ឯកអគ្គរដ្ឋទូតឡាវប្រចាំនៅកម្ពុជា អបអរសាទរទិវាបុណ្យឯករាជ្យជាតិវៀតណាម

លោក Buakeo Phumvongsay ឯកអគ្គរដ្ឋទូត បានពាំនាំប្រសាសន៍ជូនពរជូនចំពោះថ្នាក់ដឹកនាំបក្ស រដ្ឋ និងប្រជាជនវៀតណាម លោក Nguyen Minh Vu ឯកអគ្គរដ្ឋទូត និងលោកជំទាវ និងកម្មាភិបាលបុគ្គលិកទាំងអស់នៃស្ថានទូត។

លោក Nguyen Minh Vu ឯកអគ្គរដ្ឋទូត និងលោកជំទាវ (ខាងស្តាំដៃ) ទទួលផ្កាអបអរសាទរពីលោក Buakeo Phumvongsay ឯកអគ្គរដ្ឋទូតឡាវ (រូបថត៖ vov.vn)

លោក Buakeo Phumvongsay ឯកអគ្គរដ្ឋទូត បានអះអាងថា ឡាវ និងវៀតណាម គឺជាប្រទេសទាំងពីរដែលមានទំនាក់ទំនងមិត្តភាពជាប្រពៃណីដ៏យូរអង្វែង មិនត្រឹមតែរួមគ្នាជំនះពុះពារការលំបាក និងបញ្ហាប្រឈមជាច្រើននាពេលកន្លងមកប៉ុណ្ណោះទេ ថែមទាំងជួយឧបត្ថម្ភ និងគាំទ្រគ្នាទៅវិញទៅមកក្នុងការអភិវឌ្ឍប្រទេសជាតិនាពេលបច្ចុប្បន្នទៀតផង។ លោក Buakeo Phumvongsay ឯកអគ្គរដ្ឋទូត បានសង្កត់ធ្ងន់លើសារៈសំខាន់នៃការអប់រំយុវជនជំនាន់ក្រោយនៃប្រទេសទាំងពីរឱ្យមានការយល់ដឹងយ៉ាងស៊ីជម្រៅអំពីចំណងសាមគ្គីភាព ទំនាក់ទំនងមិត្តភាព និងកិច្ចសហប្រតិបត្តិការប្រពៃណីជិតស្និទ្ធរវាងប្រទេសទាំងពីរ។ លោក Buakeo Phumvongsay ឯកអគ្គរដ្ឋទូត ជឿជាក់ថា នេះជាចំណុចសំខាន់ដើម្បីបន្តជំរុញ និងពង្រឹងទំនាក់ទំនងទ្វេភាគីរវាងវៀតណាម និងឡាវនាពេលខាងមុខ។

លោក Buakeo Phumvongsay ឯកអគ្គរដ្ឋទូតឡាវ និងលោក Nguyen Minh Vu ឯកអគ្គរដ្ឋទូតវៀតណាម (រូបថត៖ vov.vn)

លោក Nguyen Minh Vu ឯកអគ្គរដ្ឋទូត បានថ្លែងអំណរគុណយ៉ាងជ្រាលជ្រៅចំពោះមនោសញ្ចេតនាដ៏ស្មោះស្ម័គ្ររបស់អ្នកជិតខាងឡាវចំពោះវៀតណាមនិយាយរួម និងរបស់ស្ថានទូតឡាវសម្រាប់ស្ថានទូតវៀតណាមប្រចាំនៅកម្ពុជានិយាយដោយឡែក។ លោក Nguyen Minh Vu ឯកអគ្គរដ្ឋទូត បានអះអាងថា វៀតណាម និងឡាវតែងតែរួមដំណើរជាមួយគ្នា រួមសុខរួមទុក្ខនាអតីតកាល បច្ចុប្បន្នកាល និងអនាគត។

លោក Nguyen Minh Vu ឯកអគ្គរដ្ឋទូត ក៏បានពិភាក្សាអំពីសកម្មភាពជាបន្តបន្ទាប់ដើម្បីអបអរសាទរខួបលើកទី ៨០ នៃបដិវត្តន៍ខែសីហា និងទិវាបុណ្យឯករាជ្យជាតិវៀតណាម រៀបចំដោយស្ថានទូតវៀតណាមប្រចាំនៅកម្ពុជា ព្រមទាំងសម្តែងថា នេះជាព្រឹត្តិការណ៍សំខាន់ពីររបស់បក្ស ប្រទេស និងប្រជាជាតិវៀតណាម សកម្មភាពរំលឹកខួបក្នុងប្រទេស និងក្រៅប្រទេសត្រូវបានរៀបចំយ៉ាងយកចិត្តទុកដាក់ ដោយហេតុនោះបង្ហាញឱ្យឃើញពីសារៈសំខាន់ និងអត្ថន័យដ៏អស្ចារ្យនៃព្រឹត្តិការណ៍ទាំងពីរ ដែលត្រូវបានមិត្តភក្តិអន្តរជាតិវាយតម្លៃខ្ពស់៕

បកប្រែដោយ Huyen Trang