មជ្ឈមណ្ឌលហិរញ្ញវត្ថុអន្តរជាតិនឹងបង្កើតកម្លាំងចលករថ្មី និងរបកគំហើញសម្រាប់ការអភិវឌ្ឍ

ថ្លែងក្នុងសន្និសីទ លោកនាយករដ្ឋមន្ត្រីបានចាត់ទុកថា វៀតណាមបានកំណត់គោលដៅកំណើនសេដ្ឋកិច្ចគឺជាអាទិភាព។ ដើម្បីធ្វើដូច្នេះបាន ចាំបាច់ត្រូវមានមធ្យោបាយជាច្រើនដើម្បីកៀរគរដើមទុន រួមទាំងការលើកកម្ពស់តួនាទីរបស់មជ្ឈមណ្ឌលហិរញ្ញវត្ថុតំបន់ និងអន្តរជាតិ។

វៀតណាមក៏បានកំណត់កំណើន GDP ក្នុងប៉ុន្មានឆ្នាំខាងមុខពី ៨% រហូតដល់ពីរខ្ទង់ ដូច្នេះទុនវិនិយោគសង្គមសរុបត្រូវតែកើនឡើងពី ៤៥-៥០% ជារៀងរាល់ឆ្នាំ។ ក្នុងមួយឆ្នាំៗ វៀតណាមត្រូវការថវិកាប្រមាណពី ១៦០ ទៅ២០០ ពាន់លានដុល្លារអាមេរិក សម្រាប់ការអភិវឌ្ឍទូទៅ ជាពិសេសការវិនិយោគលើហេដ្ឋារចនាសម្ព័ន្ធបច្ចេកទេស។

លោកនាយករដ្ឋមន្ត្រី Pham Minh Chinh ថ្លែងមតិនៅក្នុងសន្និសីទ (រូបថត៖ vnanet.vn)

ដើម្បីសម្រេចបាននូវគោលដៅនេះ វៀតណាមត្រូវស្នើឡើងនូវកម្លាំងចលករថ្មីសម្រាប់កំណើន រួមទាំងការបង្កើតមជ្ឈមណ្ឌលហិរញ្ញវត្ថុតំបន់ និងអន្តរជាតិ រួមជាមួយនឹងការចាប់ផ្តើម និងសម្រេចគម្រោងសំខាន់ៗរបស់ប្រទេសជាតិផងដែរ។

យោងតាមលោកនាយករដ្ឋមន្ត្រី វៀតណាមមានលក្ខខណ្ឌទាំង៥ ដើម្បីកសាងមជ្ឈមណ្ឌលហិរញ្ញវត្ថុអន្តរជាតិ។ ទីមួយ៖ វៀតណាមមានទំហំសេដ្ឋកិច្ចធំទី ៣៣ លើពិភពលោក។ ទី២៖ អត្រាកំណើនសេដ្ឋកិច្ចខ្ពស់ និងស្ថិរភាព។ ទី៣៖ វៀតណាមកំពុង អនុវត្តរបកគំហើញយុទ្ធសាស្ត្រចំនួន៣ អំពីការសុក្រិតស្ថាប័ន ការអភិវឌ្ឍធនធាន មនុស្ស និងការកសាងប្រព័ន្ធហេដ្ឋារចនាសម្ព័ន្ធដ៏ស៊ីសង្វាក់គ្នា ទំនើប ហើយសម្រេចបានលទ្ធផលវិជ្ជមាន។ ទី៤៖ ទីផ្សារភាគហ៊ុនរបស់វៀតណាមមានល្បឿនអភិវឌ្ឍន៍ ឈានមុខគេក្នុងតំបន់ ជាមួយនឹងមូលធនទីផ្សារភាគហ៊ុនវៀតណាមសម្រេចបានជិត ២៩០ ពាន់លានដុល្លារអាមេរិក។ ទី៥៖ វៀតណាមមានប្រៀបខ្លាំងក្នុងការរក្សាស្ថិរភាពនយោបាយ និងសន្តិភាព។

លោកនាយករដ្ឋមន្ត្រីបានសង្កត់ធ្ងន់ថា ការបង្កើតមជ្ឈមណ្ឌលហិរញ្ញវត្ថុតំបន់ និងអន្តរជាតិ គឺជារឿងជៀសមិនរួច និងជាតម្រូវការសត្យានុម័តក្នុងការអភិវឌ្ឍរបស់ប្រទេសជាតិ៕

បកប្រែដោយ Thanh Cong