នារសៀលថ្ងៃទី ២៨ មិថុនា នៅវិមានប្រធានរដ្ឋ លោក To Lam ប្រធានរដ្ឋវៀតណាមបានទទួលជួបលោក Miguel Angel Rodriguez Melo ឯកអគ្គរដ្ឋទូតកូឡុំប៊ី និងលោក Eligio Alberto Salas ឯកអគ្គរដ្ឋទូតប៉ាណាម៉ា អញ្ជើញចូលជួបសម្ដែងការគួរសម និងជម្រាបលា។
អញ្ជើញទទួលជួបលោកឯកអគ្គរដ្ឋទូតកូឡុំប៊ី Miguel Angel Rodriguez Melo លោកប្រធានរដ្ឋ To Lam បានអះអាងថា វៀតណាមវាយតំលៃខ្ពស់ចំពោះតួនាទីរបស់កូឡុំប៊ីនៅក្នុងតំបន់អាមេរិកឡាទីន ហើយថា វៀតណាមគាំទ្រយ៉ាងខ្លាំងចំពោះដំណើរការសន្តិភាពនៅកូឡុំប៊ី។ ដោយវាយតម្លៃថា ប្រទេសទាំងពីរនៅតែមានសក្ដានុពលសម្រាប់កិច្ចសហប្រតិបត្តិការលើវិស័យដូចជា វិទ្យាសាស្ត្រ-បច្ចេកវិទ្យា ហិរញ្ញវត្ថុ និងធនាគារ ការដឹកជញ្ជូន និងសំណង់នោះ លោកប្រធានរដ្ឋបានស្នើឱ្យភាគីទាំងពីរបន្តបង្កើតបរិយាកាសអំណោយផលសម្រាប់ការធ្វើអាជីវកម្ម និងការវិនិយោគ ដើម្បីពង្រឹងការតភ្ជាប់រវាងសហគមន៍ធុរកិច្ច ខិតខំនាំទំហំពាណិជ្ជកម្មទ្វេភាគីឡើងដល់ ១ ពាន់លានដុល្លារនាពេលខាងមុខ។
ក្នុងជំនួបជាមួយលោកឯកអគ្គរដ្ឋទូតប៉ាណាម៉ា Eligio Alberto Salas លោកប្រធានរដ្ឋ To Lam បានសង្កត់ធ្ងន់លើបំណងប្រាថ្នារបស់វៀតណាមក្នុងការអភិវឌ្ឍន៍ និងលើកកំពស់ប្រសិទ្ធភាពនៃទំនាក់ទំនងសហប្រតិបត្តិការលើគ្រប់វិស័យរវាងប្រទេសទាំងពីរ ទាំងក្នុងវិស័យនយោបាយ ការទូត និងសេដ្ឋកិច្ច ពាណិជ្ជកម្ម នាវាចរណ៍ ធនាគារ ហិរញ្ញវត្ថុ ការទូតប្រជាជន។ លោកប្រធានរដ្ឋបានស្នើឲ្យ ភាគីទាំងពីររក្សានូវយន្តការសន្ទនា និងកិច្ចសហប្រតិបត្តិការដែលមានស្រាប់ សម្របសម្រួលរៀបចំកិច្ចប្រជុំពិគ្រោះយោបល់នយោបាយ លើកទី២ ថ្នាក់អនុរដ្ឋមន្ត្រីការបរទេសនៃប្រទេសទាំងពីរ និងកិច្ចប្រជុំលើកទី២ នៃគណៈកម្មាធិការចម្រុះស្តីកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគវៀតណាម-ប៉ាណាម៉ា នៅវៀតណាម ក៏ដូចជាការលើកកម្ពស់យន្តការពិគ្រោះយោបល់ និងកិច្ចសហប្រតិបត្តិការថ្មី។ ក្រៅពីវិស័យសហប្រតិបត្តិការជាប្រពៃណី លោកប្រធានរដ្ឋក៏បានស្នើឱ្យភាគីទាំងពីរបន្តពង្រីកកិច្ចសហប្រតិបត្តិការលើវិស័យវប្បធម៌ ទេសចរណ៍ និងការផ្លាស់ប្តូរប្រជាជន និងប្រជាជន៕
បកប្រែដោយ Thanh Cong
Type the code from the image