិក បច្ចេកវិទ្យាខ្ពស់ រហូតដល់មជ្ឈមណ្ឌលនវានុវត្ដន៍ និងសេវាកម្ម logistics ឆ្លាតវៃ។

លោកប្រធានរដ្ឋវៀតណាម បានសង្កត់ធ្ងន់ថា ទីក្រុង Hai Phong មានទីតាំងយុទ្ធសាស្ត្រពិសេសដូចជា កំពង់ផែទឹកជ្រៅអន្តរជាតិ Lach Huyen ហេដ្ឋារចនាសម្ព័ន្ធតភ្ជាប់តំបន់  សួនឧស្សាហកម្មបៃតង ឆ្លាត់វៃ ធនធានមនុស្សដ៏សម្បូរបែប និងយន្តការទាក់ទាញការវិនិយោគកាន់តែខ្លាំងឡើង។ ក្នុងនាមជាមូលដ្ឋានស្ថិតក្នុងក្រុមកំពូលនៃសមត្ថភាពប្រកួតប្រជែងថ្នាក់ខេត្ត និងការកែទម្រង់រដ្ឋបាលនិងកំណើនបៃតង អាជ្ញាធរទីក្រុង Hai Phong បាននិងកំពុងរួមដំណើរជាមួយអង្គភាពអាជីវកម្ម កែទម្រង់រដ្ឋបាល  លើកកម្ពស់ប្រសិទ្ធភាពសេវាកម្ម និងនាំមកនូវការពេញចិត្ដដល់វិនិយោគិន។

លោក Luong Cuong ប្រធានរដ្ឋវៀតណាម និងប្រតិភូ រួមទាំងវិនិយោគិនដែលទទួលវិញ្ញាបនបត្រចុះបញ្ជីវិនិយោគ និងអនុស្សរណៈយោគយល់គ្នាស្តីពីកិច្ចសហប្រតិបត្តិការនិងវិនិយោគនៅទីក្រុង Hai Phong

លោកប្រធានរដ្ឋវៀតណាម បានអះអាងថា រដ្ឋវៀតណាមប្តេជ្ញាចិត្ដបន្តរក្សាស្ថិរភាពនយោបាយ កែទម្រង់ច្បាប់យ៉ាងខ្លាំង  ការពារសិទ្ធិស្របច្បាប់របស់វិនិយោគិន និងបង្កើនការតភ្ជាប់មិនត្រឹមតែសម្រាប់ហេដ្ឋារចនាសម្ព័ន្ធប៉ុណ្ណោះទេ ថែមទាំងក្នុងការគ្រប់គ្រង ទិន្នន័យ និងធនធានមនុស្សទៀតផង។ សន្និសីទគឺជាឱកាសដ៏សំខាន់មួយសម្រាប់យើងម្នាក់ៗរកឃើញដៃគូថ្មី តភ្ជាប់គំនិតផ្តួចផ្តើមថ្មី និងបើកដំណាក់កាលអភិវឌ្ឍន៍បន្ដបន្ទាប់៕

បកប្រែដោយ Pham Diep