កិច្ចសហប្រតិបត្តិការវៀតណាម-ឡាវបន្តអភិវឌ្ឍយ៉ាងខ្លាំងក្លា

លោក Thongsavanh Phomvihane បានវាយតំលៃខ្ពស់ចំពោះសមិទ្ធិផលដ៏សំខាន់ និងលេចធ្លោនៃផ្នែកកិច្ចការបរទេសរបស់វៀតណាម នាពេលកន្លងមកនេះ រួមទាំងការពង្រឹង និងការពង្រីកដោយឥតឈប់ឈរនៃទំនាក់ទំនងពិសេសឡាវ-វៀតណាម។ លោក Thongsavanh Phomvihane បានសង្កត់ធ្ងន់ថា ការអនុវត្តកិច្ចសហប្រតិបត្តិការនាពេលកន្លងមកនេះ ជាពិសេសការដឹកនាំរបស់ថ្នាក់ដឹកនាំនៃបក្សទាំងពីរ និងប្រទេសទាំងពីរ ត្រូវបានអនុវត្តយ៉ាងសកម្ម មានប្រសិទ្ធភាព និងជាក់ស្តែង។

លោក Le Hoai Trung ជួបសន្ទនាតាមទូរស័ព្ទ ជាមួយលោក Thongsavanh Phomvihane (រូបថត៖ ក្រសួងការបរទេសវៀតណាម)

ក្នុងជំនួប លោក Le Hoai Trung បានវាយតំលៃថា ទំនាក់ទំនងសហប្រតិបត្តិការរវាងវៀតណាម និងឡាវ បាននិងកំពុងអភិវឌ្ឍលើគ្រប់ជ្រុងជ្រោយ កាន់តែមានប្រសិទ្ធភាព និងជាក់ស្តែង។ លោកអះអាងថា វៀតណាមជានិច្ចកាលយកចិត្តទុកដាក់ និងផ្តល់អាទិភាពខ្ពស់លើទំនាក់ទំនងសហប្រតិបត្តិការជាមួយឡាវ។ លោកបានសង្កត់ធ្ងន់លើកិច្ចសហប្រតិបត្តិការយ៉ាងជិតស្និទ្ធជាមួយរដ្ឋមន្ត្រីការបរទេសឡាវ ដើម្បីរួមចំណែកជំរុញទំនាក់ទំនងសហប្រតិបត្តិការរវាងប្រទេសទាំងពីរនិយាយរួម និងរវាងក្រសួងការបរទេសទាំងពីរនិយាយដោយឡែក។

រដ្ឋមន្ត្រីទាំងពីរបានឯកភាពបន្តសហការយ៉ាងជិតស្និទ្ធ ដើម្បីអនុវត្តប្រកបដោយប្រសិទ្ធភាពនូវកិច្ចព្រមព្រៀងជាន់ខ្ពស់ និងរៀបចំឲ្យបានល្អសម្រាប់សកម្មភាពសំខាន់ៗរបស់ប្រទេសនីមួយៗ ក៏ដូចជារវាងប្រទេសទាំងពីរនាពេលខាងមុខ ជាពិសេសគឺការបង្កើតរបកគំហើញក្នុងវិស័យសេដ្ឋកិច្ច ពាណិជ្ជកម្ម វិនិយោគ និងការអភិវឌ្ឍធនធានមនុស្ស។ វៀតណាមត្រៀមខ្លួនជាស្រេចចែករំលែកបទពិសោធន៍ និងជួយគាំទ្រឡាវក្នុងការអភិវឌ្ឍសេដ្ឋកិច្ចសង្គម ជាពិសេសក្នុងការអនុវត្តគោលដៅអភិវឌ្ឍន៍ប្រកបដោយចីរភាព។

ភាគីទាំងពីរបានសង្កត់ធ្ងន់លើភាពចាំបាច់ក្នុងការបន្តអនុវត្តល្អនូវកិច្ចព្រមព្រៀងសហប្រតិបត្តិការរវាងក្រសួងការបរទេសទាំងពីរ ជំរុញប្រកបដោយប្រសិទ្ធភាពនូវយន្តការពិគ្រោះយោបល់ប្រចាំឆ្នាំរវាងថ្នាក់ដឹកនាំ និងស្ថាប័នមានសមត្ថកិច្ចនៃក្រសួងទាំងពីរ ព្រមទាំងជួយគាំទ្រគ្នាទៅវិញទៅមកនៅវេទិកាពហុភាគី និងតំបន់៕

បកប្រែដោយ Thuy Anh