ថៃ កម្ពុជា និងវៀតណាម តភ្ជាប់ទេសចរណ៍តាមផ្លូវសមុទ្រ
កប.អនឡាញ - ផ្លូវសមុទ្រនេះនឹងមិនត្រឹមតែដំណើរការជាផ្លូវសេដ្ឋកិច្ចទំនើបប៉ុណ្ណោះទេ ថែមទាំងជាផ្លូវទេសចរណ៍ដ៏ទាក់ទាញជាមួយនឹងវប្បធម៌ និងធម្មជាតិដ៏ស្រស់ស្អាតទៀតផង។
ប្រព័ន្ធផ្សព្វផ្សាយព័ត៌មានថៃនាថ្ងៃទី១៦ ខែមិថុនា បានផ្សព្វផ្សាយព័ត៌មានថា ប្រទេសនេះ រួមជាមួយកម្ពុជា និងវៀតណាមកំពុងស្វែងរកកិច្ចសហប្រតិបត្តិការបង្កើតផ្លូវសមុទ្រតភ្ជាប់កោះនៅជិតខេត្ត Trat របស់ថៃ ជាមួយខេត្តព្រះសីហនុរបស់កម្ពុជា និងខេត្ត Kien Giang របស់វៀតណាមដើម្បីជំរុញការវិនិយោគ ពាណិជ្ជកម្ម ទេសចរណ៍ រួមជាមួយនឹងសន្និសីទ និងពិព័រណ៍ (MICE)។
    |
 |
|
រូបថតឧទាហរណ៍ (vnanet.vn) |
នាពេលថ្មីៗនេះ លោក Natthapong Sanguanjit អភិបាលខេត្ត Trat បានដឹកនាំកិច្ចប្រជុំអំពីគំនិតផ្តួចផ្តើមពោលខាងលើនៅឯពិព័រណ៍ពាណិជ្ជកម្មច្រករបៀងសេដ្ឋកិច្ចកម្ពុជា-វៀតណាម-ថៃ ឆ្នាំ២០២៤ (CVTEC-Trat Business Roadshow ឆ្នាំ២០២៤)។
កិច្ចប្រជុំនេះមានការចូលរួមពីតំណាងនៃខេត្តចំនួន ៦ ក្នុងប្រទេសចំនួន ៣ រួមទាំងលោក Chamnan Srisawat ប្រធានក្រុមប្រឹក្សាទេសចរណ៍ថៃ (TCT) និងលោក Puripan Bunnag អនុប្រធានជាន់ខ្ពស់នៃនាយកដ្ឋានសន្និសីទ និងពិព័រណ៍ប្រទេសថៃ (TCEB)។
លោក Chamnan មានប្រសាសន៍ថា TCT កំពុងជំរុញការរៀបចំសន្និសីទ CVTEC ដោយមាន TCEB ជាអ្នកសហការរៀបចំ និងជាអ្នកឧបត្ថម្ភធំ។ លោកបាននិយាយថា គោលដៅរបស់ពួកគេគឺដើម្បីជម្រុញផ្លូវសមុទ្រតភ្ជាប់ប្រទេសទាំងបី និងបង្កើត "ទីផ្សារមួយ គោលដៅបី"។ ផ្លូវសមុទ្រនេះនឹងមិនត្រឹមតែដំណើរការជាផ្លូវសេដ្ឋកិច្ចទំនើបប៉ុណ្ណោះទេ ថែមទាំងជាផ្លូវទេសចរណ៍ដ៏ទាក់ទាញជាមួយនឹងវប្បធម៌ និងធម្មជាតិដ៏ស្រស់ស្អាតទៀតផង៕
បកប្រែដោយ Duy Hoan