Truong sa ឆ្ពោះទៅរកពិធីបុណ្យធំៗរបស់ប្រទេសជាតិ

ការិយាល័យបោះឆ្នោតលេខ ១៤ - កោះ Truong Sa ត្រៀមខ្លួនរួចរាល់សម្រាប់ថ្ងៃបោះឆ្នោត

នៅលើកោះដូចជា Da Lat, Da Tay A, Da Tay B, Truong Sa Dong ជាដើម ទង់ជាតិ និងរូបភាពឃោសនាអំពីការបោះឆ្នោតត្រូវបានរៀបចំយ៉ាងល្អិតល្អន់។ នៅលើកោះ Truong Sa ក្រៅពីបដា ពាក្យស្លោក តាមរយៈប្រព័ន្ធឧបករណ៍បំពងសម្លេង ព័ត៌មានទាក់ទងនឹងការបោះឆ្នោតត្រូវបានផ្សព្វផ្សាយជារៀងរាល់រសៀលដើម្បីអ្នកបោះឆ្នោតទាំងអស់នៅលើកោះបានស្តាប់។ យោងតាមលោកវរសេនីយ៍ឯក Tran Huy Phung ប្រធាននយោបាយនៃកោះ Truong Sa ឲ្យដឹងថា ការបោះឆ្នោតជ្រើសតាំងសមាជិករដ្ឋសភានីតិកាលទី១៦ និងសមាជិក​ក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ២០២៦-២០៣១ ត្រូវបានគណៈកម្មាធិការបក្ស និងមេបញ្ជាការអង្គភាពផ្សព្វផ្សាយជូនកម្មាភិបាល យុទ្ធជន ប្រជាជន និងកងកម្លាំងពាក់ព័ន្ធទាំងអស់។ តាមរយៈការផ្សព្វផ្សាយប្រចាំថ្ងៃ ដោយឆ្លៀតយកពេលសម្រាក និងថ្ងៃឈប់សម្រាកដើម្បីរៀបចំកិច្ចប្រជុំផ្សព្វផ្សាយ​ បានជាកម្មាភិបាល យុទ្ធជន ១០០% នៅលើកោះ បានសិក្សា និងយល់ដឹងអំពីបទប្បញ្ញត្តិស្តីពីការបោះឆ្នោតជ្រើសតាំងសមាជិករដ្ឋសភា និងសមាជិកក្រុមប្រឹក្សាប្រជាជនគ្រប់លំដាប់ថ្នាក់។

នៅក្នុងការបោះឆ្នោតខាងមុខនេះ ប្រជាពលរដ្ឋ និងយុទ្ធជនជាច្រើននៅលើកោះ នឹងចូលរួមក្នុងការបោះឆ្នោតជាលើកដំបូង។ ដូច្នេះ ការអប់រំពួកគេអំពីអត្ថន័យនៃការបោះឆ្នោតត្រូវបានថ្នាក់ដឹក​នាំ​កោះយកចិត្តទុកដាក់យ៉ាងខ្លាំង។ ពលបាលត្រី Duong Van Thuan ដែលកំពុងបំពេញភារកិច្ចនៅកោះ Da Lat កំពុងរង់ចាំថ្ងៃដែលគាត់អាចអនុវត្តសិទ្ធិពលរដ្ឋរបស់ខ្លួន។ «នេះជាលើកដំបូងដែលខ្ញុំមានសិទ្ធិបោះឆ្នោត ដូច្នេះខ្ញុំពិតជារំភើបចិត្ត​ណាស់។ ខ្ញុំសង្ឃឹមថាសន្លឹកបោះឆ្នោតរបស់ខ្ញុំនឹងរួមចំណែកដល់ការជ្រើសតាំងសមាជិកដ៏សក្តិសម ដែលនឹងបន្តយកចិត្តទុកដាក់ចំពោះជីវភាពរស់នៅរបស់ប្រជាជន ជាពិសេសអ្នកដែលនៅតំបន់សមុទ្រ និងកោះនៃប្រទេសយើង»។

អ្នកបោះឆ្នោតនៅលើកោះ Truong Sa កំពុងស្វែងយល់អំពីសេចក្តីសង្ខេបជីវប្រវត្តិរបស់បេក្ខជនឈរឈ្មោះបោះឆ្នោតជ្រើសតាងរដ្ឋសភានីតិកាលទី១៦ និងសមាជិកក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ២០២៦-២០៣១

ដោយមានក្តីរំភើបឆ្ពោះទៅថ្ងៃបោះឆ្នោត លោកស្រី Le Thi Huong Tram ជាប្រជាពលរដ្ឋម្នាក់រស់នៅកោះ Truong Sa បានឲ្យ​ដឹង​ថា ដោយមានការយកចិត្តទុកដាក់របស់បក្ស និងរដ្ឋ ជីវភាពរស់នៅរបស់ក្រុមគ្រួសារនានាដូចជាគ្រួ​សារបងស្រី​​នៅលើកោះដាច់ស្រយាលនេះមានស្ថិរភាព។ ការថែទាំសុខភាព ការអប់រំ និងការកម្សាន្តនៅលើកោះត្រូវបានវិនិយោគយ៉ាងល្អ ហើយមានមធ្យោបាយទំនាក់ទំនងងាយស្រួល ដូច្នេះ​លែងមានអារម្មណ៍ថានៅឆ្ងាយ​ដីគោកទៀតហើយ។ តាមរយៈការបោះឆ្នោតនេះ បងស្រីសង្ឃឹមថាសមាជិក​ដែលត្រូវបានប្រជាជនជឿទុកចិត្ត នឹងបន្តយកចិត្តទុកដាក់ចំពោះជីវភាពរស់នៅរបស់ប្រជាជន ជាពិសេសអ្នកដែលនៅតំបន់ដែលប្រឈមមុខនឹងការលំបាកជាច្រើន។

លោក Vu Quoc Phuong ជានាវិកនៅលើនាវា SG-7278 ដែលកំពុងប្រតិបត្តិការនៅក្នុងតំបន់ក្បែរកោះ Da Tay។ នៅពេលបានសួរអំពីការបោះឆ្នោតជ្រើសតាំងសមាជិករដ្ឋសភានីតិកាលទី១៦ និងសមាជិកក្រុមប្រឹក្សាប្រជាជនគ្រប់លំដាប់ថ្នាក់នាពេលខាងមុខ លោកឲ្យដឹងថា ក្នុងរយៈពេលប៉ុន្មានថ្ងៃថ្មីៗនេះ លោកត្រូវបានកម្មាភិបាលនៅលើកោះជូនដំណឹងអំពីការបោះឆ្នោត។ លោកបានឲ្យដឹងថា នៅថ្ងៃទី៨ ខែមីនា លោកនឹងរៀបចំពេលវេលាដើម្បីចូលចតនៅកោះហើយរួមជាមួយនាវិកផ្សេងទៀត ទៅបោះឆ្នោត ដោយអនុវត្តសិទ្ធិពលរដ្ឋរបស់ខ្លួន។

ចែករំលែកជាមួយយើងខ្ញុំ លោកវសេនីយ៍ឯក Dinh Van Diep មេបញ្ជាការកោះ Da Lat បានឲ្យដឹងថា ដើម្បីរៀបចំយ៉ាងហ្មត់ចត់សម្រាប់ថ្ងៃបោះឆ្នោត តាមរយៈសកម្មភាពជាច្រើន អង្គភាពបានរៀបចំផ្សព្វផ្សាយជូនអ្នកបោះឆ្នោត រួមមាន៖ កម្មាភិបាល យុទ្ធជនលើកោះ កងកម្លាំងពាក់ព័ន្ធ និងអ្នកនេសាទនៅលើនាវានេសាទជុំវិញកោះ។ លោកបានបញ្ជាក់ថា៖ «ដោយសារលក្ខណៈពិសេស បានជាចំនួនអ្នកនេសាទបានផ្លាស់ប្តូរជាញឹកញាប់។ ដូច្នេះ ជារៀងរាល់ថ្ងៃ យើងខ្ញុំបានរៀបចំផែនការ និងរាយការណ៍ជូន​ទីបញ្ជាការកងពលតូចលេខ ១៤៦ (តំបន់កងទ័ពជើងទឹកលេខ៤) ដើម្បីស្នើសុំឱ្យដាក់ពង្រាយនាវាដើម្បីធ្វើការផ្សព្វផ្សាយជូន​អ្នកនេសាទដែលនេសាទនៅជុំវិញកោះ។ យើងតែងតែប្តេជ្ញាចិត្តកសាង Truong Sa ឱ្យកាន់តែរឹងមាំថែមទៀត  ដែល​ជាទីបង្អែកដ៏រឹងមាំសម្រាប់អ្នកនេសាទក្នុងការនេសាទ និងការពារអធិបតេយ្យភាពរបស់ប្រទេសជាតិ»៕

បកប្រែដោយ Duy Hoan