គណៈប្រតិភូនៃទីភ្នាក់ងារសារព័ត៌មានអាមេរិកឡាទីន Prensa Latina របស់ប្រទេសគុយបា បំពេញទស្សនកិច្ចការងារនៅកាសែតកងទ័ពប្រជាជន

នៅក្នុងជំនួប លោកឧត្តមសេនីយ៍ត្រី Doan Xuan Bo អគ្គនិពន្ធនាយកនៃកាសែតកងទ័ពប្រជាជនបានសម្តែងសេចក្តីសោមនស្សរីករាយដែលបានជួបលោក Jorge Legañoa Alonso ម្តងទៀតនៅទីក្រុងហាណូយ ព្រមទាំងចែករំលែកចំណាប់អារម្មណ៍យ៉ាងជ្រាលជ្រៅចំពោះប្រទេស និងប្រជាជនគុយបាដ៏អង់អាចក្លាហាន ក្នុងអំឡុងពេលបំពេញទស្សនកិច្ចការងារទៅកាន់ប្រទេសគុយបាកាលពី ៣ ខែមុនរបស់គណៈប្រតិភូកាសែតកងទ័ពប្រជាជន។

លោកឧត្តមសេនីយ៍ត្រី Doan Xuan Bo ផ្តល់វត្ថុអនុស្សាវរីយ៍ដល់លោក Jorge Legañoa Alonso ប្រធានទីភ្នាក់ងារសារព័ត៌មានអាមេរិកឡាទីន Prensa Latina

លោកឧត្តមសេនីយ៍ត្រី Doan Xuan Bo បានណែនាំអំពីលក្ខណៈពិសេសសំខាន់ៗនៃប្រវត្តិសាស្ត្រនៃកាសែតកងទ័ពប្រជាជន ជាមួយនឹងប្រពៃណីជាង ៧៥ ឆ្នាំនៃការបង្កើត ការកសាង និងការរីកចម្រើន រួមជាមួយនឹងសកម្មភាព និងទិសដៅអភិវឌ្ឍន៍នាពេលអនាគត។ នៅក្នុងបរិបទនៃប្រព័ន្ធផ្សព្វផ្សាយសម័យទំនើបនាពេលបច្ចុប្បន្ននេះ កាសែតកងទ័ពប្រជាជននៅតែបន្តមានគោលការណ៍ និងដំណោះស្រាយប្រកបដោយភាពច្នៃប្រឌិតជាច្រើន ជាមួយសសរស្តម្ភសំខាន់ៗចំនួន ៣ គឺ៖ កាសែតបោះពុម្ព កាសែតអេឡិចត្រូនិក និងវេទិកាបណ្តាញសង្គម។

លោកឧត្តមសេនីយ៍ត្រី Doan Xuan Bo និងលោក Jorge Legañoa Alonso ប្រធានទីភ្នាក់ងារសារព័ត៌មានអាមេរិកឡាទីន Prensa Latina

លោក Jorge Legañoa Alonso មានសេចក្តីសោមនស្សរីករាយដែលបានជួបជាមួយលោកឧត្តមសេនីយ៍ត្រី Doan Xuan Bo ម្តងទៀត ព្រមទាំងសម្តែងនូវសេចក្តីរីករាយដែលមានឱកាសមកបំពេញទស្សនកិច្ចការងារនៅកាសែតកងទ័ពប្រជាជន។ លោក Jorge Legañoa Alonso បានវាយតម្លៃខ្ពស់ចំពោះការអភិវឌ្ឍនៃកាសែតកងទ័ពប្រជាជន ហើយសង្ឃឹមថាភាគីទាំងពីរនឹងលើកកម្ពស់ការផ្សព្វផ្សាយអំពីទំនាក់ទំនងសហប្រតិបត្តិការរវាងប្រទេសទាំងពីរ កងទ័ពទាំងពីរ និងទីភ្នាក់ងារសារព័ត៌មានទាំងពីរបន្ថែមទៀត៕

បកប្រែដោយ Huyen Trang