លោកនាយករដ្ឋមន្ត្រី Pham Minh Chinh ជួបជាមួយប្រធានាធិបតីនៃប្រទេសមួយចំនួន

* នៅក្នុងជំនួបជាមួយប្រធានាធិបតីប្រេស៊ីល លោកនាយករដ្ឋមន្ត្រី Pham Minh Chinh អះអាងថា វៀតណាមយកចិត្តទុកដាក់យ៉ាងខ្លាំងនិងមានបំណងចងបង្កើនទំនាក់ទំនងភាពជាដៃគូលើគ្រប់ជ្រុងជ្រោយជាមួយប្រេស៊ីល ដែលជាដៃគូសំខាន់មួយក្នុងចំណោមដៃគូសំខាន់របស់វៀតណាមក្នុងតំបន់។ លោកនាយករដ្ឋមន្ត្រីបានស្នើប្រេស៊ីលគាំទ្រ និងជំរុញការចរចាសម្រាប់កិច្ចព្រមព្រៀងពាណិជ្ជកម្មសេរីរវាងវៀតណាម និងទីផ្សាររួមអាមេរិកខាងត្បូង (MERCOSUR) ឲ្យបានឆាប់; បន្តសម្របសម្រួល និងគាំទ្រគ្នាទៅវិញទៅមកនៅអង្គការអន្តរជាតិ និងវេទិកាពហុភាគី ជាពិសេសនៅអង្គការសហប្រជាជាតិ និងអង្គការ WTO និងវេទិកាពហុភាគីផ្សេងទៀតដែលភាគីទាំងពីរជាសមាជិក។ វៀតណាមត្រៀមខ្លួនជាស្ពានតភ្ជាប់ទំនាក់ទំនងរវាងអាស៊ាននិងប្រេស៊ីលក្នុងតួនាទីជាដៃគូតាមវិស័យរវាងអាស៊ាន និងប្លុក MERCOSUR។

លោក Pham Minh Chinh នាយករដ្ឋមន្ត្រីវៀតណាម ជួបជាមួយលោក Lula da Silva ប្រធានាធិបតីប្រេស៊ីល (រូបថត៖ vanent.vn)

លោកប្រធានាធិបតី Silva បានអបអរសាទរចំពោះសមិទ្ធិផលដែលវៀតណាម សម្រេចបានក្នុងការស្តារសេដ្ឋកិច្ចសង្គម។ អំពីទិសដៅនាពេលខាងមុខ លោកប្រធានាធិបតី Lula da Silva បានឯកភាពជាមួយគំនិតផ្ដួចផ្ដើម និងសំណើរបស់នាយករដ្ឋមន្ត្រី Pham Minh Chinh ជាពិសេសគាំទ្រដំណើរការចរចាសម្រាប់កិច្ចព្រមព្រៀងពាណិជ្ជកម្មសេរីរវាងវៀតណាម និងប្លុក MERCOSUR; លោកប្រធានាធិបតី Silva អញ្ជើញនាយករដ្ឋមន្ត្រី Pham Minh Chinh ទៅបំពេញទស្សនកិច្ចនៅប្រទេសប្រេស៊ីល។ លោកប្រធានាធិបតីបានស្នើឱ្យប្រទេសទាំងពីរបន្តជំរុញកិច្ចសហប្រតិបត្តិការលើគ្រប់វិស័យ ជាពិសេសកិច្ចសហប្រតិបត្តិការលើវិស័យពាណិជ្ជកម្ម កសិកម្ម ការផ្លាស់ប្តូរប្រជាជន និងប្រជាជន ការសម្របសម្រួលនៅអង្គការអន្តរជាតិ និងវេទិកាពហុភាគី។

* ក្នុងសម័យប្រជុំពិភាក្សា "ឆ្ពោះទៅរកពិភពលោកសន្តិភាព ស្ថិរភាព និងវិបុលភាព" លោកនាយករដ្ឋមន្ត្រី Pham Minh Chinh បានជួបជាមួយប្រធានាធិបតីអ៊ុយក្រែន លោក Volodymyr Oleksandrovych Zelensky។

លោកនាយករដ្ឋមន្ត្រី Pham Minh Chinh ជួបជាមួយប្រធានាធិបតីអ៊ុយក្រែន លោក Volodymyr Oleksandrovych Zelensky (រូបថត៖ vnanet.vn)

នៅក្នុងជំនួបនេះ លោកនាយករដ្ឋមន្ត្រីវៀតណាមបានសង្កត់ធ្ងន់ថា វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងកិច្ចសហប្រតិបត្តិការ មិត្តភាពជាប្រពៃណីរវាងប្រទេសទាំងពីរ។ ទាក់ទិននឹងជម្លោះនៅអ៊ុយក្រែននាពេលនេះ លោកនាយករដ្ឋមន្ត្រីបានអះអាងថា គោលជំហរឥតងារេរបស់វៀតណាមគឺគោរពធម្មនុញ្ញអង្គការសហប្រជាជាតិ និងច្បាប់អន្តរជាតិ ជាពិសេសគោលការណ៍គោរពឯករាជ្យ អធិបតេយ្យភាព និងបូរណភាពទឹកដីរបស់បណ្ដាប្រទេស មិនជ្រៀតជ្រែកកិច្ចការផ្ទៃក្នុង មិនប្រើកម្លាំង និងការគំរាមកំហែងប្រើកម្លាំងយោធា ជម្លោះទាំងអស់គួរតែត្រូវបានដោះស្រាយដោយសន្តិវិធី។ វៀតណាមសង្ឃឹមថាភាគីពាក់ព័ន្ធនឹងបញ្ចប់ជម្លោះក្នុងពេលឆាប់ៗនេះ តភ្ជាប់កិច្ចសន្ទនាឡើងវិញ និងដោះស្រាយជម្លោះដោយសន្តិវិធី។

លោកប្រធានាធិបតី Zelensky បានចែករំលែកជាមួយលោកនាយករដ្ឋមន្ត្រី Pham Minh Chinh និងបានសម្តែងការពេញចិត្តចំពោះគោលជំហរ និងជំនួយមនុស្សធម៌របស់វៀតណាម ព្រមទាំងបានឯកភាពចាត់វិធានការណ៍ពង្រឹងទំនាក់ទំនងកិច្ចសហប្រតិបត្តិការទ្វេភាគីរវាងប្រទេសទាំងពីរ៕

បកប្រែដោយ Pham Diep