ថ្នាក់ដឹកនាំនៃប្រទេសវៀតណាមទទួលបដិសណ្ឋារកិច្ច និងជួបសវនាការ ជាមួយព្រះមហាក្សត្រ នៃព្រះរាជាណាចក្របែលហ្ស៊ិក

បង្កើតសន្ទុះថ្មីសម្រាប់ទំនាក់ទំនងវៀតណាម-បែលហ្ស៊ិក

លោកអគ្គលេខាបក្ស To Lam បានវាយតំលៃខ្ពស់ចំពោះសារៈសំខាន់ជាប្រវត្តិសាស្ត្រ នៃដំណើរទស្សនកិច្ចរបស់ប្រមុខរដ្ឋជាលើកដំបូងរវាងប្រទេសទាំងពីរចាប់តាំងពីការបង្កើតទំនាក់ទំនងការទូតក្នុងឆ្នាំ ១៩៧៣។ លោកជឿជាក់ថា ដំណើរទស្សនកិច្ចនេះនឹងបង្កើតកម្លាំងចលករថ្មី នាំឱ្យទំនាក់ទំនងមិត្តភាព និងកិច្ចសហប្រតិបត្តិការពហុភាគីរវាងវៀតណាម និងបែលហ្ស៊ិក កាន់តែស៊ីជម្រៅ ជាក់ស្តែង និងប្រសិទ្ធភាព បំពេញផលប្រយោជន៍របស់ប្រជាជននៃប្រទេសទាំងពីរ ព្រមទាំងរួមចំណែកប្រកបដោយការទទួលខុសត្រូវចំពោះសន្តិភាព ស្ថិរភាព និងការអភិវឌ្ឍប្រកបដោយចីរភាពក្នុងតំបន់ និងពិភពលោក។

លោកអគ្គលេខាបក្ស To Lam បានសម្តែងការពេញចិត្តចំពោះការអភិវឌ្ឍជាវិជ្ជមាននៃទំនាក់ទំនងមិត្តភាពវៀតណាម-បែលហ្ស៊ិក និងកិច្ចសហប្រតិបត្តិការលើច្រើនវិស័យក្នុងរយៈពេលថ្មីៗនេះ។ ដើម្បីសមស្របជាមួយសក្តានុពល និងទំនាក់ទំនងនយោបាយល្អ លោកអគ្គលេខាបក្ស To Lam បានសង្កត់ធ្ងន់ថា ប្រទេសទាំងពីរគប្បីតែបន្តពង្រឹងកិច្ចសហប្រតិបត្តិការលើវិស័យពាណិជ្ជកម្ម-វិនិយោគ កសិកម្មនិរន្តរភាព ការបណ្តុះបណ្តាលធនធានមនុស្សគុណភាពខ្ពស់ វប្បធម៌ ទេសចរណ៍ ការប្រាស្រ័យទាក់ទងរវាងប្រជាជន និងប្រជាជន។ល។ ទន្ទឹមនឹងនោះ ជំរុញកិច្ចសហប្រតិបត្តិការសំខាន់ៗលើវិស័យវិទ្យាសាស្ត្រ-បច្ចេកវិទ្យា នវានុវត្តន៍ជាដើម។

ព្រះមហាក្សត្រ Philippe មានព្រះបន្ទូលឯកភាពជាមួយនឹងការវាយតម្លៃរបស់លោកអគ្គលេខាធិកា To Lam ដោយអះអាងថា ទំនាក់ទំនងមិត្តភាពវៀតណាម-បែលហ្សិក ក្នុងរយៈពេល ៥០ ឆ្នាំកន្លងទៅមានការអភិវឌ្ឍយ៉ាងល្អប្រសើរ ហើយប្រទេសទាំងពីរគួរតែបន្តកិច្ចសហប្រតិបត្តិការយ៉ាងជិតស្និទ្ធដើម្បីដោះស្រាយបញ្ហាប្រឈមនានាជាសាកល ដូចជាការប្រែប្រួលអាកាសធាតុ បរិស្ថាន...

លោកអគ្គលេខាបក្ស To Lam ទទួលជួបសវនាការជាមួយព្រះមហាក្សត្របែលហ្ស៊ិក Philippe

ក្នុងជំនួបនេះ លោកអគ្គលេខាបក្សបានស្នើឱ្យប្រទេសបែលហ្ស៊ិកឆាប់ៗអនុម័តលើកិច្ចព្រមព្រៀងការពារការវិនិយោគវៀតណាម-សហភាពអឺរ៉ុប (EVIPA) រួមចំណែកបង្កើតរលកថ្មីនៃការវិនិយោគពីសហភាពអឺរ៉ុប និងបែលហ្ស៊ិកចូលមកវៀតណាម និងផ្ទុយមកវិញ។ លោកអគ្គលេខាបក្ស To Lam ក៏បានចែករំលែកជាមួយព្រះមហាក្សត្រ Philippe អំពីកិច្ចខិតខំប្រឹងប្រែង និងសមិទ្ធផលធំធេងដែលវៀតណាមសម្រេចបានក្នុងការផ្លាស់ថ្មី និងការអភិវឌ្ឍសេដ្ឋកិច្ចសង្គមក្នុងរយៈពេលជិត ៤០ ឆ្នាំកន្លងមក។ ព្រះមហាក្សត្រ Philippe បានសម្តែងការចាប់អារម្មណ៍ចំពោះរាល់សមិទ្ធផលដ៏អស្ចារ្យរបស់វៀតណាម ក្នុងវិស័យឧស្សាហូបនីយកម្ម និងទំនើបកម្មក្នុងប៉ុន្មានឆ្នាំថ្មីៗនេះ ហើយនិងព្រះអង្គបានសង្កត់ធ្ងន់ថា បែលហ្ស៊ិកពិតជាមានមោទនភាពដែលបានរួមចំណែកក្នុងការអភិវឌ្ឍសេដ្ឋកិច្ចសង្គមរបស់វៀតណាម។ ព្រះមហាក្សត្រ Philippe ក៏បានយល់ព្រមតាមការលើកឡើងរបស់លោកអគ្គលេខាបក្ស To Lam គឺបង្កើនការផ្លាស់ប្តូរគណៈប្រតិភូ និងទំនាក់ទំនងគ្រប់កម្រិត លើកកំពស់ប្រសិទ្ធភាពនៃយន្តការសហប្រតិបត្តិការទ្វេភាគី ពង្រីកកិច្ចសហប្រតិបត្តិការលើវិស័យដែលមានសក្តានុពលដូចជា ការអប់រំ និងបណ្តុះបណ្តាល ការពារជាតិ សន្តិសុខ ថាមពលកកើតឡើងវិញ សុខភាព បរិស្ថាន រួមទាំងការយកឈ្នះលើផលវិបាកនៃសារធាតុពណ៌ទឹកក្រូច។

បែលហ្សិកវាយតំលៃខ្ពស់ចំពោះកិត្យានុភាពរបស់វៀតណាមក្នុងតំបន់អាស៊ីប៉ាស៊ីហ្វិក

នាព្រឹកថ្ងៃទី១ ខែមេសា នៅវិមានប្រធានរដ្ឋ លោកប្រធានរដ្ឋ Luong Cuong និងលោកជំទាវបានអញ្ជើញជាអធិបតីក្នុងពិធីទទួលបដិសណ្ឋារកិច្ចជូនចំពោះព្រះមហាក្សត្រ Philippe និងព្រះមហាក្សត្រីក្នុងដំណើរបំពេញទស្សនកិច្ចផ្លូវរដ្ឋនៅវៀតណាម។ ភ្លាមៗបន្ទាប់ពីពិធីទទួលបដិសណ្ឋារកិច្ច លោកប្រធានរដ្ឋ Luong Cuong បានជួបពិភាក្សាជាមួយព្រះមហាក្សត្រ Philippe។

លោកប្រធានរដ្ឋ Luong Cuong បានអះអាងថា វៀតណាមជានិច្ចកាលយកចិត្តទុកដាក់ និងមានបំណងចង់ពង្រឹងកិច្ចសហប្រតិបត្តិការពហុភាគីជាមួយបែលហ្ស៊ិក ដែលជាប្រទេសសមាជិកមានតួនាទីសំខាន់ៗនៅក្នុងអឺរ៉ុប។ លោកប្រធានរដ្ឋបានវាយតម្លៃខ្ពស់ចំពោះការគាំទ្រដ៏មានតម្លៃរបស់ប្រជាជនបែលហ្ស៊ិកចំពោះវៀតណាម ក្នុងការតស៊ូដណ្តើមឯករាជ្យជាតិនាពេលកន្លងមក ព្រមទាំងទឹកចិត្តកក់ក្តៅ និងការរួមចំណែករបស់ព្រះមហាក្សត្រ Philippe និងព្រះមហាក្សត្រីផ្ទាល់ចំពោះប្រទេស និងប្រជាជនវៀតណាម និងទំនាក់ទំនងរវាងប្រទេសទាំងពីរនាពេលកន្លងមកនេះ។

ព្រះមហាក្សត្រ Philippe បានអបអរសាទរវៀតណាមចំពោះសមិទ្ធផលសេដ្ឋកិច្ចសង្គមដ៏អស្ចារ្យដែលវៀតណាមសម្រេចបានក្នុងរយៈពេលថ្មីៗនេះ ហើយសម្តែងបំណងចង់ពង្រឹងកិច្ចសហប្រតិបត្តិការជាមួយវៀតណាមលើវិស័យដែលភាគីទាំងពីរមានឧត្តមភាព និងសក្តានុពល។

ក្នុងជំនួបនេះ ថ្នាក់ដឹកនាំទាំងពីរបានពិភាក្សាអំពីទិសដៅកិច្ចសហប្រតិបត្តិការសំខាន់ៗរវាងប្រទេសទាំងពីរ ដើម្បីពង្រឹងទំនាក់ទំនងមិត្តភាពជាប្រពៃណីរវាងវៀតណាម និងបែលហ្ស៊ិកប្រកបដោយប្រសិទ្ធភាព និងជាក់ស្តែង រួមទាំងការបង្កើនទំនាក់ទំនង និងការផ្លាស់ប្តូរគណៈប្រតិភូគ្រប់ជាន់ថ្នាក់ ជាពិសេសថ្នាក់ខ្ពស់តាមរយៈគ្រប់បណ្តាញរបស់បក្ស រដ្ឋ រដ្ឋាភិបាល និងរដ្ឋសភា។ បន្តអនុវត្តប្រកបដោយប្រសិទ្ធភាពនូវយន្តការសហប្រតិបត្តិការទ្វេភាគីដែលមានស្រាប់ ស្រាវជ្រាវ និងបង្កើតយន្តការសហប្រតិបត្តិការថ្មីៗ ដើម្បីធ្វើឲ្យស៊ីជម្រៅកិច្ចសហប្រតិបត្តិការពិសេសរវាងប្រទេសទាំងពីរ។ ភាគីទាំងពីរសម្របសម្រួលយ៉ាងជិតស្និទ្ធ និងការគាំទ្រគ្នាទៅវិញទៅមកនៅលើវេទិកាអន្តរជាតិ និងអង្គការនានា។

លោកប្រធានរដ្ឋ Luong Cuong អញ្ជើញជាអធិបតីក្នុងពិធីទទួលបដិសណ្ឋារកិច្ចជូនចំពោះព្រះមហាក្សត្រ Philippe

ភាគីទាំងពីរបានបញ្ជាក់ពីសារៈសំខាន់នៃការលើកកម្ពស់ពហុភាគីនិយម ការគោរពច្បាប់អន្តរជាតិ និងសង្កត់ធ្ងន់លើការដោះស្រាយវិវាទនៅសមុទ្រខាងកើតដោយសន្តិវិធី ដោយឈរលើគោលការណ៍ជាមូលដ្ឋាននៃធម្មនុញ្ញអង្គការសហប្រជាជាតិ និងច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS) រួមចំណែករក្សាសន្តិភាព ស្ថិរភាព សន្តិសុខ សុវត្ថិភាព សេរីភាពនៃការធ្វើនាវាចរណ៍ និងអាកាសចរណ៍ក្នុងតំបន់ និងពិភពលោក។

បន្ទាប់ពីជំនួបនេះ លោកប្រធានរដ្ឋ Luong Cuong និងស្តេច Philippe បានធ្វើជាសាក្សីក្នុងការផ្លាស់ប្តូរឯកសារកិច្ចសហប្រតិបត្តិការលើវិស័យវប្បធម៌ ពាណិជ្ជកម្ម ការប្រែប្រួលអាកាសធាតុ និងការជួយឧបត្ថម្ភជនរងគ្រោះដោយជាតិគីមីពណ៌ទឹកក្រូច។

ស្នើឱ្យបែលហ្សិកជំរុញការដក "កាតលឿង" របស់ IUU ចេញជាបន្ទាន់សម្រាប់ផលិតផលជលផលវៀតណាម

នាថ្ងៃទី១ មេសា នៅទីស្នាក់ការរដ្ឋាភិបាល លោកនាយករដ្ឋមន្ត្រី Pham Minh Chinh បានជួបសវនាការជាមួយព្រះមហាក្សត្រ Philippe។ លោកនាយករដ្ឋមន្ត្រី Pham Minh Chinh និងព្រះមហាក្សត្រ Philippe បានសម្តែងការពេញចិត្តចំពោះការអភិវឌ្ឍដ៏ល្អនៃទំនាក់ទំនងមិត្តភាពវៀតណាម-បែលហ្ស៊ិក និងកិច្ចសហប្រតិបត្តិការលើច្រើនវិស័យក្នុងរយៈពេល ៥០ ឆ្នាំកន្លងមក។ ភាគីទាំងពីរឯកភាពបន្តពង្រឹងកិច្ចសហប្រតិបត្តិការលើវិស័យប្រពៃណីដូចជាសេដ្ឋកិច្ច វប្បធម៌ និងសិល្បៈ ទេសចរណ៍ និងកិច្ចសហប្រតិបត្តិការរវាងមូលដ្ឋាននៃប្រទេសទាំងពីរ។

ព្រះមហាក្សត្រ Philippe មានបំណងចង់ធ្វើឱ្យទំនាក់ទំនងទ្វេភាគីកាន់តែស៊ីជម្រៅលើវិស័យអប់រំ-បណ្តុះបណ្តាល ថែទាំសុខភាព កំពង់ផែសមុទ្រ ថាមពលបៃតង វិទ្យាសាស្ត្រ-បច្ចេកវិទ្យា នវានុវត្តន៍... ព្រមទាំងឯកភាពបង្កើតលក្ខណៈងាយស្រួលសម្រាប់អាជីវកម្មនៃប្រទេសទាំងពីរបង្កើនការវិនិយោគ និងសកម្មភាពធុរកិច្ចនៅវៀតណាម និងបែលហ្សិក។

លោកនាយករដ្ឋមន្ត្រី Pham Minh Chinh ជួបសវនាការជាមួយព្រះមហាក្សត្រ Philippe

លោកនាយករដ្ឋមន្ត្រី Pham Minh Chinh បានថ្លែងអំណរគុណប្រទេសបែលហ្ស៊ិកសម្រាប់ការគាំទ្រដ៏មានតម្លៃដល់វៀតណាមក្នុងការកសាង និងអភិវឌ្ឍប្រទេសវៀតណាម និងសង្ឃឹមថា បែលហ្ស៊ិកនឹងឆាប់មានគម្រោងជាក់លាក់ដើម្បីអនុវត្តដំណោះស្រាយស្តីពីការជួយជនរងគ្រោះវៀតណាមដោយជាតិគីមីពណ៌ទឹកក្រូច។

ដើម្បីបន្តរួមដំណើរ និងរួមចំណែកប្រកបដោយប្រសិទ្ធភាពចំពោះការងើបឡើងរបស់វៀតណាមក្នុងយុគសម័យថ្មី លោកនាយករដ្ឋមន្ត្រី Pham Minh Chinh បានស្នើថា ប្រទេសទាំងពីរគប្បីជំរុញកិច្ចសហប្រតិបត្តិការសំខាន់ៗបន្ថែមទៀតលើវិស័យដែលបែលហ្ស៊ិកមានប្រៀបខ្លាំង ហើយវៀតណាមមានតម្រូវការដូចជា បច្ចេកវិទ្យាខ្ពស់ សេដ្ឋកិច្ចរង្វង់ ហេដ្ឋារចនាសម្ព័ន្ធយុទ្ធសាស្ត្រ ការបណ្តុះបណ្តាលធនធានមនុស្ស។ល។ លើសពីនេះទៀត លោកនាយករដ្ឋមន្រ្តីបន្តស្នើឱ្យប្រទេសបែលហ្ស៊ិកឆាប់ផ្តល់សច្ចាប័នលើ EVIPA និងជំរុញឱ្យ EC លុបចោល "កាតលឿង" របស់ IUU សម្រាប់ផលិតផលជលផលវៀតណាមឱ្យបានឆាប់ៗ។

ភាគីទាំងពីរបានឯកភាពបង្កើនការផ្លាស់ប្តូរគណៈប្រតិភូ និងទំនាក់ទំនងគ្រប់កម្រិត និងតាមរយៈបណ្តាញបក្ស រដ្ឋាភិបាល និងរដ្ឋសភា លើកកំពស់ប្រសិទ្ធភាពនៃយន្តការសហប្រតិបត្តិការទ្វេភាគីដែលមានស្រាប់ សម្របសម្រួលសកម្មភាពប្រាស្រ័យទាក់ទងគ្នា និងសហប្រតិបត្តិការរវាងប្រជាជននៃប្រទេសទាំងពីរ លើកកំពស់តួនាទីជាស្ពានរបស់សហគមន៍ជនវៀតណាមនៅបែលហ្ស៊ិក ក៏ដូចជាសហគមន៍ជនបែលហ្ស៊ិកនៅវៀតណាមផងដែរ។ ភាគីទាំងពីរបានឯកភាពថា វៀតណាម និងបែលហ្ស៊ិកគប្បីតែសម្របសម្រួលយ៉ាងជិតស្និទ្ធនៅវេទិកាអន្តរជាតិ និងតំបន់ ដើម្បីលើកកម្ពស់ពហុភាគីនិយម និងនីតិរដ្ឋ ក៏ដូចជាដោះស្រាយបញ្ហាប្រឈមសកល។ ទាក់ទិននឹងបញ្ហាសមុទ្រខាងកើត ភាគីទាំងពីរបានអះអាងនូវសារៈសំខាន់នៃការធានាសន្តិសុខ សុវត្ថិភាព សេរីភាពនាវាចរណ៍ និងអាកាសចរណ៍ក្នុងតំបន់។ ការដោះស្រាយវិវាទដោយសន្តិវិធី ស្របតាមច្បាប់អន្តរជាតិ ជាពិសេស UNCLOS ១៩៨២៕

បកប្រែដោយ Minh Trung