ដំណើរទស្សនកិច្ចរបស់លោក Pham Minh Chinh នាយករដ្ឋមន្ត្រីវៀតណាម ទៅកាន់ប្រទេសចិន ទទួលបានលទ្ធផលសំខាន់ៗជាច្រើន

ក្នុងឱកាសនេះ លោក Bui Thanh Son រដ្ឋមន្ត្រីក្រសួងការបរទេសវៀតណាម  បានផ្តល់បទសម្ភាសន៍ដល់សារព័ត៌មានអំពីលទ្ធផលនៃដំណើរទស្សនកិច្ចរបស់លោក Pham Minh Chinh និងគណៈប្រតិភូជាន់ខ្ពស់វៀតណាមទៅកាន់ប្រទេសចិន។ ខាងក្រោមនេះជាខ្លឹមសារសំខាន់នៃបទសម្ភាសន៍។

ពិធីទទួលស្វាគមន៍ជាផ្លូវការជូនលោក Pham Minh Chinh និងគណៈប្រតិភូជាន់ខ្ពស់វៀតណាមទៅបំពេញទស្សនកិច្ចជាផ្លូវការនៅប្រទេសចិន ក្រោមអធិបតីភាពដោយលោក Li Qiang នាយករដ្ឋមន្ត្រីចិន

អ្នកសារព័ត៌មាន៖ សូមគោរពលោករដ្ឋមន្ត្រី តើលោកវាយតម្លៃយ៉ាងដូចម៉្តេចពីលទ្ធផលសំខាន់ៗដែលសម្រេចបានក្នុងអំឡុងដំណើរទស្សនកិច្ចផ្លូវការរបស់លោក Pham Minh Chinh ទៅកាន់ប្រទេសចិន?

លោករដ្ឋមន្ត្រី Bui Thanh Son៖ នេះគឺជាដំណើរទស្សនកិច្ចលើកដំបូងរបស់លោក Pham Minh Chinh ទៅកាន់ប្រទេសចិនក្នុងឋានៈជានាយករដ្ឋមន្ត្រី ហើយត្រូវបានប្រព្រឹត្តទៅក្នុងឱកាសដែលវៀតណាម និងចិនប្រារព្ធខួបលើកទី ១៥ នៃការបង្កើតក្របខ័ណ្ឌភាពជាដៃគូក្នុងបរិបទនៃទំនាក់ទំនងបក្សទាំងពីរ ប្រទេសទាំងពីរ រក្សាបានស្ថានភាពអភិវឌ្ឍន៍ និងសម្រេចបានលទ្ធផលវិជ្ជមានថ្មីៗជាច្រើន ចាប់តាំងពីដំណើរទស្សនកិច្ចផ្លូវការទៅកាន់ប្រទេសចិន មានសារៈសំខាន់ជាប្រវត្តិសាស្ត្ររបស់លោក Nguyen Phu Trong អគ្គលេខាបក្សកុម្មុយនិស្តវៀតណាម នាចុងឆ្នាំ ២០២២។

ដំណើរទស្សនកិច្ចផ្លូវការរបស់លោក Pham Minh Chinh ទៅកាន់ប្រទេសចិនលើកនេះ មានសារសំខាន់ណាស់ក្នុងការបញ្ជាក់ការប្តេជ្ញាចិត្តរួមរបស់អគ្គលេខាបក្សទាំងពីរ ជាពិសេសសេចក្តីថ្លែងការណ៍រួមខែវិច្ឆិកា ឆ្នាំ២០២២ ស្តីពីការបន្តជំរុញ និងពង្រឹងទំនាក់ទំនងភាពជាដៃគូសហប្រតិបត្តិការយុទ្ធសាស្ត្រលើគ្រប់វិស័យរវាងប្រទេសទាំងពីរ។  ដំណើរទស្សនកិច្ចនេះទទួលបានជោគជ័យយ៉ាងត្រចះត្រចង់ និងសម្រេចបាននូវលទ្ធផលសំខាន់ៗជាច្រើន ដែលឆ្លុះបញ្ចាំងលើទិដ្ឋភាពទាំង ៤ ៖

ទីមួយ ជំនឿទុកចិត្តខាងនយោបាយរវាងប្រទេសទាំងពីរត្រូវបានពង្រឹងយ៉ាងខ្លាំងក្លា បង្កើតមូលដ្ឋានសំខាន់មួយសម្រាប់ជំរុញ និងធ្វើឱ្យស៊ីជម្រៅថែមទៀតនូវទំនាក់ទំនងភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយវៀតណាម-ចិន ក្នុងស្ថានភាពថ្មី ដែលផ្តល់ផលប្រយោជន៍ដល់ប្រជាជននៃប្រទេសទាំងពីរ។ ក្នុងជំនួបនោះ ថ្នាក់ដឹកនាំជាន់ខ្ពស់ចិនទាំងអស់បានអះអាងថា ចិនយកចិត្តទុកដាក់យ៉ាងខ្លាំងចំពោះទំនាក់ទំនងមិត្តភាពរវាងបក្សទាំងពីរ និងប្រទេសទាំងពីរ ដោយបង្ហាញពីភាពស្មោះត្រង់ និងសុច្ឆន្ទៈក្នុងការពង្រឹងកិច្ចសហប្រតិបត្តិការឱ្យកាន់តែស៊ីជម្រៅរវាងភាគីទាំងពីរ ជាពិសេសលើបណ្តាញបក្ស លើវិស័យសំខាន់ៗដូចជា ការការពារជាតិ និងសន្តិសុខ។ ជាពិសេស លោក Xi Jinping អគ្គលេខាបក្ស និងជាប្រធានរដ្ឋចិនបានអះអាងថា ការអភិវឌ្ឍទំនាក់ទំនងជាមួយវៀតណាមគឺជាជម្រើសយុទ្ធសាស្ត្ររបស់ចិន ហើយចិនយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងយូរអង្វែងជាមួយវៀតណាម។

ទីពីរ ភាគីទាំងពីរឈានដល់ការប្តេជ្ញាចិត្តរួមសំខាន់ៗជាច្រើន ហើយបានឯកភាពលើវិធានការជាក់លាក់ជាច្រើន ដើម្បីជំរុញកិច្ចសហប្រតិបត្តិការលើវិស័យផ្សេងៗរវាងប្រទេសទាំងពីរ រួមចំណែកបង្កើតមូលដ្ឋានសម្ភារៈសំខាន់ៗសម្រាប់ជំរុញទំនាក់ទំនងទ្វេភាគីវៀតណាម-ចិន នាពេលខាងមុខ។ ភាគីទាំងពីរបានឯកភាពលើកកំពស់គុណភាពនៃកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគ ជំរុញការតភ្ជាប់ដឹកជញ្ជូន រក្សាពាណិជ្ជកម្មឱ្យរលូន និងធានាបាននូវសង្វាក់ផលិតកម្ម និងការផ្គត់ផ្គង់។ ភាគីចិនបានអះអាងថា នឹងបង្កើនការនាំចូលទំនិញវៀតណាម បង្កើនកូតាទំនិញវៀតណាមឆ្លងកាត់ផ្លូវដែករបស់ចិនទៅកាន់ប្រទេសទីបី និងពង្រីកការវិនិយោគគុណភាពខ្ពស់របស់ចិនលើវិស័យសមស្របទៅនឹងតម្រូវការរបស់វៀតណាម។

ទីបី បង្កើនការយោគយល់គ្នាដោយមិត្តភាព និងពង្រឹងមូលដ្ឋានសង្គមសម្រាប់ការអភិវឌ្ឍ ទំនាក់ទំនងរវាងប្រទេសទាំងពីរ។ ភាគីទាំងពីរសម្រេចបាននូវកិច្ចព្រមព្រៀងសំខាន់ៗជាច្រើនស្តីពីការរក្សាការផ្លាស់ប្តូរ និងទំនាក់ទំនងជាប្រចាំតាមរយៈបណ្តាញរបស់បក្ស រដ្ឋាភិបាល រដ្ឋសភា រណសិរ្សមាតុភូមិ រវាងក្រសួង ស្ថាប័ន មូលដ្ឋាន និងជាពិសេសរវាងប្រជាជននៃប្រទេសទាំងពីរ។

ទីបួន ដំណើរទស្សនកិច្ចមានសកម្មភាពសម្បូរបែបជាច្រើន លទ្ធផលដែលសម្រេចបានមានសារៈសំខាន់ណាស់។ ក្រៅពីសកម្មភាពផ្លូវការ លោក Pham Minh Chinh នាយករដ្ឋមន្ត្រីបានចូលរួម និងមានប្រសាសន៍នៅវេទិកាធុរកិច្ចវៀតណាម-ចិន ដោយមានការចូលរួមពីធុរកិច្ចចិនមួយចំនួនធំ ជួបសំណេះសំណាលជាមួយឥស្សរជនមិត្តភាព  សហគ្រាសធំៗរបស់ចិនជាច្រើន... សហគ្រាសទាំងអស់វាយតម្លៃបរិយាកាស និងទស្សនវិស័យវិនិយោគរបស់វៀតណាម ហើយបានសម្តែងនូវបំណងចង់ពង្រីកការវិនិយោគនៅវៀតណាមនាពេលខាងមុខ។

អ្នកសារព័ត៌មាន៖ តើអ្វីៗជាអត្ថន័យ និងលទ្ធផលនៃការចូលរួមរបស់វៀតណាមក្នុងវេទិកាសេដ្ឋកិច្ចពិភពលោកក្រុងធានជីន (កិច្ចប្រជុំ WEF Tianjin) ឆ្នាំនេះទេ?

រដ្ឋមន្ត្រី Bui Thanh Son៖ ដោយប្រធានបទ “សហគ្រាស៖ កម្លាំងចលករនៃសេដ្ឋកិច្ចពិភពលោក”  កិច្ចប្រជុំ WEF Tianjin (Summer Davos) 2023 ដែលរៀបចំឡើងដោយ WEF សហការជាមួយរដ្ឋាភិបាលចិន មានអត្ថន័យដ៏ធំធេង សំខាន់ៗ។ នេះគឺជាព្រឹត្តិការណ៍សេដ្ឋកិច្ចឈានមុខគេមួយរបស់ពិភពលោក ដោយបានប្រមូលផ្តុំមេដឹកនាំរដ្ឋាភិបាលជាច្រើនមកពីប្រទេសជាច្រើន និងសាជីវកម្មប្រមាណ ១,៤០០  ធំៗលើពិភពលោក។

ដោយធ្វើឡើងក្នុងបរិបទដែលសេដ្ឋកិច្ចពិភពលោកកំពុងប្រឈមមុខនឹងការលំបាក និងបញ្ហាប្រឈមជាច្រើន កិច្ចប្រជុំបានផ្តោតលើការវាយតម្លៃ ការផ្លាស់ប្តូរ និងការស្វែងរកទិសដៅ និងដំណោះស្រាយ ជាពិសេសការសម្របសម្រួលរវាងរដ្ឋ និងសហគ្រាស ដើម្បីរក្សាសន្ទុះកំណើន ទប់ទល់នឹង "ខ្យល់ព្យុះ"  ដែលប៉ះពាល់យ៉ាងធ្ងន់ធ្ងរដល់កំណើនសេដ្ឋកិច្ចពិភពលោកទាំងក្នុងរយៈពេលខ្លី និងរយៈពេលវែង។

ការចូលរួមរបស់លោក Pham Minh Chinh នាយករដ្ឋមន្ត្រីវៀតណាមនៅ WEF Tianjin មានអត្ថន័យជាច្រើន និងសម្រេចបានលទ្ធផលសំខាន់ៗជាច្រើន ដែលបានបង្ហាញយ៉ាងច្បាស់ដូចខាងក្រោម៖

ទីមួយ លោក Pham Minh Chinh បានចែករំលែកនូវទស្សនៈជាច្រើន វិធីសាស្រ្ត ទិសដៅ និងដំណោះស្រាយប្រកបដោយប្រសិទ្ធភាព ជាក់ស្តែង និងទាន់ពេលវេលា ដែលកើតចេញពីការអនុវត្ត និងបទពិសោធន៍របស់វៀតណាម ដើម្បីជំរុញកំណើនសេដ្ឋកិច្ច ជំរុញកំណើនសេដ្ឋកិច្ចពិភពលោក។ សាររបស់នាយករដ្ឋមន្ត្រីស្តីពីកត្តាជាមូលដ្ឋានចំនួនបីសម្រាប់ការអភិវឌ្ឍសេដ្ឋកិច្ចគឺធានាបាននូវសន្តិភាព ស្ថិរភាព សាមគ្គីភាព កិច្ចសហប្រតិបត្តិការអន្តរជាតិ សកលលោក គ្រប់ជ្រុងជ្រោយ ជាពិសេសការបើកចំហធនធាន ជំរុញកំណើន និងលើកកម្ពស់សក្តានុពលនៃសហគ្រាសធុនតូច និងមធ្យម។

ទីពីរ ការចូលរួមរបស់លោក Pham Minh Chinh បានបន្តរួមចំណែកជំរុញយ៉ាងសំខាន់នូវទំនាក់ទំនងរវាងវៀតណាម និង WEF។ ការចុះហត្ថលេខាលើអនុស្សារណៈយោគយល់គ្នាស្តីពីកិច្ចសហប្រតិបត្តិការរវាងភាគីទាំងពីរសម្រាប់រយៈពេល ២០២៣-២០២៦  ដោយផ្តោតលើវិស័យដែលអាចធ្វើទៅបានដូចជា នវានុវត្តន៍ ការផ្លាស់ប្តូរបៃតង ហិរញ្ញវត្ថុបៃតង ការផ្លាស់ប្តូរឌីជីថល ... បានបង្កើតមូលដ្ឋានគ្រឹះសម្រាប់ពង្រឹងទំនាក់ទំនងទ្វេភាគីក្នុងរយៈពេលថ្មី។ ជាមួយនឹងលទ្ធផលដ៏សំខាន់នេះ WEF នឹងជំរុញកិច្ចសហប្រតិបត្តិការបន្ថែមទៀត គាំទ្រវៀតណាមក្នុងការណែនាំគោលនយោបាយ និងបង្កើនសមត្ថភាពសម្របខ្លួនទៅនឹងនិន្នាការអភិវឌ្ឍន៍ថ្មី។

ទីបី ការចូលរួមរបស់វៀតណាមក្នុងសន្និសីទជាមួយនឹងការជួបប្រាស្រ័យ និងការផ្លាស់ប្តូរជាលក្ខណៈបើកចំហ និងមិត្តភាពជាច្រើនរវាងនាយករដ្ឋមន្រ្តី និងថ្នាក់ដឹកនាំនៃសាជីវកម្មឈានមុខគេបានរួមចំណែកបន្តផ្សព្វផ្សាយទៅកាន់សហគមន៍ធុរកិច្ចឧស្សាហកម្មសកលអំពីសមិទ្ធផល សក្ដានុពល ភាពរឹងមាំ គោលដៅ និងការអភិវឌ្ឍរបស់វៀតណាម។

នេះជាឱកាសដ៏មានតម្លៃសម្រាប់ធុរកិច្ចបរទេសស្វែងយល់យ៉ាងស៊ីជម្រៅអំពីគោលការណ៍ណែនាំ គោលនយោបាយ និងបរិយាកាសវិនិយោគ ដោយហេតុនេះបង្កើនទំនុកចិត្ត និងជំរុញការវិនិយោគ និងធុរកិច្ចនៅវៀតណាម។

អាចបញ្ជាក់បានថា ការចូលរួមលើកដំបូងរបស់លោក Pham Minh Chinh នៅ WEF Tianjin បានធ្វើឱ្យមានការចាប់អារម្មណ៍ល្អចំពោះសហគមន៍ធុរកិច្ចអន្តរជាតិអំពីតួនាទី និងគោលជំហររបស់វៀតណាម សក្ដានុពល និងទស្សនវិស័យដ៏ភ្លឺស្វាងនៃសេដ្ឋកិច្ចវៀតណាម។ ការរួមវិភាគទានជាក់ស្តែងរបស់វៀតណាមនៅសន្និសីទ WEF Tianjin បានរួមចំណែកយ៉ាងសំខាន់ចំពោះជោគជ័យនៃកិច្ចប្រជុំ រួមចំណែកជំរុញទំនាក់ទំនងវៀតណាម-WEF បន្តបង្កើនការទាក់ទាញប្រភពធនធានខាងក្រៅដើម្បីបម្រើសេចក្តីត្រូវការសម្រាប់ការអនុវត្តនូវគោលដៅអភិវឌ្ឍន៍សេដ្ឋកិច្ច សង្គមនៃប្រទេសជាតិ។

អ្នកសារព័ត៌មាន៖ អរគុណច្រើនលោករដ្ឋមន្ត្រី!

បកប្រែដោយ Minh Trung