លោក To Lam អគ្គលេខាបក្សកុម្មុយនិស្តវៀតណាម ទទួលជួបឯកអគ្គរដ្ឋទូតសហភាពអឺរ៉ុប និងឯកអគ្គរដ្ឋទូតហ្វីលីពីន

នៅក្នុងជំនួប លោក To Lam អគ្គលេខាបក្ស បានសម្តែងនូវការជឿជាក់ថា ទំនាក់ទំនង វៀតណាម-សហភាពអឺរ៉ុប (EU) នឹងត្រូវបានពង្រឹងប្រកបដោយជាក់ស្តែង និងអភិវឌ្ឍដល់កម្ពស់ថ្មីមួយពីមួយថ្ងៃទៅមួយថ្ងៃ។ លោកអគ្គលេខាបក្សបានអះអាងថា EU គឺជាដៃគូមួយក្នុងចំណោមដៃគូសំខាន់ៗក្នុងគោលនយោបាយការបរទេសរបស់វៀតណាម ព្រមទាំងមានសេចក្តីសោមនស្សរីករាយដោយឃើញថា បន្ទាប់ពីរយៈពេល ៣៥ ឆ្នាំនៃការបង្កើតទំនាក់ទំនងការទូត (១៩៩០-២០២៥) ទំនាក់ទំនងទ្វេភាគីបានអភិវឌ្ឍយ៉ាងស្វាហាប់ និងទូលំទូលាយលើគ្រប់វិស័យ។ លោក To Lam អគ្គលេខាបក្ស បានស្នើឱ្យភាគីទាំងពីរពិចារណា និងបង្កើតលក្ខខណ្ឌអំណោយផលដល់ទិដ្ឋាការចូលសម្រាប់ពលរដ្ឋនៃភាគីនីមួយៗ។

លោក To Lam អគ្គលេខាបក្ស ទទួលជួបលោក Julien Guerrier ឯកអគ្គរដ្ឋទូតសហភាពអឺរ៉ុបប្រចាំនៅវៀតណាម

រីឯលោក Julien Guerrier ឯកអគ្គរដ្ឋទូតបានអះអាងថា វៀតណាមជាដៃគូដែលអាចទុកចិត្តបាន និងជាអាទិភាពរបស់ EU ក្នុងតំបន់អាស៊ីប៉ាស៊ីហ្វិក។ EU មានបំណងចង់គាំទ្រវៀតណាម ក្នុងការសម្រេចគោលដៅក្លាយជាប្រទេសអភិវឌ្ឍនៅឆ្នាំ ២០៤៥ និងសម្រេចបាននូវការបំភាយសូន្យសុទ្ធនៅឆ្នាំ ២០៥០។ លោកឯកអគ្គរដ្ឋទូតបានមានប្រសាសន៍ថា EU និងវៀតណាមចែករំលែកផលប្រយោជន៍រួមក្នុងការធានាប្រព័ន្ធពាណិជ្ជកម្មអន្តរជាតិ និងខ្សែសង្វាក់ផ្គត់ផ្គង់មិនរំខាន ធានានូវកំណើនស្ថិរភាព និងវិបុលភាពសម្រាប់ប្រទេសនីមួយៗ។

លោក To Lam អគ្គលេខាបក្ស ទទួលជួបលោក Julien Guerrier ឯកអគ្គរដ្ឋទូតសហភាពអឺរ៉ុបប្រចាំនៅវៀតណាម

លោក To Lam អគ្គលេខាបក្ស និងលោក Julien Guerrier ឯកអគ្គរដ្ឋទូត បានឯកភាពថា ទាំងវៀតណាម និង EU គប្បីរក្សាសន្តិភាព និងស្ថិរភាពក្នុងតំបន់ និងនៅលើពិភពលោក ដើម្បីអភិវឌ្ឍ ហើយចាំបាច់ត្រូវពង្រឹងកិច្ចសហប្រតិបត្តិការក្នុងក្របខ័ណ្ឌ អាស៊ាន-EU ធានាសន្តិភាព និងស្ថិរភាពនៅសមុទ្រខាងកើត ដែលជាតំបន់មានអត្ថន័យជាយុទ្ធសាស្ត្រសម្រាប់ពាណិជ្ជកម្មពិភពលោក។

នារសៀលថ្ងៃដដែល នៅទីស្នាក់ការមជ្ឈិមបក្ស លោក To Lam អគ្គលេខាបក្ស បានទទួលជួបលោក Meynardo Los Banos Montealegre ឯកអគ្គរដ្ឋទូតហ្វីលីពីនប្រចាំនៅវៀតណាម។

លោក To Lam អគ្គលេខាបក្ស ទទួលជួបលោក Meynardo Los Banos Montealegre ឯកអគ្គរដ្ឋទូតហ្វីលីពីនប្រចាំនៅវៀតណាម

លោក To Lam អគ្គលេខាបក្សបានអះអាងថា វៀតណាមជានិច្ចកាលយកចិត្តទុកដាក់យ៉ាងខ្លាំង និងមានបំណងចង់អភិវឌ្ឍយ៉ាងខ្លាំងក្លា នាំទំនាក់ទំនងភាពជាដៃគូយុទ្ធសាស្ត្រជាមួយហ្វីលីពីនឡើងកម្រិតកម្ពស់ថ្មីមួយ ស៊ីជម្រៅ និងទូលំទូលាយថែមទៀត។

លោក To Lam អគ្គលេខាបក្ស ទទួលជួបលោក Meynardo Los Banos Montealegre ឯកអគ្គរដ្ឋទូតហ្វីលីពីនប្រចាំនៅវៀតណាម

លោកអគ្គលេខាបក្សបានស្នើឱ្យលោកឯកអគ្គរដ្ឋទូតយកចិត្តទុកដាក់លើការជំរុញវិស័យមួយចំនួននៃកិច្ចសហប្រតិបត្តិការទ្វេភាគី រួមមាន៖ ការពង្រឹងកិច្ចសហប្រតិបត្តិការនយោបាយ-ការទូត សន្តិសុខ ការពារជាតិ។ លោក To Lam អគ្គលេខាបក្សក៏បានស្នើឲ្យជំរុញការតភ្ជាប់សេដ្ឋកិច្ច ដើម្បីសម្រេចបានទំហំពាណិជ្ជកម្មទ្វេភាគី ១០ ពាន់លានដុល្លារអាមេរិកនាពេលឆាប់ៗ ព្រមទាំងជំរុញកិច្ចសហប្រតិបត្តិការលើវិស័យផ្សេងទៀតដូចជា៖ វប្បធម៌ កីឡា ទេសចរណ៍ ការអប់រំ និងបណ្តុះបណ្តាល និងការទប់ទល់នឹងការប្រែប្រួលអាកាសធាតុ។ លោកអគ្គលេខាបក្សបានអះអាងថា វៀតណាមគាំទ្រយ៉ាងសកម្មចំពោះហ្វីលីពីនក្នុងការទទួលតំណែងជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) នៅឆ្នាំ២០២៦ ប្រកបដោយជោគជ័យ ហើយនឹងសម្របសម្រួលជាមួយហ្វីលីពីន និងបណ្តាប្រទេសអាស៊ានឆ្ពោះទៅរកតំបន់អាស៊ានមួយប្រកបដោយសាមគ្គីភាព ភាពធន់ និងអភិវឌ្ឍប្រកបដោយចីរភាព។

រីឯខ្លួនវិញ លោក Meynardo Los Banos ឯកអគ្គរដ្ឋទូតបានអះអាងថា ស្ថានទូតហ្វីលីពីននឹងខិតខំប្រឹងប្រែងអស់ពីសមត្ថភាព ដើម្បីជំរុញទំនាក់ទំនងភាពជាដៃគូយុទ្ធសាស្ត្ររវាងប្រទេសទាំងពីរ អភិវឌ្ឍកាន់តែស៊ីជម្រៅ ជាក់ស្តែង និងមានប្រសិទ្ធភាពថែមទៀត៕

បកប្រែដោយ Thanh Cong