វៀតណាម និងប៊ូតាន ពង្រឹង និងពង្រីកកិច្ចសហប្រតិបត្តិការលើវិស័យជាច្រើន

នៅក្នុងជំនួបនេះ លោក Pham Minh Chinh នាយករដ្ឋមន្ត្រី បានសង្កត់ធ្ងន់ថា វៀតណាមមានបំណងជំរុញទំនាក់ទំនងសហប្រតិបត្តិការជាមួយប៊ូតាន ព្រមទាំងស្នើឲ្យភាគីទាំងពីរជំរុញដំណើរទស្សនកិច្ច ការជួបជុំថ្នាក់ជាន់ខ្ពស់ និងគ្រប់លំដាប់ថ្នាក់ ពិចារណាបង្កើតយន្តការសហប្រតិបត្តិការទ្វេភាគី បន្តពិនិត្យ និងជំរុញការចុះហត្ថលេខាលើកិច្ចព្រមព្រៀងសហប្រតិបត្តិការ។  លោក Pham Minh Chinh សង្កត់ធ្ងន់លើសារៈសំខាន់នៃការជំរុញការតភ្ជាប់រវាងខឿនសេដ្ឋកិច្ចទាំងពីរ តាមរយៈកិច្ចព្រមព្រៀងសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងការវិនិយោគ ដើម្បីសម្រួលដល់ទំនិញរបស់ប្រទេសទាំងពីរចូលទៅកាន់ទីផ្សារគ្នាទៅវិញទៅមក។

លោក Pham Minh Chinh នាយករដ្ឋមន្ត្រី ជួបសវនាការជាមួយព្រះមហាក្សត្រប៊ូតាន (រូបថត៖ baochinhphu.vn)

វៀតណាមត្រៀមខ្លួនជាស្រេចក្នុងការនាំចេញទំនិញដែលប៊ូតានមានតម្រូវការ ហើយវៀតណាមមានប្រៀបខ្លាំងដូចជា ម្ហូបអាហារ ទំនិញប្រើប្រាស់ សម្ភារៈសំណង់ ផលិតផលអេឡិចត្រូនិក និងគ្រឿងបន្លាស់ ព្រមទាំងនាំចូលទំនិញពីប្រទេសប៊ូតាន បំពេញតម្រូវការរបស់ប្រទេសទាំងពីរ។

ទិដ្ឋភាពនៃជំនួប (រូបថត៖ baochinhphu.vn)

លោកនាយករដ្ឋមន្ត្រីបានស្នើឱ្យភាគីទាំងពីរពិចារណាពង្រីកកិច្ចសហប្រតិបត្តិការសន្តិសុខ ប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត ជំរុញកិច្ចសហប្រតិបត្តិការលើវិស័យដ៏មានសក្តានុពលដូចជា ទេសចរណ៍ខាងវិញ្ញាណ កសិកម្មសរីរាង្គ ប្រកបដោយគុណភាពខ្ពស់ ឱសថបុរាណ ហើយនឹងបង្កើតជើងហោះហើរត្រង់នាពេលឆាប់ៗ ដើម្បីលើកកម្ពស់ការផ្លាស់ប្តូរវប្បធម៌ និងការជួបប្រាស្រ័យរវាងប្រជាជននិងប្រជាជន។

ព្រះមហាក្សត្រប៊ូតាន Jigme បានអះអាងថា ប៊ូតានចាត់ទុកវៀតណាមជាដៃគូដ៏គួរឱ្យទុកចិត្ត និងសំខាន់ក្នុងតំបន់ ហើយសន្យាជំរុញកិច្ចសហប្រតិបត្តិការជាមួយវៀតណាមនាពេលខាងមុខ។ លោក Pham Minh Chinh នាយករដ្ឋមន្ត្រី និងព្រះមហាក្សត្រប៊ូតានបានឯកភាពថា វៀតណាមនិងប៊ូតាន ចាំបាច់ត្រូវបន្តបង្កើនការផ្លាស់ប្តូរព័ត៌មាន ការសម្របសម្រួល និងការគាំទ្រគ្នាទៅវិញទៅមកនៅវេទិកាពហុភាគី។ វៀតណាមស្វាគមន៍ប៊ូតានបង្កើនកិច្ចសហប្រតិបត្តិការជាក់ស្តែងជាមួយអាស៊ាន ក៏ដូចជាយន្តការសហប្រតិបត្តិការក្នុងតំបន់ផ្សេងទៀត។

លោក Tran Thanh Man ប្រធានរដ្ឋសភា ជួបសាវនាការជាមួយព្រះមហាក្សត្រប៊ូតាន (រូបថត៖ vnanet.vn)

នារសៀលថ្ងៃដដែល មានប្រសាសន៍នៅក្នុងជំនួបជាមួយព្រះមហាក្សត្រប៊ូតាន លោក Tran Thanh Man ប្រធានរដ្ឋសភាវៀតណាម បានសង្កត់ធ្ងន់ថា វៀតណាមជានិច្ចកាលយកចិត្តទុកដាក់ និងមានបំណងចង់ពង្រឹងទំនាក់ទំនងមិត្តភាពជាមួយប៊ូតាន ឲ្យកាន់តែស៊ីជម្រៅថែមទៀត។ លោក Tran Thanh Man ប្រធានរដ្ឋសភា ជឿជាក់ថា នាពេលខាងមុខ ទំនាក់ទំនងសហប្រតិបត្តិការ វៀតណាម-ប៊ូតាន នឹងត្រូវបានលើកកំពស់យ៉ាងខ្លាំងក្លាឡើងកម្ពស់ថ្មីមួយ៕

បកប្រែដោយ Thanh Cong