ទំនាក់ទំនងរវាងវៀតណាម និងសហរដ្ឋអាមេរិកទទួលបានសមិទ្ធផលគួរឲ្យកត់សម្គាល់ជាច្រើន

អញ្ជើញថ្លែងមតិនៅជំនួបនេះ លោកស្រី Nguyen Thi Ngoc Phuong ប្រធានសមាគមមិត្តភាពវៀតណាម-សហរដ្ឋអាមេរិក នៅទីក្រុងហូជីមិញ បានសង្កត់ធ្ងន់ថា ចាប់តាំងពីពេលធ្វើប្រក្រតីភាពទំនាក់ទំនងវៀតណាមនិងសហរដ្ឋអាមេរិក​ឡើងវិញ (ថ្ងៃទី១២ ខែកក្កដា ឆ្នាំ១៩៩៥) ប្រទេសទាំងពីរសម្រេចបានសមិទ្ធផលគួរឲ្យកត់សម្គាល់ជាច្រើន។

លោកស្រី Nguyen Thi Ngoc Phuong ថ្លែងមតិនៅជំនួប (រូបថត៖ baotintuc.vn)

បច្ចុប្បន្ននេះ វៀតណាមគឺជាដៃគូពាណិជ្ជកម្មឈានមុខគេមួយរបស់សហរដ្ឋអាមេរិកនៅក្នុងតំបន់។ សហរដ្ឋអាមេរិកបានបណ្តាក់ទុនរាប់ពាន់លានដុល្លារអាមេរិក ដើម្បីសម្អាតធាតុគីមីពុលពណ៌លឿងទុំ និងដោះស្រាយផលវិបាកនៃសង្រ្គាម ដែលនេះបង្ហាញឲ្យឃើញថា ជាមួយនឹងការជឿទុកចិត្តគ្នាទៅវិញទៅមកវៀតណាម និងសហរដ្ឋអាមេរិក ពិតជាដៃគូលើគ្រប់ជ្រុងជ្រោយ។

លោកស្រី Natella Svistunova ថ្លែងក្នុងជំនួប (រូបថត៖ baotintuc.vn)

លោកស្រី Natella Svistunova អនុព័ន្ធវប្បធម៌ និងព័ត៌មាននៃស្ថានអគ្គកុងស៊ុលសហរដ្ឋអាមេរិកប្រចាំទីក្រុងហូជីមិញ បានឲ្យដឹងថា នៅពេលកន្លងមក វៀតណាម និងសហរដ្ឋអាមេរិក បានសហការក្នុងការអនុវត្តដំណោះស្រាយកាត់បន្ថយផលប៉ះពាល់នៃការប្រែប្រួលអាកាសធាតុ កាត់បន្ថយការបំភាយឧស្ម័នផ្ទះកញ្ចក់ និងបង្កើនការអភិវឌ្ឍថាមពលកកើតឡើងវិញ។ ទន្ទឹមនឹងនោះ ប្រទេសទាំងពីរបន្តជំរុញកិច្ចសហប្រតិបត្តិការលើវិស័យសុខាភិបាល អប់រំ សន្តិសុខ និងការប្រឆាំងបទឧក្រិដ្ឋកម្មឆ្លងដែន។ ឆ្នាំ២០២៣ គឺជាខួបលើកទី១០ នៃការបង្កើតទំនាក់ទំនងភាពជាដៃគូលើគ្រប់ជ្រុងជ្រោយរវាងសហរដ្ឋអាមេរិក និងវៀតណាម ហើយគូសសញ្ញាដោយដំណើរទស្សនកិច្ចផ្លូវការរបស់លោក Anthony Blinken រដ្ឋមន្រ្តីការបរទេសសហរដ្ឋអាមេរិកកាលពីខែមេសា និងការបើកការដ្ឋានសាងសង់ស្ថានទូតអាមេរិកថ្មីប្រចាំវៀតណាម បានបង្ហាញពីមូលដ្ឋានគ្រឹះដ៏រឹងមាំ ឆ្ពោះទៅរកតំបន់ឥណ្ឌូ-ប៉ាស៊ីហ្វិកប្រកបដោយនិរន្តរភាព និងវិបុលភាព៕

បកប្រែដោយ Thuy Anh