ព្រះមហាក្សត្រ និងព្រះមហាក្សត្រីប៊ូតាន យាងមកដល់ទីក្រុងហាណូយ ចាប់ផ្តើមយាងបំពេញព្រះរាជទស្សនកិច្ចផ្លូវរដ្ឋនៅប្រទេសវៀតណាម

នារសៀលថ្ងៃទី១៨ ខែសីហា ព្រះមហាក្សត្រប៊ូតាន Jigme Khesar Namgyel Wangchuck និងព្រះមហាក្សត្រី Jetsun Pema Wangchuck បានយាងមកដល់ទីក្រុងហាណូយ ចាប់ផ្តើមយាងបំពេញព្រះរាជទស្សនកិច្ចផ្លូវរដ្ឋនៅវៀតណាមចាប់ពីថ្ងៃទី ១៨ ដល់ថ្ងៃទី ២២ ខែសីហា តបតាមការអញ្ជើញរបស់ប្រធានរដ្ឋ Luong Cuong និងភរិយា។

លោក Dao Ngoc Dung រដ្ឋមន្ត្រីក្រសួងជនជាតិ និងសាសនា ទទួលស្វាគមន៍ព្រះមហាក្សត្រ Bhutan Jigme Khesar Namgyel Wangchuck និងព្រះមហាក្សត្រីនៅអាកាសយានដ្ឋានអន្តរជាតិ Noi Bai (រូបថត៖ VNA)

ទទួលស្វាគមន៍គណៈប្រតិភូនៅអាកាសយានដ្ឋានអន្តរជាតិ Noi Bai មាន៖ លោក Dao Ngoc Dung រដ្ឋមន្ត្រីក្រសួងជនជាតិ និងសាសនា; លោក Nguyen Manh Cuong អនុរដ្ឋមន្ត្រីក្រសួងការបរទេស និងតំណាងការិយាល័យប្រធានរដ្ឋ និងតំណាងអង្គភាពពាក់ព័ន្ធនៃក្រសួងការបរទេស។

វៀតណាមនិងប៊ូតានបានបង្កើតទំនាក់ទំនងការទូតនាថ្ងៃទី ១៩ ខែមករា ឆ្នាំ២០១២។ ប្រទេសទាំងពីរមានទំនាក់ទំនងមិត្តភាពដ៏ល្អ។ មេដឹកនាំជាន់ខ្ពស់នៃប្រទេសទាំងពីរតែងតែផ្លាស់ប្តូរសារទូរលេខក្នុងឱកាសនៃព្រឹត្តិការណ៍នានា។ ប្រទេសទាំងពីរមានសក្ដានុពលលើវិស័យទេសចរណ៍ ជាពិសេសទេសចរណ៍ព្រះពុទ្ធសាសនា និងទេសចរណ៍ខាងវិញ្ញាណ។ ប្រទេសទាំងពីរក៏មានគោលបំណងសហប្រតិបត្តិការលើវិស័យសាសនា ជាពិសេសព្រះពុទ្ធសាសនា ការអប់រំ និងការផ្លាស់ប្តូរធនធានមនុស្ស។ ប៊ូតានយកចិត្តទុកដាក់ចំពោះកិច្ចសហប្រតិបត្តិការជាមួយវៀតណាមក្នុងការផ្លាស់ប្តូរគណៈប្រតិភូសិក្សា និងវប្បធម៌ ព្រមទាំងជំរុញការផ្លាស់ប្តូរប្រជាជននិងប្រជាជននៅវេទិកាតំបន់ និងអន្តរជាតិ។ ប្រទេសទាំងពីរតែងតែសម្របសម្រួលគ្នាទៅវិញទៅមកនៅវេទិកាពហុភាគី៕

បកប្រែដោយ Duy Hoan