លោក To Lam អគ្គលេខាបក្ស អញ្ជើញចូលរួមកិច្ចពិភាក្សាស្តីពី AI និងបច្ចេកវិទ្យា semiconductor នៅចក្រភពអង់គ្លេស

កិច្ចពិភាក្សានេះបានធ្វើឡើងនៅព្រឹកថ្ងៃទី ២៨ ខែតុលា ម៉ោងក្នុងស្រុក នៅទីក្រុងឡុងដ៍ ដែលរៀបចំដោយវេទិកាសកល Boston  (BGF) ហើយវាជាជំហានយុទ្ធសាស្ត្រមួយដើម្បីលើកកម្ពស់កិច្ចសហប្រតិបត្តិការរវាងវៀតណាម និងមហាអំណាចបច្ចេកវិទ្យានៅក្នុងយុគសម័យ AI ខណៈពេលដែលបញ្ជាក់ពីតួនាទីរបស់វៀតណាមក្នុងការធ្វើបរិវត្តកម្មឌីជីថលសកល។

លោក To Lam អគ្គលេខាបក្ស អញ្ជើញចូលរួមកិច្ចពិភាក្សាជាមួយអ្នកជំនាញបច្ចេកវិទ្យាមកពីចក្រភពអង់គ្លេស និងពិភពលោកស្តីពី AI និងបន្ទះឈីប semiconductor (រូបថត៖ vnanet.vn)

ព្រឹត្តិការណ៍នេះបានកើតឡើងនៅក្នុងបរិបទដែលពិភពលោកកំពុងមើលឃើញការផ្ទុះឡើងនៃ AI និងបន្ទះឈីប semiconductor ជាវិស័យពីរដែលកំណត់អនាគតនៃសេដ្ឋកិច្ចពិភពលោក។ ដោយមានសេចក្តីប្រាថ្នាចង់ក្លាយជាអ្នកត្រួសត្រាយផ្លូវក្នុងសេដ្ឋកិច្ចឌីជីថល វៀតណាមចង់រៀនសូត្រពីចក្រភពអង់គ្លេស - ដែលជាប្រភពនៃបដិវត្តន៍ឧស្សាហកម្ម និងជាប្រទេសកំណើតរបស់អ្នកប្រាជ្ញល្បីៗដូចជា Isaac Newton, John Locke, Adam Smith, Alan Turing, William Shakespeare និង Charles Dickens ក្នុងបំណងកសាងប្រព័ន្ធអេកូឡូស៊ីបច្ចេកវិទ្យាប្រកបដោយភាពច្នៃប្រឌិត មនុស្សធម៌ និងប្រកបដោយចីរភាព។ 

មានប្រសាសន៍កិច្ចពិភាក្សា លោក To Lam អគ្គលេខាបក្ស បានសម្តែងការរីករាយដែលបានជួប និងស្តាប់យោបល់ពីអ្នកជំនាញ និងអ្នកយុទ្ធសាស្ត្រនៅទីក្រុងឡុងដ៍ ដែលជាមជ្ឈមណ្ឌលបច្ចេកវិទ្យា និងនវានុវត្តន៍ពិភពលោក។ លោកអគ្គលេខាបក្សបានសង្កត់ធ្ងន់ថា ពិភពលោកកំពុងមើលឃើញការអភិវឌ្ឍគួរឱ្យកត់សម្គាល់នៃវិទ្យាសាស្ត្រ និងបច្ចេកវិទ្យា ជាពិសេសនៅពេលដែល AI បានក្លាយជាកម្លាំងចលករដ៏សំខាន់សម្រាប់កំណើនសេដ្ឋកិច្ច និងនវានុវត្តន៍។ វៀតណាមក៏បានកំណត់វិទ្យាសាស្ត្រ បច្ចេកវិទ្យា និងការធ្វើបរិវត្តកម្មឌីជីថលថាជារបកគំហើញឈានមុខគេសម្រាប់ការអភិវឌ្ឍយ៉ាងឆាប់រហ័ស និងប្រកបដោយចីរភាព និងឈានទៅមុខក្នុងខ្សែសង្វាក់តម្លៃសកល។ ដូច្នេះ វៀតណាមចង់រួមដំណើរជាមួយប្រទេសជឿនលឿនដើម្បីចែករំលែកចក្ខុវិស័យ និងតម្លៃរួម អាស្រ័យលើនេះកសាងពិភពលោកកាន់តែប្រសើរឡើង ដែល AI បម្រើប្រជាជន លើកកម្ពស់ភាពច្នៃប្រឌិត មនុស្សធ៌ម សន្តិភាព និងវិបុលភាព។ លោកអគ្គលេខាបក្សបានសង្កត់ធ្ងន់ថា វៀតណាមត្រៀមខ្លួនជាស្រេចដើម្បីស្វាគមន៍ និងសាកល្បងគំនិតត្រួសត្រាយផ្លូវទាំងឡាយ។

ទិដ្ឋភាពនៃកិច្ចពិភាក្សា (រូបថត៖ vnanet.vn)

អ្នកជំនាញបច្ចេកវិទ្យាជាច្រើនបានកោតសរសើរយ៉ាងខ្លាំងចំពោះការអភិវឌ្ឍប្រកបដោយថាមវន្តរបស់ប្រទេសវៀតណាម។ ក្នុងរយៈពេលតែមួយជំនាន់ប៉ុណ្ណោះ ប្រទេសវៀតណាមបានធ្វើឲ្យមនុស្សរាប់លាននាក់ចេញពីភាពក្រីក្រ កសាងសេដ្ឋកិច្ចផលិតកម្មដែលមានការប្រកួតប្រជែងបំផុតមួយនៅអាស៊ី និងមានកម្លាំងពលវ័យក្មេងដែលមានជំនាញឌីជីថល។ ជាពិសេស វឌ្ឍនភាពរបស់វៀតណាមក្នុងការកែទម្រង់រដ្ឋបាល និងភាពបើកចំហក្នុងកិច្ចសហប្រតិបត្តិការអន្តរជាតិ បានធ្វើឲ្យវៀតណាមជាដៃគូសំខាន់មួយនៅក្នុងបណ្តាញសកលនៃប្រទេសគួរឱ្យទុកចិត្ត។ មតិមួយចំនួនក៏បានណែនាំផងដែរថា ដើម្បីឱ្យ AI បម្រើដំណើរការអភិវឌ្ឍសេដ្ឋកិច្ចសង្គមយ៉ាងពិតប្រាកដ សំដៅនាំមកនូវជីវភាពរស់នៅកាន់តែប្រសើរដល់ប្រជាជននោះ រដ្ឋាភិបាលនៃប្រទេសនានាត្រូវផ្តោតលើការកសាងហេដ្ឋារចនាសម្ព័ន្ធឌីជីថលដែលអាចទុកចិត្តបាន ការអភិវឌ្ឍស្តង់ដារ AI ដែលទទួលខុសត្រូវក្នុងការការពារឯកជនភាព យុត្តិធម៌ និងតម្លាភាព៕

បកប្រែដោយ Duy Hoan