សមាគមមិត្តភាពវៀតណាម-កម្ពុជា ប្រារព្ធខួបលើកទី៥០ នៃការបង្កើត និងទទួលគ្រឿងឥស្សរិយយសពលកម្មថ្នាក់ទី១

ដោយពិនិត្យឡើងវិញនូវដំណើរការបង្កើត និងអភិវឌ្ឍន៍សមាគម លោកស្រី Nguyen Thi Thanh ប្រធានសមាគមមិត្តភាព វៀតណាម-កម្ពុជា បានចែករំលែកថា សមាគមត្រូវបានបង្កើតឡើងនៅថ្ងៃទី២២ ខែមករា ឆ្នាំ១៩៧៥ ជាពេលដែលការតស៊ូរំដោះជាតិរបស់ប្រជាជននៃប្រទេសទាំងពីរបានឈានចូលដំណាក់កាលសម្រេចបានជ័យជំនះទាំងស្រុង។ នេះជាគោលនយោបាយសំខាន់ គំនិតផ្តួចផ្តើមបង្ហាញពីចក្ខុវិស័យយុទ្ធសាស្ត្ររបស់បក្ស និងរដ្ឋវៀតណាម ដើម្បីពង្រឹង និងពង្រីកទំនាក់ទំនងអ្នកជិតខាងជាប្រពៃណី រួមចំណែកកសាងមូលដ្ឋានគ្រឹះនៃកិច្ចសហប្រតិបត្តិការយូរអង្វែង និងនិរន្តរភាពរវាងប្រទេសទាំងពីរ និងប្រជាជននៃប្រទេសទាំងពីរ។

លោកស្រី  Nguyen Thi Thanh ប្រធានសមាគមមិត្តភាព វៀតណាម-កម្ពុជា ថ្លែងនៅក្នុងពិធី

ចាប់តាំងពីបង្កើតឡើងមក សមាគមមិត្តភាព វៀតណាម-កម្ពុជា តែងតែអនុវត្តតាមគោលការណ៍ និងមាគ៌ារបស់បក្ស និងរដ្ឋ ដោយតែងតែផ្លាស់ថ្មីទាំងខ្លឹមសារ ទម្រង់ និងរបៀបប្រតិបត្តិការ ឱ្យសមស្របទៅនឹងគោលបំណងរបស់សមាគម និងសម័យកាលប្រវត្តិសាស្ត្រនីមួយៗនៃប្រទេស និងទំនាក់ទំនងវៀតណាម-កម្ពុជា។

ប្រតិភូចូលរួមពិធី

ក្រោយរយៈពេល ៥០ ឆ្នាំនៃការរីកចម្រើន និងអភិវឌ្ឍន៍ សមាគមមិត្តភាព វៀតណាម-កម្ពុជា សម្រេចបានសមិទ្ធិផលសំខាន់ៗ និងគួរឲ្យមោទនភាព។ ដោយទទួលស្គាល់ និងវាយតម្លៃខ្ពស់ចំពោះការរួមចំណែករបស់សមាគមគ្រប់លំដាប់ថ្នាក់ក្នុងរយៈពេល ៥០ ឆ្នាំកន្លងមក បក្ស រដ្ឋវៀតណាម និងព្រះមហាក្សត្រ និងរាជរដ្ឋាភិបាលនៃព្រះរាជាណាចក្រកម្ពុជាបានប្រគល់រង្វាន់ដ៏ថ្លៃថ្លាជាច្រើនដល់សមាគម។

លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម ប្រគល់គ្រឿងឥស្សរិយយសពលកម្មថ្នាក់ទី១ ដល់សមាគមមិត្តភាពវៀតណាម-កម្ពុជា

ថ្លែងក្នុងពិធីនេះ លោក វ៉ាន់ ផល អនុប្រធានសមាគមមិត្តភាពកម្ពុជា-វៀតណាម បានថ្លែងអំណរគុណយ៉ាងជ្រាលជ្រៅ និងចងចាំនូវការលះបង់ដ៏ថ្លៃថ្លារបស់កងទ័ពស្ម័គ្រចិត្ត និងអ្នកជំនាញវៀតណាម ដែលរួមជាមួយកងទ័ព និងប្រជាជនកម្ពុជា ផ្តួលរំលំរបបប្រល័យពូជសាសន៍ខ្មែរក្រហម ព្រមទាំងថ្លែងអំណរគុណចំពោះសមាគមមិត្តភាព វៀតណាម-កម្ពុជា ដែលតែងតែគាំទ្រសមាគមមិត្តភាព កម្ពុជា-វៀតណាម និងជួយប្រជាជនកម្ពុជាតាមរយៈសកម្មភាពជំនួយមនុស្សធម៌ជាច្រើន។ លោក វ៉ាន់ ផល សង្ឃឹមថា សកម្មភាពរបស់សមាគមមិត្តភាពនៃប្រទេសទាំងពីរនឹងរួមចំណែកយ៉ាងសំខាន់ក្នុងការពង្រឹងទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងប្រជាជននៃប្រទេសទាំងពីរ កម្ពុជា-វៀតណាម ឱ្យកាន់តែរឹងមាំ និងយូរអង្វែងថែមទៀត។

ក្នុងឱកាសនេះ លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម បានប្រគល់គ្រឿងឥស្សរិយយសពលកម្មថ្នាក់ទី១ ដល់សមាគមមិត្តភាពវៀតណាម-កម្ពុជា៕

បកប្រែដោយ Huyen Trang