កិច្ចសន្ទនាគោលនយោបាយការពារជាតិវៀតណាម-កម្ពុជាលើកទី៨

ទិដ្ឋភាពនៃកិច្ចសន្ទនា

នៅក្នុងកិច្ចសន្ទនា ភាគីទាំងពីរបានពិភាក្សាអំពីស្ថានភាពពិភពលោក និងតំបន់ រួមទាំងបញ្ហាដែលភាគីទាំងពីរមានការយកចិត្តទុកដាក់ដូចគ្នាក។ ភាគីទាំងពីរបានអះអាងថា នឹងបន្តរក្សាទំនាក់ទំនងមិត្តភាពប្រពៃណី ភាពជាអ្នកជិតខាងល្អ សាមគ្គីភាព និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ។

លោកឧត្តមសេនីយ៍ឯក Hoang Xuan Chien មានប្រសាសន៍នៅក្នុងកិច្ចសន្ទនា

ស្តីពីកិច្ចសហប្រតិបត្តិការការពារជាតិទ្វេភាគី ភាគីទាំងពីរបានឯកភាពបន្តពង្រឹងកិច្ចសហប្រតិបត្តិការដែលឈរលើការជឿទុកចិត្តទូលំទូលាយ និងភាពជាក់ស្តែង ដោយផ្តោតលើខ្លឹមសារដូចជា៖ ពង្រឹងការផ្លាស់ប្តូរគណៈប្រតិភូ ការជួបជុំថ្នាក់ជាន់ខ្ពស់ និងគ្រប់លំដាប់ថ្នាក់ ការលើកកម្ពស់ប្រសិទ្ធភាពនៃយន្តការសហប្រតិបត្តិការដែលមានស្រាប់ ការរក្សាកិច្ចសហប្រតិបត្តិការប្រកបដោយប្រសិទ្ធភាពក្នុងការបណ្តុះបណ្តាលធនធានមនុស្ស ការសហប្រតិបត្តិការក្នុងការគ្រប់គ្រង និងការពារព្រំដែនគោក និងលើសមុទ្រ ការបន្តផ្តល់ជំនួយ និងគាំទ្រគ្នាទៅវិញទៅមក ជំរុញកិច្ចសហប្រតិបត្តិការសេដ្ឋកិច្ចការពារជាតិ ការបង្កើនការឃោសនា និងការអប់រំសម្រាប់យោធិននៃប្រទេសនីមួយៗអំពីប្រវត្តិសាស្ត្រ អត្ថន័យ និងសារៈសំខាន់នៃទំនាក់ទំនងមិត្តភាពរវាងប្រជាជន និងកងទ័ពនៃប្រទេសទាំងពីរ កិច្ចសហប្រតិបត្តិការលើវិស័យច្បាប់យោធា និងការពារជាតិ បន្តពង្រឹង និងធ្វើឲ្យស៊ីជម្រៅថែមទៀតនូវទំនាក់ទំនងសហប្រតិបត្តិការរវាងកងទ័ពនៃប្រទេសទាំងពីរ ក៏ដូចជារវាងកងទ័ពនៃប្រទេសទាំងបី វៀតណាម-ឡាវ-កម្ពុជា។ល។

លោកនាយឧត្តមសេនីយ៍ ចាយ សាំងយុន នៅក្នុងកិច្ចសន្ទនា

ក្នុងឱកាសនេះ លោកនាយឧត្តមសេនីយ៍ ចាយ សាំងយុន ក៏បានចែករំលែកយ៉ាងជ្រាលជ្រៅជាមួយប្រជាជនវៀតណាម ចំពោះការខូចខាតដែលបង្កឡើងដោយព្យុះ និងទឹកជំនន់នាពេលកន្លងមក ព្រមទាំងអបអរសាទរវៀតណាមចំពោះការរៀបចំពិធីរំលឹកខួបលើកទី ៥០ នៃការរំដោះភាគខាងត្បូង បង្រួបបង្រួមប្រទេសជាតិ និងខួបលើកទី ៨០ នៃបដិវត្តន៍ខែសីហា និងទិវាបុណ្យឯករាជ្យជាតិថ្ងៃទី ២ ខែកញ្ញា ប្រកបដោយជោគជ័យ។

ភាគីទាំងពីរចុះហត្ថលេខាលើកំណត់ហេតុនៃកិច្ចសន្ទនា

លោកឧត្តមសេនីយ៍ឯក Hoang Xuan Chien បានថ្លែងអំណរគុណចំពោះមនោសញ្ចេតនាដ៏ល្អ និងការចែករំលែកពោរពេញទៅដោយមិត្តភាពដែលកម្ពុជាផ្តល់ជូនប្រជាជនវៀតណាមក្នុងអំឡុងពេលមានគ្រោះមហន្តរាយធម្មជាតិ និងទឹកជំនន់។ លោកឧត្តមសេនីយ៍ឯក Hoang Xuan Chien ក៏បានថ្លែងអំណរគុណដល់ក្រសួងការពារជាតិកម្ពុជា ដែលបានចាត់បញ្ជូនគណៈប្រតិភូជាន់ខ្ពស់ចូលរួម និងចាត់បញ្ជូនគណៈប្រតិភូយោធិនចូលរួមដង្ហែក្បួនព្យុហយាត្រា ក្នុងឱកាសរំលឹកខួបលើកទី ៥០ នៃការរំដោះភាគខាងត្បូង បង្រួបបង្រួមប្រទេសជាតិ និងខួបលើកទី ៨០ នៃបដិវត្តន៍ខែសីហា និងទិវាបុណ្យឯករាជ្យជាតិថ្ងៃទី ២ ខែកញ្ញា ដែលរួមចំណែកដល់ភាពជោគជ័យរួមនៃព្រឹត្តិការណ៍នេះ៕

បកប្រែដោយ Thanh Cong