តបតាមការអញ្ជើញរបស់រដ្ឋាភិបាលចិន លោក Pham Minh Chinh នាយករដ្ឋមន្ត្រីនឹងចូលរួមកិច្ចប្រជុំកំពូលអង្គការសហប្រតិបត្តិការសៀងហៃ (SCO) ឆ្នាំ ២០២៥ ក្នុងនាមជាភ្ញៀវកិត្តិយស និងមានសកម្មភាពការងារនៅប្រទេសចិនចាប់ពីថ្ងៃទី ៣១ ខែសីហា ដល់ថ្ងៃទី ១ ខែកញ្ញា។
ដំណើរបំពេញការងាររបស់នាយករដ្ឋមន្ត្រីមានគោលបំណងបន្តអនុវត្ត និងអនុម័តសេចក្តីសម្រេចចិត្តលេខ ៥៩ របស់ការិយាល័យនយោបាយ ស្តីពីសមាហរណកម្មអន្តរជាតិក្នុងស្ថានភាពថ្មី ដោយផ្តោតលើការចូលរួមយ៉ាងសកម្មក្នុងវេទិកាពហុភាគី និងយន្តការសហប្រតិបត្តិការនៅកម្រិតតំបន់ និងអន្តរជាតិ។
    |
 |
|
លោក Pham Minh Chinh នាយករដ្ឋមន្ត្រីវៀតណាម នឹងចូលរួមកិច្ចប្រជុំកំពូលអង្គការសហប្រតិបត្តិការសៀងហៃ (រូបថត៖ VGP) |
លោក Pham Minh Chinh នាយករដ្ឋមន្ត្រីវៀតណាម បានចូលរួមកិច្ចប្រជំុជាមួយថ្នាក់ដឹកនាំប្រទេសជាង ២០ ក្នុងនោះមាន លោក Vladimir Putin ប្រធានាធិបតីរុស្ស៊ី និងថ្នាក់ដឹកនាំអង្គការអន្តរជាតិចំនួន ១០។ នេះគឺជាកិច្ចប្រជុំដ៏ធំបំផុតចាប់តាំងពី SCO ត្រូវបានបង្កើតឡើងក្នុងឆ្នាំ ២០០១ មក។
SCO-លើកកម្ពស់ស្មារតីសៀងហៃ
កិច្ចប្រជំុនេះគឺជាសកម្មភាពការទូតដ៏សំខាន់បំផុតមួយរបស់ប្រទេសចិន ដោយរបៀបវារៈឆ្នាំនេះផ្តោតលើការលើកកម្ពស់ "ស្មារតីសៀងហៃ" ការពង្រឹងយន្តការកិច្ចសហប្រតិបត្តិការ ពិភាក្សាអំពីបញ្ហាអន្តរជាតិ និងតំបន់ និងការជំរុញកិច្ចសហប្រតិបត្តិការពហុភាគីក្នុងវិស័យនយោបាយ សន្តិសុខ សេដ្ឋកិច្ច ពាណិជ្ជកម្ម និងវប្បធម៌។
លោក Xi Jinping ប្រធានរដ្ឋចិននឹងធ្វើជាប្រធានកិច្ចប្រជុំលើកទី ២៥ នៃក្រុមប្រឹក្សាប្រមុខរដ្ឋនៃ SCO និងកិច្ចប្រជុំ "SCO Plus" និងថ្លែងសុន្ទរកថាសំខាន់ៗ។ ទំហំនៃកិច្ចប្រជុំនេះឆ្លុះបញ្ចាំងពីការរំពឹងទុករបស់ប្រទេសជាសមាជិកក្នុងការលើកកម្ពស់កិច្ចសហប្រតិបត្តិការកាន់តែស៊ីជម្រៅ និងបានទាក់ទាញការយកចិត្តទុកដាក់យ៉ាងខ្លាំងពីសហគមន៍អន្តរជាតិ។ គេរំពឹងថា មេដឹកនាំទាំងឡាយនឹងចុះហត្ថលេខា និងអនុម័ត "សេចក្តីប្រកាសទីក្រុងធានជីន" អនុម័ត "យុទ្ធសាស្ត្រអភិវឌ្ឍន៍ SCO សម្រាប់ ១០ ឆ្នាំខាងមុខ" និងចេញឯកសារសំខាន់ៗដើម្បីរំលឹកខួបលើកទី ៨០ នៃជ័យជំនះលើហ្វាស៊ីសនិយម និងការបង្កើតអង្គការសហប្រជាជាតិ។
បន្ទាប់ពីរយៈពេល ២៤ ឆ្នាំនៃការបង្កើត អង្គការសហប្រតិបត្តិការសៀងហៃបានពង្រីកពីសមាជិកស្ថាបនិកចំនួន ៦ ទៅជាប្រទេសសមាជិកចំនួន ១០ ប្រទេសសង្កេតការណ៍ចំនួន ២ និងដៃគូសន្ទនាចំនួន ១៤ ដែលមានប្រទេសសរុបចំនួន ២៦ នៅអាស៊ី អឺរ៉ុប និងអាហ្វ្រិក។ SCO បានក្លាយជាអង្គការអន្តរជាតិក្នុងតំបន់ដ៏ធំបំផុតរបស់ពិភពលោក ដែលមានវិសាលភាព និងចំនួនប្រជាជនច្រើនជាងគេ ដែលដើរតួនាទីយ៉ាងសំខាន់ក្នុងការលើកកម្ពស់សន្តិភាព និងការអភិវឌ្ឍន៍សកល។
ជាមួយនឹងគោលការណ៍នៃការបើកចំហរ និងបរិយាប័ន្ន SCO បើកទ្វារសម្រាប់ប្រទេសទាំងអស់ដែលទទួលស្គាល់ស្មារតីសៀងហៃ ហើយស្វាគមន៍ប្រទេស និងដៃគូដែលមានគំនិតដូចគ្នាកាន់តែច្រើនក្នុងការចូលរួមជាមួយ SCO ។ ការចូលរួមរបស់វៀតណាមក្នុង SCO ក្នុងនាមជាភ្ញៀវរបស់ប្រទេសម្ចាស់ផ្ទះគឺជាឱកាសមួយដើម្បីជំរុញកិច្ចសហប្រតិបត្តិការពហុភាគី ផ្លាស់ប្តូរទស្សនៈ និងជំរុញគោលដៅរួមក្នុងវិស័យសន្តិសុខ សេដ្ឋកិច្ច និងវប្បធម៌ ...
ជំរុញទំនាក់ទំនងវៀតណាម-ចិនតាមទិសដៅ “៦ បន្ថែមទៀត”
ដំណើរទស្សនកិច្ចការងាររបស់នាយករដ្ឋមន្ត្រី Pham Minh Chinh បានប្រព្រឹត្តទៅក្នុងបរិបទដែលទំនាក់ទំនងវៀតណាម-ចិនរក្សាបាននូវនិន្នាការអភិវឌ្ឍន៍វិជ្ជមាន និងសម្រេចបានលទ្ធផលសំខាន់ៗជាច្រើន។
នៅឆ្នាំនេះ ប្រទេសទាំងពីរកំពុងប្រារព្ធខួបលើកទី ៧៥ នៃការបង្កើតទំនាក់ទំនងការទូត (១៩៥០-២០២៥) ការផ្លាស់ប្តូរ និងការទំនាក់ទំនងកម្រិតខ្ពស់រវាងភាគីទាំងពីរបានប្រព្រឹត្តទៅក្នុងទម្រង់ដែលអាចបត់បែនបានជាច្រើន ទាំងការពិភាក្សាតាមទូរស័ព្ទរហូត ទាំងដំណើរទស្សនកិច្ចរដ្ឋ និងដំណើរទស្សនកិច្ចការងារ។ ជាពិសេស ការជួបពិភាក្សាតាមទូរស័ព្ទរវាងលោក To Lam អគ្គលេខាបក្ស និងលោក Xi Jinping អគ្គលេខាបក្ស និងជាប្រធានរដ្ឋចិន នាថ្ងៃទី ១៥ មករា បានប្រកាសបើកកម្មវិធីផ្លាស់ប្តូរប្រជាជនវៀតណាម - ចិនឆ្នាំ ២០២៥។ បន្ទាប់មក លោក Xi Jinping អគ្គលេខាបក្ស និងជាប្រធានរដ្ឋចិន បានទៅបំពេញទស្សនកិច្ចផ្លូវរដ្ឋនៅវៀតណាមក្នុងខែមេសា ឆ្នាំ ២០២៥ ដែលជាដំណើរបំពេញទស្សនកិច្ចផ្លូវរដ្ឋលើកទី ៤ របស់មេដឹកនាំចិនទៅកាន់វៀតណាម ដែលបង្ហាញពីទំនាក់ទំនងប្រកបដោយភាពជឿជាក់ខ្ពស់ និងយុទ្ធសាស្ត្រនៃទំនាក់ទំនងទ្វេភាគី
វិស័យសេដ្ឋកិច្ច ពាណិជ្ជកម្ម និងវិនិយោគបានកត់ត្រាកំណើនដ៏រឹងមាំ។ ទំហំពាណិជ្ជកម្មទ្វេភាគីក្នុងឆ្នាំ ២០២៤ សម្រេចបានជាង ២០៥ ពាន់លានដុល្លារ។ ក្នុងរយៈពេល ៧ ខែដំបូងនៃឆ្នាំនេះ វាកើនឡើងជាង ២១% ឈានដល់ប្រហែល ១៣៧ ពាន់លានដុល្លារ។ វិស័យទេសចរណ៍ក៏បានកត់ត្រានូវវឌ្ឍនភាពផងដែរ ដោយមានភ្ញៀវចិនជាង ៣.១ លាននាក់ទៅកាន់ប្រទេសវៀតណាមក្នុងរយៈពេល ៧ខែដំបូងនៃឆ្នាំនេះ ដែលស្មើនឹង ២៥.៥% នៃចំនួនភ្ញៀវអន្តរជាតិសរុបទៅកាន់ប្រទេសវៀតណាម។ តួលេខទាំងនេះគឺជាភស្តុតាងដ៏រស់រវើកដែលថា សហគមន៍ទំនាក់ទំនងអនាគតរួមវៀតណាម-ចិនបានឈានដល់ដំណាក់កាលល្អបំផុតរបស់ខ្លួន ដោយធ្វើតាមទិសដៅ "៦ បន្ថែមទៀត" ដែលមេដឹកនាំនៃប្រទេសទាំងពីរបានឯកភាពគ្នា។ នោះគឺការទុកចិត្តខាងនយោបាយខ្ពស់ បន្ថែមទៀត; កិច្ចសហប្រតិបត្តិការការពារជាតិ និងសន្តិសុខជាក់ស្តែង បន្ថែមទៀត; កិច្ចសហប្រតិបត្តិការសេដ្ឋកិច្ច និងពាណិជ្ជកម្មកាន់តែមានប្រសិទ្ធភាពបន្ថែមទៀត; ការផ្លាស់ប្តូរប្រជាជនកាន់តែស៊ីជម្រៅបន្ថែមទៀត; ការសម្របសម្រួលពហុភាគីកាន់តែជិតស្និទ្ធបន្ថែមទៀត; ការគ្រប់គ្រង និងការដោះស្រាយការខ្វែងគំនិតគ្នាកាន់តែមានប្រសិទ្ធភាពបន្ថែមទៀត។ នេះក៏ត្រូវបានអះអាងដោយ លោក He Wei ឯកអគ្គរដ្ឋទូតចិនប្រចាំនៅវៀតណាម ក្នុងកម្មវិធីជួបប្រាស្រ័យមិត្តភាពវៀតណាម-ចិន ដែលបានធ្វើឡើងកាលពីខែមេសាកន្លងទៅ។ លោកឯកអគ្គរដ្ឋទូតបានអះអាងថា៖ “ចិននិងវៀតណាមតែងតែចាត់ទុកការអភិវឌ្ឍន៍របស់គ្នាទៅវិញទៅមកជាផលប្រយោជន៍រៀងៗខ្លួន។ ចាប់តាំងពីការបង្កើតទំនាក់ទំនងសហគមន៍ចែករំលែកអនាគតរួមមក ទំនាក់ទំនងរវាងប្រទេសទាំងពីរមានការអភិវឌ្ឍន៍គួរឲ្យកត់សម្គាល់ ជាពិសេសលើវិស័យសំខាន់ៗនៃកិច្ចសហប្រតិបត្តិការដូចជាសេដ្ឋកិច្ចបៃតង សេដ្ឋកិច្ចឌីជីថល ថាមពលខ្យល់ ថាមពលពន្លឺព្រះអាទិត្យ ផលិតផលកសិកម្ម។ ទំនាក់ទំនងចិន-វៀតណាមមានស្ថិរភាព បង្កើតលក្ខខណ្ឌសម្រាប់ប្រទេសទាំងពីរអភិវឌ្ឍប្រកបដោយស្ថិរភាពនៅក្នុងពិភពលោកដែលមានការប្រែប្រួលជាច្រើន”។
ឈរលើមូលដ្ឋាននោះ ការចូលរួមរបស់នាយករដ្ឋមន្ត្រី Pham Minh Chinh នៅកិច្ចប្រជុំកំពូល SCO ឆ្នាំ ២០២៥ នឹងរួមចំណែកធ្វើឱ្យទំនាក់ទំនងភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយវៀតណាម - ចិន កាន់តែស៊ីជម្រៅ ទន្ទឹមនឹងនោះនឹងបញ្ជាក់ពីតួនាទីសកម្ម របស់វៀតណាមក្នុងយន្តការសហប្រតិបត្តិការពហុភាគីក្នុងតំបន់ និងសកលលោក។
បកប្រែដោយ Thanh Cong