កិច្ចពិភាក្សារវាងខេត្ត Gia Lai និងខេត្តរតនគិរី ស្ដីពីការធ្វើមាតុភូមិនិវត្តន៍អដ្ឋិធាតុយុទ្ធជនពលី

លោក ម៉ា វិចិត្រ អភិបាលរងខេត្ត ប្រធានគណៈកម្មការជំនាញខេត្តរតនគិរី និងសមាជិកគណៈកម្មការជំនាញខេត្ត បានទទួលជួបគណៈកម្មការជំនាញខេត្ត Gia Lai។

មានប្រសាសន៍ក្នុងជំនួបនេះ លោកស្រី Nguyen Thi Thanh Lich អនុប្រធានគណៈកម្មាធិការប្រជាជន និងជាប្រធានគណៈកម្មការជំនាញខេត្ត Gia Lai បានពាំនាំការផ្ដាំផ្ញើសារអបអរសាទរពីសំណាក់លោក Rah Lan Chung ប្រធានគណៈកម្មាធិការប្រជាជនខេត្ត Gia Lai ក្នុងឱកាសបុណ្យចូលឆ្នាំថ្មីប្រពៃណីជាតិរបស់កម្ពុជា ជូនចំពោះថ្នាក់ដឹកនាំខេត្ត និងគណៈកម្មការជំនាញខេត្តរតនគិរី ហើយជូនពរទំនាក់ទំនងវៀតណាម-កម្ពុជានិយាយរួម ខេត្ត Gia Lai - ខេត្តរតនគិរី និយាយដោយឡែកកាន់តែជិតស្និទ្ធ និងរឹងមាំ។

គណៈកម្មការជំនាញខេត្ត Gia Lai និងគណៈកម្មការជំនាញខេត្តរតនគិរី ចុះហត្ថលេខាលើកិច្ចព្រមព្រៀងស្ដីពីកិច្ចសហប្រតិបត្តិការ (រូបថត៖ baogialai.com.vn)

លោកស្រី Nguyen Thi Thanh Lich បានសង្កត់ធ្ងន់ថា ក្នុងរដូវប្រាំងឆ្នាំ ២០២៤-២០២៥ ទោះបីជួបការលំបាកជាច្រើនក៏ដោយ ក៏ប៉ុន្តែដោយទទួលពីការជួយគាំទ្រពីថ្នាក់ដឹកនាំខេត្ត គណៈកម្មការជំនាញខេត្ត ស្ថាប័នគ្រប់លំដាប់ថ្នាក់ និងប្រជាជនកម្ពុជា ក្រុម K៥២ បានស្វែងរក និងប្រមូលអដ្ឋិធាតុយុទ្ធជនពលីចំនួន ៨ អដ្ឋិធាតុ នាំមកនូវចំនួនអដ្ឋិធាតុយុទ្ធជនពលីដែលបានរកឃើញក្នុងខេត្តរតនគិរីឡើង ៥៤៨  អដ្ឋិធាតុ កាលពីឆ្នាំ២០០១មក។

លោក ម៉ា វិចិត្រ បានឲ្យដឹងថា នាពេលខាងមុខ គណៈកម្មការជំនាញខេត្តរតនគិរី នឹងបន្តដឹកនាំស្ថាប័ននៅគ្រប់លំដាប់ថ្នាក់ និងប្រជាពលរដ្ឋក្នុងខេត្ត សហការយ៉ាងជិតស្និទ្ធជាមួយក្រុម K៥២ ក្នុងការស្វែងរក និងប្រមូលអដ្ឋិធាតុយុទ្ធជនពលី។

ក្នុងកិច្ចពិភាក្សានេះ គណៈកម្មការជំនាញខេត្ត Gia Lai និងគណៈកម្មការជំនាញខេត្តរតនគិរី បានពិភាក្សា និងចុះហត្ថលេខាលើខ្លឹមសារសំខាន់ៗជាច្រើន ដើម្បីរៀបចំពិធីសូត្រមន្តបង្សុកូល និងប្រគល់អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាម ៨ អដ្ឋិធាតុ ដែលពលីជីវិតក្នុងសម័យសង្គ្រាមនៅកម្ពុជា ដែលស្វែងរកនិងប្រមូលដោយក្រុម K៥២ ក្នុងរដូវប្រាំង ២០២៤-២០២៥។

ក្នុងឱកាសនេះ លោកស្រី Nguyen Thi Thanh Lich និងសមាជិកនៃគណៈកម្មការជំនាញខេត្ត Gia Lai បានជូនអំណោយដល់គណៈកម្មការជំនាញខេត្តរតនគិរី ដើម្បីរឹតបន្តឹងស្មារតីសាមគ្គីភាព មិត្តភាព៕

បកប្រែដោយ Thuy Anh