មូលដ្ឋានគ្រឹះនយោបាយសម្រាប់ទំនាក់ទំនងយូរអង្វែង និងនិរន្តរភាពរវាងវៀតណាម និងរុស្ស៊ី

ក្នុងបរិយាកាសមិត្តភាព លោក Nguyen Phu Trong បានស្វាគមន៍យ៉ាងកក់ក្តៅចំពោះលោក Dmitry Medvedev មកបំពេញទស្សនកិច្ចជាផ្លូវការនៅវៀតណាម ដោយសង្កត់ធ្ងន់ថា នេះជាដំណើរទស្សនកិច្ចលើកដំបូងនៅវៀតណាម របស់លោក Dmitry Medvedev ក្នុងនាមជាប្រធានគណបក្សរួបរួមរុស្ស៊ី ដែលកាន់អំណាច។

leftcenterrightdel
លោក Nguyen Phu Trong ទទួលស្វាគមន៍យ៉ាងកក់ក្តៅចំពោះលោក Dmitry Medvedev មកបំពេញទស្សនកិច្ចជាផ្លូវការនៅវៀតណាម (រូបថត៖ vnanet.vn)

ថ្នាក់ដឹកនាំទាំងពីរបានសម្តែងនូវក្តីរីករាយចំពោះការបន្តពូនជ្រំនូវទំនាក់ទំនងមិត្តភាពប្រពៃណីដ៏ល្អប្រសើរ និងភាពជាដៃគូយុទ្ធសាស្ត្រលើគ្រប់វិស័យរវាងប្រទេសទាំងពីរ ទំនាក់ទំនងកិច្ចសហប្រតិបត្តិការជិតស្និទ្ធរវាងបក្សទាំងពីរត្រូវបានឈរលើមូលដ្ឋាននៃទំនុកចិត្តនយោបាយខ្ពស់តាមរយៈទស្សនកិច្ចកម្រិតខ្ពស់រវាងភាគីទាំងពីរ ក្នុងនោះរួមទាំងការសន្ទនាតាមទូរស័ព្ទរវាងលោក Nguyen Phu Trong អគ្គលេខាបក្ស និងលោក Vladimir Putin ប្រធានាធិបតី និងលោក Dmitry Medvedev ជាដើម។

ថ្នាក់ដឹកនាំទាំងពីរបានផ្លាស់ប្តូរទស្សនៈ និងវាយតម្លៃរបស់ភាគីនីមួយៗអំពីស្ថានភាពអន្តរជាតិបច្ចុប្បន្ន អំពីទិសដៅសំខាន់ៗសម្រាប់ជំរុញការអភិវឌ្ឍជាវិជ្ជមាននៅក្នុងពិភពលោក និងទស្សនៈលើបញ្ហាដែលភាគីទាំងពីរមានការយកចិត្តទុកដាក់ដូចគ្នា។ ថ្នាក់ដឹកនាំទាំងពីរក៏បានពិភាក្សាអំពីទិសដៅសំខាន់ៗ ដើម្បីពង្រឹងបន្ថែមទៀតនូវទំនាក់ទំនងរវាងបក្ស និងប្រទេសទាំងពីរដូចជា៖ ការបន្តបង្កើនការយល់ដឹង និងការជឿទុកចិត្តគ្នាផ្នែកនយោបាយ តាមរយៈដំណើរទស្សនកិច្ចកម្រិតខ្ពស់ ការបង្កើនប្រសិទ្ធភាព និងពង្រីកកិច្ចសហប្រតិបត្តិការលើវិស័យសេដ្ឋកិច្ច វិទ្យាសាស្ត្រ បច្ចេកវិទ្យា វប្បធម៌ អប់រំ និងវិស័យផ្សេងៗទៀត យោងតាមកិច្ចព្រមព្រៀងរវាងភាគីទាំងពីរ។ ភាគីទាំងពីរយកចិត្តទុកដាក់ និងបំប៉ុនយុវជនជំនាន់ក្រោយ បង្កើនការផ្លាស់ប្តូរ និងទំនាក់ទំនងរវាងអង្គការមហាជន និងយុវជននៃបក្សទាំងពីរ ជំរុញយន្តការ និងកិច្ចសហប្រតិបត្តិការពាណិជ្ជកម្ម និងការវិនិយោគទ្វេភាគី និងពហុភាគី បង្កើនការផ្លាស់ប្តូរព័ត៌មានអំពីស្ថានភាពអន្តរជាតិ កិច្ចសហប្រតិបត្តិការរវាងទីភ្នាក់ងារបរទេសនៃប្រទេសទាំងពីរ និងការសម្របសម្រួលនៅវេទិកាអន្តរជាតិ។

leftcenterrightdel
លោក Vo Van Thuong ប្រធានរដ្ឋវៀតណាម ទទួលជួបលោក Dmitry Medvedev (រូបថត៖ vnanet.vn)

ថែរក្សា និងអភិវឌ្ឍគុណតម្លៃល្អនៃទំនាក់ទំនង មិត្តភាពប្រពៃណី

នារសៀលថ្ងៃទី២២ ឧសភា នៅវិមានប្រធានរដ្ឋ លោក Vo Van Thuong ប្រធានរដ្ឋវៀតណាម បានទទួលជួបលោក Dmitry Medvedev ប្រធានគណបក្សរួបរួមរុស្ស៊ី និងជាអនុប្រធានក្រុមប្រឹក្សាសន្តិសុខនៃសហព័ន្ធរុស្ស៊ី។

ក្នុងឱកាសនេះ លោក Vo Van Thuong បានថ្លែងអំណរគុណចំពោះរុស្ស៊ី ដែលបានបន្តផ្តល់អាហារូបករណ៍ប្រចាំឆ្នាំដល់និស្សិតវៀតណាមទៅសិក្សានៅរាល់គ្រឹះស្ថានអប់រំ និងបណ្តុះបណ្តាលរបស់រុស្ស៊ី។ លោកប្រធានរដ្ឋជឿជាក់ថា កិច្ចប្រជុំលើកទី៤ នៃគណៈកម្មាធិការសម្របសម្រួលអន្តររដ្ឋាភិបាលវៀតណាម-រុស្ស៊ី ស្តីពីការអប់រំ វិទ្យាសាស្ត្រ និងបច្ចេកវិទ្យា ដែលគ្រោងនឹងរៀបចំឡើងនៅចុងឆ្នាំនេះ នឹងបន្តបើកឱកាសថ្មីសម្រាប់កិច្ចសហប្រតិបត្តិការលើវិស័យវិទ្យាសាស្ត្រ និងបច្ចេកវិទ្យា។

ថ្នាក់ដឹកនាំទាំងពីរបានឯកភាពគ្នានាពេលខាងមុខ នឹងបន្តជំរុញការផ្លាស់ប្តូររវាងប្រជាជន និងប្រជាជន រួមទាំងយុវជនជំនាន់ក្រោយផងដែរ លើកតម្កើងតួនាទីនៃសមាគមមិត្តភាពរវាងប្រទេសទាំងពីរ សំដៅបង្កើនការយល់ដឹង ក៏ដូចជារក្សាតម្លៃដ៏ល្អនៃទំនាក់ទំនងមិត្តភាពប្រពៃណីដែលមានប្រវត្តិជិត ៧៥ ឆ្នាំកន្លងមក។

នៅក្នុងជំនួបនេះ លោកប្រធានរដ្ឋ ក៏បានថ្លែងអំណរគុណ និងស្នើឱ្យថ្នាក់ដឹកនាំរុស្ស៊ី រដ្ឋាភិបាល និងគណបក្សរួបរួមរុស្ស៊ីបន្តយកចិត្តទុកដាក់ និងបង្កលក្ខណៈងាយស្រួលសម្រាប់សហគមន៍ជនវៀតណាមនៅរុស្ស៊ីក្នុងការរស់នៅ និងធ្វើអាជីវកម្ម យូរអង្វែង និងមានលក្ខណៈស្ថិរភាព។ ក្នុងឱកាសនេះដែរ លោក Vo Van Thuong ប្រធានរដ្ឋ ក៏បានផ្តាំផ្ញើនូវការសួរសុខទុក្ខជូនដល់លោក Vladimir Putin ប្រធានាធិបតីសហព័ន្ធរុស្ស៊ីផងដែរ។

leftcenterrightdel
លោក Pham Minh Chinh នាយករដ្ឋមន្ត្រីវៀតណាម ទទួលជួប និងពិភាក្សាការងារជាមួយលោក Dmitry Medvedev 

លើកកំពស់ប្រសិទ្ធភាពនៃកិច្ចសហប្រតិបត្តិការទ្វេភាគីក្នុងស្មារតីសម្របសម្រួលគ្នានូវផលប្រយោជន៍ និងចែករំលែកការលំបាក

នាថ្ងៃដដែល នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រីវៀតណាម បានទទួលជួប និងពិភាក្សាការងារជាមួយលោក Dmitry Medvedev ប្រធានគណបក្សរួបរួមរុស្ស៊ី និងជាអនុប្រធានក្រុមប្រឹក្សាសន្តិសុខសហព័ន្ធរុស្ស៊ី។

លោក Pham Minh Chinh បានសម្តែងនូវសេចក្តីរីករាយដែលបានជួបជាមួយលោក Dmitry Medvedev និងសមាជិកនៃគណៈប្រតិភូជាន់ខ្ពស់នៃសហព័ន្ធរុស្ស៊ី មកបំពេញទស្សនកិច្ចនៅវៀតណាម។ លោកនាយករដ្ឋមន្រ្តីបានចាត់ទុកថា ដំណើរទស្សនកិច្ចនៅវៀតណាមរបស់លោក Dmitry Medvedev លើកនេះ គឺជាឱកាសសម្រាប់ភាគីទាំងពីរពិភាក្សាអំពីកិច្ចសហប្រតិបត្តិការរវាងបក្ស និងប្រទេសទាំងពីរ ដើម្បីបង្កើនការយល់ដឹងគ្នាទៅវិញទៅមក និងបន្តឯកភាពគ្នាលើវិធានការជំរុញកិច្ចសហប្រតិបត្តិការទ្វេភាគីឱ្យកាន់តែមានប្រសិទ្ធភាពថែមទៀត ដើម្បីផលប្រយោជន៍ប្រជាជន និងការអភិវឌ្ឍនៃប្រទេសទាំងពីរ។

លោក Dmitry Medvedev បានថ្លែងអំណរគុណចំពោះភាគីវៀតណាមចំពោះការទទួលស្វាគមន៍យ៉ាងកក់ក្តៅនេះ និងបានសង្កត់ធ្ងន់ថា វៀតណាមគឺជាដៃគូដ៏សំខាន់មួយរបស់រុស្ស៊ី នៅក្នុងតំបន់អាស៊ីប៉ាស៊ីហ្វិក ជាពិសេសនៅអាស៊ីអាគ្នេយ៍។ លោកបានអះអាងថា រុស្ស៊ីមានបំណងរួមជាមួយវៀតណាម ដើម្បីអភិវឌ្ឍបន្ថែមទៀតលើវិស័យសហប្រតិបត្តិការទ្វេភាគី ដែលភាគីទាំងពីរមានឧត្តមភាព និងតម្រូវការដើម្បីបំពេញតាមបំណងប្រាថ្នារបស់ប្រជាជននៃប្រទេសទាំងពីរ និងតម្រូវការអភិវឌ្ឍរបស់ប្រទេសនីមួយៗ។

លោក Pham Minh Chinh បានអះអាងថា វៀតណាមជានិច្ចកាលប្រកាន់ខ្ជាប់នូវគោលនយោបាយការបរទេសឯករាជ្យ ភាពខ្លួនទីពឹងខ្លួន សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ការធ្វើពិពិធកម្ម និងពហុភាគីនិយមនៃទំនាក់ទំនង ការធ្វើសមាហរណកម្មអន្តរជាតិសកម្ម ហើយគឺជាមិត្ត ជាដៃគូដែលអាចទុកចិត្តបាន  និងជាសមាជិកសកម្ម និងទទួលខុសត្រូវក្នុងសហគមន៍អន្តរជាតិ។

វៀតណាមជានិច្ចកាលវាយតំលៃខ្ពស់ចំពោះការគាំទ្រ និងជំនួយដ៏មានតម្លៃដែលប្រជាជនរុស្ស៊ី បានផ្តល់អោយវៀតណាមកាលពីមុនក៏ដូចជាក្នុងការកសាងនិងអភិវឌ្ឍនាសម័យបច្ចុប្បន្ន។ វៀតណាមយកចិត្តទុកដាក់ចំពោះទំនាក់ទំនងមិត្តភាពប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយរុស្ស៊ី ហើយទន្ទឹងរង់ចាំធ្វើការជាមួយរុស្ស៊ី ដើម្បីរក្សា និងអភិវឌ្ឍទំនាក់ទំនងនេះបន្ថែមទៀត។

រីឯខ្លួនវិញ លោក Dmitry Medvedev បានអះអាងថា គណបក្សរួបរួមរុស្ស៊ី ជានិច្ចកាលគាំទ្រការអភិវឌ្ឍទំនាក់ទំនងភាពជាដៃគូយុទ្ធសាស្ត្រលើគ្រប់វិស័យជាមួយវៀតណាម រក្សា និងពង្រឹងវិស័យសហប្រតិបត្តិការជាប្រពៃណី ហើយទន្ទឹមនឹងនោះ ពង្រីកកិច្ចសហប្រតិបត្តិការលើវិស័យសេដ្ឋកិច្ច-ពាណិជ្ជកម្ម ការវិនិយោគ វប្បធម៌ ទេសចរណ៍ កិច្ចសហប្រតិបត្តិការក្នុងតំបន់ ការជួបប្រាស្រ័យរវាងប្រជាជន និងប្រជាជន ...

ភាគីទាំងពីរបានចាត់ទុកថា ក្នុងបរិបទដែលសេដ្ឋកិច្ចពិភពលោកកំពុងប្រឈមមុខនឹងការលំបាក និងបញ្ហាប្រឈមជាច្រើននោះ ចាំបាច់ត្រូវចាត់វិធានការលើកកំពស់ប្រសិទ្ធភាពនៃកិច្ចសហប្រតិបត្តិការទ្វេភាគី ដោយឈរលើស្មារតីចុះសម្រុងគ្នាចំពោះផលប្រយោជន៍ និងចែករំលែកការលំបាក ជំរុញ និងពង្រឹងកិច្ចសហប្រតិបត្តិការទ្វេភាគីលើវិស័យដូចជា ថាមពល ប្រេងកាត និងឧស្ម័ន វិទ្យាសាស្ត្រ-បច្ចេកវិទ្យា ការអប់រំ-បណ្តុះបណ្តាល...

ក្នុងឱកាសនេះ លោក Pham Minh Chinh បានថ្លែងអំណរគុណចំពោះថ្នាក់ដឹកនាំ និងអាជ្ញាធរនៃសហព័ន្ធរុស្ស៊ី ដែលតែងតែយកចិត្តទុកដាក់ និងបង្កើតលក្ខខណ្ឌអំណោយផលសម្រាប់ពលរដ្ឋវៀតណាមនៅរុស្ស៊ីក្នុងរយៈពេលកន្លងមក ហើយលោកសង្ឃឹមថា លោក Dmitry Medvedev ក៏ដូចជាគណបក្សរួបរួមរុស្ស៊ី បន្តរួមវិភាគទាន និងគាំទ្រការបំពេញមូលដ្ឋានច្បាប់សម្រាប់សហគមន៍វៀតណាម ដើម្បីបន្តការរស់នៅ សិក្សា និងធ្វើអាជីវកម្មនៅរុស្ស៊ី យូរអង្វែង៕

បកប្រែដោយ Minh Trung