សហគ្រាសអ៊ីស្រាអែលយកចិត្តទុកដាក់ដល់ការជំរុញការនាំចូលផលិតផលពីវៀតណាម
កប.អនឡាញ - ស្ថានតំណាងពាណិជ្ជកម្មវៀតណាមប្រចាំនៅអ៊ីស្រាអែលបានឲ្យដឹងថា ការដោះដូរពាណិជ្ជកម្មទ្វេភាគីរវាងវៀតណាម និងអ៊ីស្រាអែលក្នុងរយៈពេល ៥ ខែដំបូងនៃឆ្នាំ ២០២០ សម្រេចបាន ៦៤៩,៤ លានដុល្លារអាមេរិក។
បើយោងតាមទីប្រឹក្សាពាណិជ្ជកម្មវៀតណាមប្រចាំនៅអ៊ីស្រាអែល លោក Le Thai Hoa ឲ្យដឹងថា ក្នុងតុល្យភាពនៃការនាំចេញនាំចូលរវាងប្រទេសទាំងពីរនោះ ការនាំចេញទៅកាន់អ៊ីស្រាអែលបានថយចុះជិត ១៨% បើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈការនាំចូលពីទីផ្សារនេះកើនឡើង ៤១៩% វិញ។
|
|
ត្រីធូណាគឺជាផលិតផលនាំចេញសំខាន់មួយនៃវិស័យជលផលវៀតណាម (រូបថត៖ vnanet.vn) |
ជាពិសេសនៅក្នុងត្រឹមខែឧសភា ទំហំពាណិជ្ជកម្មរវាងវៀតណាមនិងអ៊ីស្រាអែលសម្រេចបានជាង ១៣៦ លានដុល្លារអាមេរិក។ ការនាំចេញទៅកាន់ប្រទេសអ៊ីស្រាអែលមានការកើនឡើងយ៉ាងខ្លាំង ខណៈការនាំចូលពីទីផ្សារនេះក៏មានការកើនឡើងបើរៀបធៀបនឹងខែមុនដែរ។ គួរកត់សម្គាល់ថា ក្នុងរយៈពេល ៥ ខែដើមឆ្នាំនេះ ការនាំចេញត្រីធូណាទៅកាន់ប្រទេសអ៊ីស្រាអែលសម្រេចបានជាង ១១ លានដុល្លារអាមេរិក និងនេះជាទីផ្សារមួយក្នុងចំណោមទីផ្សារនាំចូលត្រីធូណាធំៗចំនួន ១០ របស់ប្រទេសវៀតណាម។
លោក Le Thai Hoa ឲ្យដឹងថា សហគ្រាសអ៊ីស្រាអែលមួយចំនួនមានការយកចិត្តទុកដាក់ចំពោះមុខទំនិញមួយចំនួនដូចជា ត្រីប្រាយកសាច់ហ្វីឡេ អាហារកំប៉ុង និងវាយនភ័ណ្ឌ ហើយក៏កំពុងទាក់ទងជាមួយក្រុមហ៊ុនវៀតណាមនានាដើម្បីបន្តជំរុញការនាំចូលមុខទំនិញទាំងនេះចូលក្នុងប្រទេសអ៊ីស្រាអែលនាពេលខាងមុខនេះផងដែរ៕
បកប្រែដោយ Duy Hoan