ការបោះជំហានថ្មីមួយរបស់កិច្ចសហប្រតិបត្តិការវៀតណាម-ជប៉ុនក្នុងយុគសម័យវិទ្យាសាស្ត្រ និងបច្ចេកវិទ្យា

វេទិកានេះ ដែលបានប្រារព្ធឡើងចាប់ពីថ្ងៃទី១២ ដល់ថ្ងៃទី១៥ ខែមីនា ផ្តោតលើប្រធានបទសំខាន់ៗដូចជា៖ ការអនុវត្តទិន្នន័យផ្កាយរណបក្នុងការគ្រប់គ្រងគ្រោះមហន្តរាយ និងការឆ្លើយតបទៅនឹងការប្រែប្រួលអាកាសធាតុ; ការត្រួតពិនិត្យនាវា និងសេដ្ឋកិច្ចសមុទ្រ; កសិកម្មឆ្លាតវៃ; ការគ្រប់គ្រងធនធាន និងបរិស្ថាន; ស្តង់ដារ និងសុវត្ថិភាពទិន្នន័យអវកាស។

លោក Pham Minh Chinh នាយករដ្ឋមន្ត្រីមានប្រសាសន៍នៅក្នុង “វេទិកាអវកាសវៀតណាម-ជប៉ុន ឆ្នាំ២០២៦៖ កិច្ចសហប្រតិបត្តិការសម្រាប់យុគសម័យថ្មី” (រូបថត៖ vnanet.vn)

វេទិកានេះត្រូវបានគេរំពឹងថានឹងក្លាយជាវេទិកាយុទ្ធសាស្ត្រដែលភ្ជាប់ស្ថាប័នគ្រប់គ្រង វិទ្យាស្ថានស្រាវជ្រាវ និងធុរកិច្ចនៃប្រទេសទាំងពីរ ដើម្បីរួមចំណែកដល់ការបង្កើតប្រព័ន្ធអេកូឡូស៊ីសេដ្ឋកិច្ចអវកាសនៅវៀតណាម ព្រមទាំងបញ្ជាក់ពីការបោះជំហានថ្មីមួយរបស់ទំនាក់ទំនងសហប្រតិបត្តិការយុទ្ធសាស្ត្រយ៉ាងស៊ីជម្រៅ និងទូលំទូលាយរវាងវៀតណាម និងជប៉ុនក្នុងយុគសម័យវិទ្យាសាស្ត្រ និងបច្ចេកវិទ្យា និងនវានុវត្តន៍។

ក្នុងវេទិកានេះ លោក Pham Minh Chinh នាយករដ្ឋមន្ត្រី បានសង្កត់ធ្ងន់ថា វៀតណាមតែងតែអភិវឌ្ឍលំហអាកាសដើម្បីសន្តិភាព ដោយគោរពអនុសញ្ញាអង្គការសហប្រជាជាតិ និងច្បាប់អន្តរជាតិ ដើម្បីការអភិវឌ្ឍប្រកបដោយចីរភាព ដើម្បីផលប្រយោជន៍របស់ប្រជាជន ធុរកិច្ច និងប្រទេសជាតិ។

ទិដ្ឋភាពនៃវេទិកា (រូបថត៖ vnanet.vn)

នាពេលខាងមុខ លោកនាយករដ្ឋមន្ត្រីបានឲ្យដឹងថា វៀតណាមនឹងបន្តសុក្រិតយន្តការ និងគោលនយោបាយសម្រាប់សកម្មភាពអវកាសស្របតាមលក្ខខណ្ឌវៀតណាមនិងអន្តរជាតិ។ លោកនាយករដ្ឋមន្រ្តីមានបំណងថាភាគីទាំងពីរនឹងបន្តលើកកម្ពស់តួនាទីនៃយន្តការសន្ទនា វេទិកា និងកម្មវិធីសហប្រតិបត្តិការទ្វេភាគី តំបន់ និងអន្តរជាតិ ដើម្បីពង្រឹងកិច្ចសហប្រតិបត្តិការវៀតណាម-ជប៉ុនបន្ថែមទៀតក្នុងវិស័យអវកាស។ លោកនាយករដ្ឋមន្ត្រីបានបញ្ជាក់ថា វៀតណាមនឹងបន្តបង្កើតលក្ខខណ្ឌអំណោយផលបន្ថែមទៀតសម្រាប់អង្គការអន្តរជាតិ ដៃគូអភិវឌ្ឍន៍ និងសហគមន៍ធុរកិច្ចក្នុង និងក្រៅប្រទេស បន្តគាំទ្រ និងរួមដំណើរជាមួយវៀតណាមក្នុងការអភិវឌ្ឍវិទ្យាសាស្ត្រ និងបច្ចេកវិទ្យាអវកាស។

* នៅព្រឹកថ្ងៃដដែលនោះ លោក Pham Minh Chinh នាយករដ្ឋមន្ត្រី និងប្រតិភូបានកាត់ខ្សែបូសម្ពោធមជ្ឈមណ្ឌលអវកាសវៀតណាម ដែលជាគម្រោងវិទ្យាសាស្ត្រ និងបច្ចេកវិទ្យាខ្ពស់ដំបូងគេដែលអនុវត្តដោយដើមទុនប្រាក់កម្ចី ODA ពីរដ្ឋាភិបាលជប៉ុន ជាមួយនឹងថវិកាវិនិយោគសរុបជាង ៧.០០០ ពាន់លានដុង លើផ្ទៃដី ៩ ហិកតា៕

បកប្រែដោយ Thuy Anh