វេទិកាធុរកិច្ចវៀតណាម-ចក្រភពអង់គ្លេស៖ ឱកាសនាំចេញ និងវិនិយោគជាច្រើនរវាងប្រទេសទាំងពីរ

នៅទីក្រុងហាណូយ គណៈកម្មាធិការចម្រុះនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងវៀតណាម និងអង់គ្លេស បានរៀបចំ “វេទិកាធុរកិច្ចវៀតណាម - អង់គ្លេសឆ្នាំ ២០២៣”។ នេះគឺជាព្រឹត្តិការណ៍មួយក្នុងសកម្មភាពជាច្រើនរំលឹកខួបអនុស្សាវរីយ៍លើកទី ៥០ នៃការបង្កើតទំនាក់ទំនងការទូតរវាងវៀតណាម និងចក្រភពអង់គ្លេស និងអៀរឡង់ខាងជើង (១៩៧៣-២០២៣)។

ទិដ្ឋភាពវេទិកា (រូប​ថត៖ ក្រសួងឧស្សាហកម្ម និងពាណិជ្ជកម្ម)

ថ្លែងមតិក្នុងវេទិកានេះ លោក Ta Hoang Linh ប្រធាននាយកដ្ឋានទីផ្សារអឺរ៉ុប-អាមេរិក នៃក្រសួងឧស្សាហកម្ម និងពាណិជ្ជកម្មវៀតណាម បានមានប្រសាសន៍ថា ទោះបីជាចាប់ពីដើមឆ្នាំរហូតមកដល់ពេលនេះ ការដោះដូរពាណិជ្ជកម្មរបស់វៀតណាមជាមួយនឹងទីផ្សារនាំចេញសំខាន់ៗនៅអឺរ៉ុបមាន​ការធ្លាក់ចុះដោយសារតែភាពតានតឹងភូមិសាស្ត្រនយោបាយ និងការលំបាកជាទូទៅក្នុងសេដ្ឋកិច្ចពិភពលោក ប៉ុន្តែពាណិជ្ជកម្មទ្វេភាគីរវាងវៀតណាម និងចក្រភពអង់គ្លេស បានបន្តក្លាយជាចំណុចភ្លឺនៅពេលដែលទំហំនៃការនាំចេញនាំចូលទ្វេភាគីសរុបក្នុងរយៈពេល ១០ ខែនៃឆ្នាំនេះសម្រេចបាន ៥.៨៧ ពាន់លានដុល្លារ កើនឡើង ១.៦% បើប្រៀបធៀបនឹងរយៈពេលដូចគ្នាកាលពីឆ្នាំមុន។ គួរកត់សម្គាល់ថា ផលិតផលនាំចេញសំខាន់ៗជាច្រើនរបស់វៀតណាមទៅកាន់ចក្រភពអង់គ្លេសមានកំណើនល្អដូចជា៖ ផលិតផលកៅស៊ូ (កើនឡើង ៦៦%) ខ្សែភ្លើង និងខ្សែកាប (កើនឡើង ៥៥.៥%) ទូរស័ព្ទ និងគ្រឿងបន្លាស់ (កើនឡើង ២១%) គ្រឿងម៉ាស៊ីន និងឧបករណ៍។ (កើនឡើង ១៥.៥%) ។

កិច្ចព្រមព្រៀងពាណិជ្ជកម្មសេរីវៀតណាម - អង់គ្លេស (UKVFTA) ដែលចូលជាធរមានជាផ្លូវការចាប់ពីថ្ងៃទី១ ឧសភា ឆ្នាំ២០២១ បានបង្កើតកម្លាំងចលករដ៏រឹងមាំដើម្បីជំរុញពាណិជ្ជកម្ម និងវិនិយោគរវាងប្រទេសទាំងពីរ។ លោកស្រី Nguyen Khanh Ngoc អនុប្រធាននាយកដ្ឋានទីផ្សារអឺរ៉ុប-អាមេរិក នៃក្រសួងឧស្សាហកម្ម និងពាណិជ្ជកម្ម បានមានប្រសាសន៍ថា៖ “ដោយកិច្ចព្រមព្រៀង FTA រវាងវៀតណាម និងចក្រភពអង់គ្លេស ចូលជាធរមានក្នុងរយៈពេល ២ ឆ្នាំកន្លះកន្លងមកនេះ ចក្រភពអង់គ្លេស​ជាប្រទេសដែលមានគម្រោងថ្មីច្រើនបំផុតក្នុងចំណោមប្រទេសដែលវិនិយោគនៅវៀតណាម។ ជាក់ស្តែង គម្រោងចំនួន ១២៩ ត្រូវបានផ្តល់អាជ្ញាប័ណ្ណ ដោយមានទុនវិនិយោគសរុបចំនួន ៣៦០ លានដុល្លារអាមេរិក។

លោក David Johnstone ប្រធាននាយកដ្ឋានអនុវត្តកិច្ចព្រមព្រៀងពាណិជ្ជកម្មសេរី (FTA) នៃក្រសួងពាណិជ្ជកម្ម និងពាណិជ្ជកម្មចក្រភពអង់គ្លេស បានសន្និដ្ឋានថា ការចុះហត្ថលេខានាពេលថ្មីៗនេះរបស់ចក្រភពអង់គ្លេសក្នុងកិច្ចព្រមព្រៀងលើគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) បានបង្កើតសន្ទុះកាន់តែខ្លាំងសម្រាប់ពាណិជ្ជកម្ម និងវិនិយោគរវាងវៀតណាម និងអង់គ្លេស។ លោកបានសង្កត់ធ្ងន់ថា ក្រៅពីផលប្រយោជន៍ជាក់ស្តែងទាក់ទងនឹងពន្ធគយ និងការបន្ថែមការអនុគ្រោះដ៏គួរឱ្យទាក់ទាញជាច្រើនបើធៀបនឹង FTA ទ្វេភាគីដែលមានស្រាប់នោះ CPTPP ក៏បានបង្កើតផលប្រយោជន៍ជាច្រើនសម្រាប់ប្រទេសទាំងពីរក្នុងការចូលកាន់តែស៊ីជម្រៅក្នុង​ខ្សែ​សង្វាក់ផ្គត់ផ្គង់របស់​គ្នាទៅវិញទៅមក និង​ជួយ​សម្រួលដល់ដំណើរការធ្វើអាជីវកម្មរបស់សហគ្រាសនៃភាគីទាំងពីរ៕

បកប្រែដោយ Thanh Cong