លោកឧត្តមសេនីយ៍ឯក Le Huy Vinh ទទួលជួបឯកអគ្គរដ្ឋទូតអ៊ុយក្រែន

នៅក្នុងជំនួប លោកឧត្តមសេនីយ៍ឯក Le Huy Vinh បានអះអាងថា ប្រជាជន និងកងទ័ពប្រជាជនវៀតណាមចងចាំជានិច្ចនូវការគាំទ្រ និងជំនួយដ៏មានតម្លៃដែលអ៊ុយក្រែនបានផ្តល់ជូនវៀតណាមក្នុងការតស៊ូដើម្បីបង្រួបបង្រួមជាតិ។ ដោយឈរលើមូលដ្ឋានប្រពៃណីនោះ ក្រសួងការពារប្រទេសវៀតណាមតែងតែយកចិត្តទុកដាក់យ៉ាងខ្លាំង និងជំរុញទំនាក់ទំនងសហប្រតិបត្តិការលើវិស័យការពារជាតិទ្វេភាគី ស្របតាមទំនាក់ទំនងភាពជាដៃគូ និងកិច្ចសហប្រតិបត្តិការគ្រប់ជ្រុងជ្រោយ វៀតណាម-អ៊ុយក្រែន។

លោកឧត្តមសេនីយ៍ឯក Le Huy Vinh ទទួលជួបឯកអគ្គរដ្ឋទូតអ៊ុយក្រែន

ស្តីពីទំនាក់ទំនងសហប្រតិបត្តិការលើវិស័យការពារជាតិរវាងប្រទេសទាំងពីរក្នុងរយៈពេលកន្លងមក លោកឧត្តមសេនីយ៍ឯក Le Huy Vinh បានឲ្យដឹងថា ភាគីទាំងពីរបានរក្សានូវខ្លឹមសារសហប្រតិបត្តិការមួយចំនួន ដូចជាការផ្លាស់ប្តូរគណៈប្រតិភូ និងការបណ្តុះបណ្តាលជាដើម។ លោកឧត្តមសេនីយ៍ឯក Le Huy Vinh បានស្នើថា នាពេលខាងមុខ ស្ថាប័នមានសមត្ថកិច្ចនៃក្រសួងការពារប្រទេសទាំងពីរ បន្តស្រាវជ្រាវលើវិស័យសហប្រតិបត្តិការសមស្របទៅនឹងតម្រូវការ និងសមត្ថភាពរបស់ភាគីនីមួយៗ។

លោកឧត្តមសេនីយ៍ឯក Le Huy Vinh ជឿជាក់ថា ក្នុងតួនាទីជាឯកអគ្គរដ្ឋទូត លោក Gaman Oleksandr នឹងបន្តរួមចំណែកក្នុងទំនាក់ទំនងលើវិស័យការពារជាតិ ស្របតាមទំនាក់ទំនងមិត្តភាពជាប្រពៃណី ភាពជាដៃគូ និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ។

លោកឧត្តមសេនីយ៍ឯក Le Huy Vinh ប្រគល់វត្ថុអនុស្សាវរីយ៍ជូនលោកឯកអគ្គរដ្ឋទូតអ៊ុយក្រែន

រីឯលោកឯកអគ្គរដ្ឋទូត Gaman Oleksandr បានថ្លែងអំណរគុណចំពោះថ្នាក់ដឹកនាំក្រសួងការពារប្រទេសវៀតណាម ដែលបានចំណាយពេលវេលាទទួលស្វាគមន៍លោក និងអបអរសាទរក្រសួងការពារប្រទេសវៀតណាម ដែលបានរៀបចំការតាំងពិព័រណ៍ការពារជាតិអន្តរជាតិវៀតណាមឆ្នាំ២០២៤ ប្រកបដោយជោគជ័យ។ ក្រសួងការពារជាតិអ៊ុយក្រែនក៏បានបញ្ជូនសហគ្រាសការពារជាតិទៅចូលរួម និងតាំងបង្ហាញផលិតផលនៅឯពិព័រណ៍នេះដែរ។

លោកឯកអគ្គរដ្ឋទូត Gaman Oleksandr បានសម្តែងនូវបំណងចង់ឲ្យ​ក្រសួងការពារជាតិអ៊ុយក្រែនអាចបន្តបញ្ជូនគណៈប្រតិភូផ្លូវការទៅចូលរួមការតាំងពិព័រណ៍ការពារជាតិបន្ទាប់ដែលត្រូវបានរៀបចំឡើងនៅប្រទេសវៀតណាម។ លោកឯកអគ្គរដ្ឋទូត Gaman Oleksandr សង្ឃឹមថា កិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរនាពេលខាងមុខ នឹងត្រូវបានយកចិត្តទុកដាក់ និងជំរុញ ឲ្យ​ស្របតាមក្របខ័ណ្ឌនៃទំនាក់ទំនងរវាងវៀតណាម និងអ៊ុយក្រែន ដោយឈរលើមូលដ្ឋាននៃកិច្ចសហប្រតិបត្តិការស្មើភាព និងផលប្រយោជន៍ទៅវិញទៅមក៕

បកប្រែដោយ Huyen Trang