វៀតណាម-អូទ្រីសចុះហត្ថលេខាលើកិច្ចព្រមព្រៀងក្របខ័ណ្ឌសហប្រតិបត្តិការហិរញ្ញវត្ថុដែលមានតម្លៃ ១៥០ លានអឺរ៉ូ

កិច្ចព្រមព្រៀងក្របខ័ណ្ឌនេះរួមមាន ១០០ លានអឺរ៉ូដែលមានលក្ខខណ្ឌជាក់លាក់ និង ៥០ លានអឺរ៉ូដោយគ្មានលក្ខខណ្ឌ។ នេះនឹងជាមូលដ្ឋានច្បាប់សម្រាប់ភាគីទាំងពីរបន្តពិភាក្សា ឯកភាពលើគោលការណ៍ទូទៅស្តីពីការខ្ចីប្រាក់ និងអនុវត្តនីតិវិធីទាក់ទងនឹងកិច្ចព្រមព្រៀងកម្ចីជាក់លាក់សម្រាប់គម្រោងនានាក្នុងរយៈពេល ៥ ឆ្នាំខាងមុខ (២០២៥-២០៣០)។

កម្ចីនេះបង្ហាញពីការប្តេជ្ញាចិត្តយ៉ាងមុតមាំរបស់រដ្ឋាភិបាលអូទ្រីសក្នុងការបន្តរួមដំណើរ និងជួយគាំទ្រវៀតណាមលើមាគ៌ាអភិវឌ្ឍសេដ្ឋកិច្ចសង្គម។ បន្ទាប់ពីពិធីចុះហត្ថលេខា ភាគីទាំងពីរបានសន្យាថានឹងសម្របសម្រួលនៅកម្រិតបច្ចេកទេស ដើម្បីកសាង និងអនុវត្តគម្រោងជាក់លាក់ពីប្រភពទុននេះឱ្យមានប្រសិទ្ធភាពបំផុត។

កិច្ចព្រមព្រៀងក្របខ័ណ្ឌដែលចុះហត្ថលេខារួមមាន ១០០ លានអឺរ៉ូដែល​មាន​លក្ខខណ្ឌជាក់លាក់ និង ៥០ លានអឺរ៉ូដោយគ្មានលក្ខខណ្ឌ (រូបថត៖ vnanet.vn)

គួររំលឹកថា លោកអនុរដ្ឋមន្ត្រី Nguyen Duc Chi បានជួបពិភាក្សាការងារជាមួយលោកស្រី Barbara Eibinger-Miedl។ លោកអនុរដ្ឋមន្ត្រីបានមានប្រសាសន៍ថា គិតមកដល់ពេលនេះ វៀតណាមបានអនុវត្តគម្រោងចំនួន ៣២ ដោយប្រើប្រាស់ប្រាក់កម្ចីពីរដ្ឋាភិបាលអូទ្រីស ដែលមានតម្លៃសរុបប្រមាណ ៣៧០ លានអឺរ៉ូ។

ទាក់ទិននឹងកិច្ចសហប្រតិបត្តិការវិនិយោគ សហគ្រាសអូទ្រីសមានគម្រោងវិនិយោគនៅមានសុពលភាពចំនួន ៤៩ នៅវៀតណាម ជាមួយនឹងទុនចុះបញ្ជីសរុបជាង ១៥០ លានដុល្លារអាមេរិក។ ផ្ទុយទៅវិញ សហគ្រាសវៀតណាមមានគម្រោងវិនិយោគចំនួន ២ នៅអូទ្រីស។

លោកស្រីរដ្ឋលេខាធិការ Barbara Eibinger-Miedl បានអះអាងថា វៀតណាមជាដៃគូពាណិជ្ជកម្មសំខាន់របស់អូទ្រីសនៅអាស៊ីអាគ្នេយ៍ ដោយមានសហគ្រាសអូទ្រីសប្រមាណ ៦០ កំពុងប្រតិបត្តិការនៅវៀតណាម។ នៅឆ្នាំ ២០២៤ ការនាំចេញពីអូទ្រីសទៅវៀតណាមនឹងកើនឡើង ២៥% ខណៈការនាំចូលពីវៀតណាមទៅអូទ្រីសនឹងកើនឡើង ៩%។ នេះបង្ហាញថា កិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុប (EVFTA) កំពុងដើរតួនាទីវិជ្ជមាន។

សហគ្រាសអូទ្រីសមានជំនាញ និងបទពិសោធន៍យ៉ាងស៊ីជម្រៅលើវិស័យដូចជា ការអភិវឌ្ឍបច្ចេកវិទ្យាបៃតង និងការសាងសង់ហេដ្ឋារចនាសម្ព័ន្ធ។ ទន្ទឹមនឹងនោះ សេដ្ឋកិច្ចវៀតណាមកំពុងរីកចម្រើនខ្លាំងក្នុងវិស័យនេះ ដែលនេះបង្ហាញថា សក្ដានុពលនៃកិច្ចសហប្រតិបត្តិការរវាងភាគីទាំងពីរនៅតែមានច្រើនណាស់៕

បកប្រែដោយ Duy Hoan