ជំរុញទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយរវាងវៀតណាម និងនូវែលហ្សេឡង់ ឱ្យអភិវឌ្ឍបន្ថែមទៀត

ដំណើរទស្សនកិច្ចនៅវៀតណាមរបស់ លោក Gerry Brownlee ប្រធានរដ្ឋសភានូវែលហ្សេឡង់ នឹងរួមចំណែកជំរុញទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយវៀតណាម  - នូវែលហ្សេឡង់ ឱ្យអភិវឌ្ឍបន្ថែមទៀត។ នេះត្រូវបានបញ្ជាក់ដោយលោក Luong Cuong ប្រធានរដ្ឋវៀតណាម នារសៀលថ្ងៃទី២៩ សីហា នៅទីក្រុងហាណូយ ក្នុងជំនួបជាមួយប្រធានសភានូវែលសេឡង់ដែលកំពុងបំពេញទស្សនកិច្ចជាផ្លូវការនៅវៀតណាមចាប់ពីថ្ងៃទី ២៧ ដល់ថ្ងៃទី ៣១ ខែសីហា ឆ្នាំ២០២៥។

លោក Luong Cuong ប្រធានរដ្ឋវៀតណាម និងលោក Gerry Brownlee ប្រធានរដ្ឋសភា New Zealand

លោក Luong Cuong ប្រធានរដ្ឋ បានសង្កត់ធ្ងន់ថា ការលើកកំពស់ទំនាក់ទំនងវៀតណាម - នូវែលសេឡង់ ទៅជាដៃគូយុទ្ធសាស្ត្រលើគ្រប់ជ្រុងជ្រោយក្នុងខែកុម្ភៈ ឆ្នាំ ២០២៥ បានបើកដំណាក់កាលថ្មីនៃកិច្ចសហប្រតិបត្តិការ នាំទំនាក់ទំនងនៃប្រទេសទាំងពីរឆ្ពោះទៅការអភិវឌ្ឍយ៉ាងទូលំទូលាយ ទាំងទ្វេភាគី និងពហុភាគី។

ទិដ្ឋភាពទូទៅនៃជំនួប

រីឯខ្លួនវិញ លោក Gerry Brownlee ប្រធានរដ្ឋសភានូវែលសេឡង់បានវាយតម្លៃថា វៀតណាមកំពុងមានតួនាទីកាន់តែខ្ពស់ខ្លាំងឡើងនៅក្នុងតំបន់ និងអន្តរជាតិ ហើយមានបំណងចង់ពង្រឹងទំនាក់ទំនងមិត្តភាពរវាងប្រទេសទាំងពីរឱ្យកាន់តែរឹងមាំថែមទៀត។ លោក Gerry Brownlee ក៏បានអះអាងដែរថា ទីក្រុង Wellington បានវាយតំលៃខ្ពស់ចំពោះការរួមចំណែករបស់សហគមន៍ជនវៀតណាមនៅនូវែលសេឡង់ និងប្តេជ្ញាបង្កើតលក្ខខណ្ឌអំណោយផលសម្រាប់សហគមន៍នេះ។

មេដឹកនាំទាំងពីរបានឯកភាពបន្តពង្រឹងទំនុកចិត្តផ្នែកនយោបាយ បង្កើនដំណើរទស្សនកិច្ច និងការផ្លាស់ប្តូរនៅកម្រិតខ្ពស់ និងគ្រប់លំដាប់ថ្នាក់ និងពង្រឹងកិច្ចសហប្រតិបត្តិការលើវិស័យការពារជាតិ និងសន្តិសុខ។ ភាគីទាំងពីរក៏បានឯកភាពបន្តសម្របសម្រួល និងគាំទ្រគ្នាទៅវិញទៅមកយ៉ាងជិតស្និទ្ធនៅវេទិកាពហុភាគី ជាពិសេសអង្គការសហប្រជាជាតិ៕

បកប្រែដោយ​ Duy Hoan