លើកកំពស់សសរស្តម្ភនៃកិច្ចសហប្រតិបត្តិការក្នុងទំនាក់ទំនងវៀតណាម-អាមេរិក

លោក Le Hoai Trung រដ្ឋមន្ត្រីស្តីទីក្រសួងការបរទេសវៀតណាម ទទួលជួបលោក Marc Knapper ឯកអគ្គរដ្ឋទូតអាមេរិក (រូបថត៖ vnanet.vn)

នៅក្នុងជំនួប លោក Le Hoai Trung រដ្ឋមន្ត្រីស្តីទីក្រសួងការបរទេស បានអះអាងថា វៀតណាមជានិច្ចកាលចាត់ទុកសហរដ្ឋអាមេរិកជាដៃគូសំខាន់យុទ្ធសាស្ត្រ ព្រមទាំងវាយតំលៃខ្ពស់ចំពោះការវិវឌ្ឍដ៏ជាក់ស្តែងក្នុងទំនាក់ទំនងទ្វេភាគី ចាប់តាំងពីប្រទេសទាំងពីរបានតម្លើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយក្នុងឆ្នាំ ២០២៣ លោក Le Hoai Trung បានទទួលស្គាល់ការសម្របសម្រួលយ៉ាងជិតស្និទ្ធរវាងស្ថានទូតអាមេរិកប្រចាំនៅទីក្រុងហាណូយ និងក្រសួងការបរទេសវៀតណាម ក៏ដូចជាតួនាទីរបស់លោក Knapper ឯកអគ្គរដ្ឋទូត ក្នុងការជំរុញទំនាក់ទំនង វៀតណាម-អាមេរិក  ឲ្យកាន់តែស៊ីជម្រៅថែមទៀត បំពេញផលប្រយោជន៍ជាក់ស្តែងរបស់ប្រជាជននៃប្រទេសទាំងពីរ។ លោក Le Hoai Trung បានស្នើឲ្យភាគីទាំងពីរបន្តសហការយ៉ាងជិតស្និទ្ធ និងអនុវត្តប្រកបដោយប្រសិទ្ធភាពនូវរបៀបវារៈដែលបានឯកភាពដោយថ្នាក់ដឹកនាំជាន់ខ្ពស់ និងគ្រប់លំដាប់ថ្នាក់នៃប្រទេសទាំងពីរ។

ទិដ្ឋភាពនៃជំនួប (រូបថត៖ vnanet.vn)

លោក Knapper ឯកអគ្គរដ្ឋទូត បានសម្តែងនូវក្តីរីករាយចំពោះការបន្តអភិវឌ្ឍយ៉ាងរឹងមាំនូវទំនាក់ទំនងរវាងប្រទេសទាំងពីរ ខណៈដែលប្រទេសទាំងពីរប្រារព្ធខួបលើកទី ៣០ នៃការបង្កើតទំនាក់ទំនងការទូត។ លោកឯកអគ្គរដ្ឋទូតបានវាយតម្លៃខ្ពស់ចំពោះលទ្ធផលនៃការពិភាក្សារវាងលោក To Lam អគ្គលេខាបក្ស និងលោក Donald Trump ប្រធានាធិបតី ព្រមទាំងថ្លែងអំណរគុណចំពោះរដ្ឋាភិបាល និងក្រសួង ស្ថាប័ននានារបស់វៀតណាមចំពោះការចាប់អារម្មណ៍ក្នុងការជំរុញកិច្ចសហប្រតិបត្តិការទ្វេភាគី សន្យាអនុវត្តយ៉ាងពេញលេញនូវកិច្ចព្រមព្រៀងពាណិជ្ជកម្មអន្តរជាតិ ផ្តល់អាទិភាពដល់ការបង្កើតបរិយាកាសអំណោយផលសម្រាប់អង្គភាពអាជីវកម្មអាមេរិកមកបណ្តាក់ទុននៅវៀតណាម។ លោកឯកអគ្គរដ្ឋទូតបានអះអាងថា សហរដ្ឋអាមេរិកនឹងបន្តរួមដំណើរជាមួយវៀតណាមឆ្ពោះទៅសម្រេចបាននូវគោលដៅកំណើនជាយុទ្ធសាស្ត្រ ជាពិសេសក្នុងវិស័យវិទ្យាសាស្ត្រ និងបច្ចេកវិទ្យាខ្ពស់។ ទន្ទឹមនឹងនោះ បន្តជំរុញកិច្ចសហប្រតិបត្តិការលើសសរស្តម្ភនៃកិច្ចសហប្រតិបត្តិការផ្សេងទៀត ដូចជាការជំនះពុះពារផលវិបាកដោយសារសង្គ្រាម ការអប់រំ សុខាភិបាល ការបង្ការ និងការប្រយុទ្ធប្រឆាំងនឹងឧក្រិដ្ឋកម្មឆ្លងដែន។ល៕

បកប្រែដោយ Huyen Trang