JICA ជួយគាំទ្រគ្រួសារកសិករដាំកាហ្វេ
កប.អនឡាញ - នៅថ្ងៃទី ១ ខែតុលា ទីភ្នាក់ងារសហប្រតិបត្តិការអន្តរជាតិជប៉ុន (JICA) បានចុះហត្ថលេខាលើកិច្ចព្រមព្រៀងប្រាក់កម្ចី ៧៥ លានដុល្លារអាមេរិក ជាមួយសាជីវកម្ម ECOM Agroindustrial Corp. Limited (ECOM) ដែលជាសាជីវកម្មកែច្នៃកសិផលសកល និង ECOM Agroindustrial Asia Pte Limited (EAA) ជាក្រុមហ៊ុនសមាជិករបស់សាជីវកម្ម។ ធនាគារអភិវឌ្ឍន៍អាស៊ី (ADB) ជាសហឧបត្ថម្ភដល់កិច្ចព្រមព្រៀងប្រាក់កម្ចី។
    |
 |
|
JICA ជួយគាំទ្រគ្រួសារកសិករដាំកាហ្វេ (រូបថត៖ JICA) |
ប្រាក់កម្ចីរបស់ JICA ក្នុងគោលបំណងពង្រឹងខ្សែសង្វាក់ផ្គត់ផ្គង់ លើកកម្ពស់គុណភាពនៃជីវភាពរស់នៅ និងបង្កើតការងារបន្ថែមទៀតសម្រាប់គ្រួសារកសិករនៅក្នុងតំបន់អាស៊ីប៉ាស៊ីហ្វិក។ ជាពិសេស ប្រាក់កម្ចីនេះនឹងជួយគាំទ្រដល់ការទិញកាហ្វេពីគ្រួសារដាំកាហ្វេជាង ៦០,០០០ គ្រួសារ នៅក្នុងប្រទេសវៀតណាម ឥណ្ឌូនេស៊ី ឥណ្ឌា និងប៉ាពួញូហ្គីណេ។
ក្រៅពីការជួយគាំទ្រសម្រាប់ការទិញកាហ្វេពីគ្រួសារកសិករ គម្រោងនេះក៏គាំទ្រសេវាកម្មទីប្រឹក្សាដូចជា ការផ្ដល់វិញ្ញាបនប័ត្រកាហ្វេ ការសាកល្បងគំរូនៃការបន្សាំទៅនឹងការប្រែប្រួលអាកាសធាតុ និងជួយបច្ចេកទេសសម្រាប់កសិករស្ត្រី។ សេវាកម្មទាំងនេះរួមចំណែកដល់ការលើកកម្ពស់ភាពធន់នឹងការប្រែប្រួលអាកាសធាតុ និងការលើកកម្ពស់សមភាពយេនឌ័រនៅក្នុងខ្សែសង្វាក់តម្លៃកាហ្វេក្នុងតំបន់។
លោក Yasui Takehiro ប្រធាននាយកដ្ឋានហិរញ្ញវត្ថុ និងកិច្ចសហប្រតិបត្ដិការវិស័យឯកជន JICA ឲ្យដឹងថា “គម្រោងនេះគឺជាសក្ខីភាពសម្រាប់ទំនាក់ទំនងសហប្រតិបត្តិការជិតស្និទ្ធរវាង JICA ជាមួយ ECOM និង ADB។ គម្រោងនេះនឹងរួមចំណែកក្នុងការពង្រឹងខ្សែសង្វាក់ផ្គត់ផ្គង់កាហ្វេ និងដោះស្រាយបញ្ហាប្រឈមនានាដូចជា ភាពក្រីក្រនៅជនបទ វិសមភាពយេនឌ័រ ភាពងាយរងគ្រោះចំពោះការប្រែប្រួលអាកាសធាតុ ក៏ដូចជាតម្រូវការសម្រាប់ឱកាសអភិវឌ្ឍសេដ្ឋកិច្ចប្រកបដោយចីរភាពនៅក្នុងតំបន់៕
បកប្រែដោយ Pham Diep