លោក Luong Cuong ប្រធានរដ្ឋវៀតណាមទទួលជួបបណ្ដាឯកអគ្គរដ្ឋទូតមកជូនសារតាំង

លោក Luong Cuong ប្រធានរដ្ឋ ទទួលជួបលោកស្រី Gillian Bird ឯកអគ្គរដ្ឋទូតវិសាមញ្ញ និងពេញសមត្ថភាពអូស្ត្រាលីប្រចាំនៅវៀតណាម

ដោយអបអរសាទរលោកស្រី Gillian Bird ដែលត្រូវបានតែងតាំងជាឯកអគ្គរដ្ឋទូតអូស្ត្រាលីប្រចាំនៅវៀតណាម លោក Luong Cuong ប្រធានរដ្ឋ បានជឿជាក់ថា លោកស្រីឯកអគ្គរដ្ឋទូតនឹងមានអាណត្តិបេសកកម្មប្រកបដោយជោគជ័យជាមួយនឹងការរួមចំណែកសំខាន់ៗជាច្រើនក្នុងការអភិវឌ្ឍទំនាក់ទំនងរវាងប្រទេសទាំងពីរ។ ក្នុងឱកាសនេះ លោកប្រធានរដ្ឋបានអញ្ជើញអគ្គទេសាភិបាលអូស្ត្រាលីមកបំពេញទស្សនកិច្ចនៅវៀតណាមតាមពេលវេលាសមស្រប។

លោក Luong Cuong ប្រធានរដ្ឋ ទទួលជួបលោក Reinaldo Rafael Espinal Nunez ឯកអគ្គរដ្ឋទូតដូមីនីកប្រចាំនៅវៀតណាម

ក្នុងជំនួបជាមួយលោក Reinaldo Rafael Espinal Nunez ឯកអគ្គរដ្ឋទូតដូមីនីក លោក Luong Cuong ប្រធានរដ្ឋបានមានប្រសាសន៍ថា វៀតណាមមានបំណងចង់ពង្រឹងទំនាក់ទំនងមិត្តភាពជាប្រពៃណីដ៏ល្អប្រសើរ បង្កើនជំនឿទុកចិត្តខាងនយោបាយ និងលើកកំពស់ប្រសិទ្ធភាពនៃទំនាក់ទំនងសហប្រតិបត្តិការទ្វេភាគីដើម្បីបំពេញសក្តានុពល និងតម្រូវការរបស់ភាគីទាំងពីរ ជាពិសេសលើវិស័យសេដ្ឋកិច្ច ពាណិជ្ជកម្ម វិនិយោគ វប្បធម៌ និងការជួបប្រាស្រ័យរវាងប្រជាជននិងប្រជាជន។

លោក Luong Cuong ប្រធានរដ្ឋ ទទួលជួបលោក Azeddine Bechka ឯកអគ្គរដ្ឋទូតអាល់ហ្សេរី

ដោយអបអរសាទរចំពោះលោក Azeddine Bechka ដែលត្រូវបានតែងតាំងជាឯកអគ្គរដ្ឋទូតអាល់ហ្សេរីប្រចាំនៅវៀតណាម លោក Luong Cuong ប្រធានរដ្ឋ បានអះអាងថា វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងប្រពៃណី និងកិច្ចសហប្រតិបត្តិការមិត្តភាពជាមួយអាល់ហ្សេរី ដែលជាដៃគូមិត្តភាពប្រពៃណីដ៏ជ្រាលជ្រៅបំផុតរបស់វៀតណាមនៅអាហ្វ្រិក។ លោកប្រធានរដ្ឋបានចាត់ទុកថា វៀតណាម និងអាល់ហ្សេរីគួរតែពង្រឹងកិច្ចសហប្រតិបត្តិការបន្ថែមទៀតដើម្បីការអភិវឌ្ឍរួមគ្នា។

លោក Luong Cuong ប្រធានរដ្ឋ ទទួលជួបលោក Fernando Miguel ឯកអគ្គរដ្ឋទូតអង់ហ្គោឡា

ក្នុងជំនួបជាមួយលោក Fernando Miguel ឯកអគ្គរដ្ឋទូតអង់ហ្គោឡាប្រចាំនៅវៀតណាម លោក Luong Cuong ប្រធានរដ្ឋ បានឲ្យដឹងថា វៀតណាមត្រៀមខ្លួនជាស្រេចពង្រឹងកិច្ចសហប្រតិបត្តិការជាមួយអង់ហ្គោឡាលើវិស័យកសិកម្ម ជលផល ឧស្សាហកម្មកែច្នៃ ទូរគមនាគមន៍ បរិវត្តកម្មឌីជីថល ការអប់រំ បណ្តុះបណ្តាល និងសុខាភិបាល... ក៏ដូចជាកិច្ចសហប្រតិបត្តិការទាំងទ្វេភាគី និងពហុភាគី៕

បកប្រែដោយ Huyen Trang