អាស៊ានស្វាគមន៍វៀតណាមដែលធ្វើជាម្ចាស់ផ្ទះនៃពិធីចុះហត្ថលេខាលើអនុសញ្ញាអង្គការសហប្រជាជាតិស្តីពីការប្រឆាំងនឹងឧក្រិដ្ឋកម្មតាមអ៊ីនធឺណិតនៅទីក្រុងហាណូយ

នៅក្នុងកិច្ចប្រជុំទាំងឡាយ រដ្ឋមន្ត្រីការបរទេសអាស៊ានបានពិភាក្សា និងបញ្ចប់ការរៀបចំសម្រាប់កិច្ចប្រជុំជាន់ខ្ពស់អាស៊ានលើកទី៤៧ និងកិច្ចប្រជុំជាន់ខ្ពស់រវាងអាស៊ានជាមួយដៃគូនានា ដែលប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៨ ខែតុលា។ ទាក់ទងនឹងកិច្ចសហប្រតិបត្តិការនយោបាយ-សន្តិសុខ ដោយផ្អែកលើលទ្ធផល និងបទពិសោធន៍ដែលទទួលបានក្នុងរយៈពេល ១០ ឆ្នាំនៃការអនុវត្តផែនការមេស្តីពីការកសាងសហគមន៍នយោបាយ-សន្តិសុខ (APSC) ឆ្នាំ២០២៥ ប្រទេសទាំងឡាយបានឯកភាពគ្នាផ្តោតការខិតខំប្រឹងប្រែងលើការអនុវត្តផែនការយុទ្ធសាស្ត្រស្តីពីការកសាង APSC ក្នុងដំណាក់កាលថ្មី។

ប្រតិភូចូលរួមកិច្ចប្រជុំរួមរវាងរដ្ឋមន្ត្រីការបរទេស និងរដ្ឋមន្ត្រីសេដ្ឋកិច្ចអាស៊ាន (AMM-AEM) (រូបថត៖ ក្រសួងការបរទេស)

ដោយមានការព្រួយបារម្ភអំពីស្ថានភាពឧក្រិដ្ឋកម្មឆ្លងដែន រួមទាំងឧក្រិដ្ឋកម្មតាមអ៊ីនធឺណិត និងការក្លែងបន្លំតាមអ៊ីនធឺណិតកំពុងវិវឌ្ឍដ៏ស្មុគស្មាញ រដ្ឋមន្ត្រីការបរទេសទាំងឡាយបានឯកភាពគ្នាថា អាស៊ានត្រូវជំរុញកិច្ចសហប្រតិបត្តិការក្នុងតំបន់ និងអន្តរជាតិបន្ថែមទៀត ដោយហេតុនោះស្វាគមន៍ចំពោះការដែលវៀតណាមធ្វើជាម្ចាស់ផ្ទះពិធីចុះហត្ថលេខាលើអនុសញ្ញាអង្គការសហប្រជាជាតិស្តីពីឧក្រិដ្ឋកម្មតាមអ៊ីនធឺណិតនៅទីក្រុងហាណូយ។ ប្រទេសទាំងឡាយក៏បានឯកភាពគ្នាថា អាស៊ានគួរតែបន្តពង្រឹងសាមគ្គីភាព និងសម្របសម្រួលលើបញ្ហាដែលប៉ះពាល់ដល់សន្តិភាព និងសន្តិសុខក្នុងតំបន់ រួមទាំងសមុទ្រខាងកើតផងដែរ។ ក្នុងឱកាសនេះ រដ្ឋមន្ត្រីការបរទេសបានធ្វើជាសាក្ខីភាពនៃការចុះហត្ថលេខាលើឯកសារនៃការចូលរួមក្នុងសន្ធិសញ្ញាមិត្តភាព និងសហប្រតិបត្តិការ (TAC) របស់ប្រទេសហ្វាំងឡង់ ដែលនាំឱ្យចំនួនប្រទេស/អង្គការសរុបដែលចូលរួមក្នុង TAC កើនឡើងដល់ ៥៨។

ទិដ្ឋភាពនៃកិច្ចប្រជុំរដ្ឋមន្ត្រីការបរទេសអាស៊ាន (AMM) (រូបថត៖ ក្រសួងការបរទេស)

មានប្រសាសន៍ក្នុងកិច្ចប្រជុំទាំងឡាយ លោក Dang Hoang Giang អនុរដ្ឋមន្ត្រីបានអបអរសាទរចំពោះប្រទេសម្ចាស់ផ្ទះម៉ាឡេស៊ី ដែលបានដឹកនាំអាស៊ានឱ្យសម្រេចបានលទ្ធផលសំខាន់ៗជាច្រើននៅក្នុងឆ្នាំដ៏សំខាន់មួយ។ លោក Dang Hoang Giang បានអះអាងថា វៀតណាមនឹងបន្តសម្របសម្រួលយ៉ាងជិតស្និទ្ធជាមួយម៉ាឡេស៊ី និងប្រទេសសមាជិកអាស៊ាន អនុវត្តគោលដៅ និងអាទិភាពដែលបានកំណត់ដោយជោគជ័យ។ ទាក់ទងនឹងសមុទ្រខាងកើត លោក Dang Hoang Giang អនុរដ្ឋមន្ត្រីបានស្នើឱ្យអាស៊ានរក្សាសាមគ្គីភាព និងគោលជំហរគោលការណ៍ សម្របសម្រួលយ៉ាងជិតស្និទ្ធ ដើម្បីរក្សា និងលើកកម្ពស់សន្តិភាព ស្ថិរភាព សន្តិសុខ សុវត្ថិភាព សេរីភាពក្នុងការធ្វើនាវាចរណ៍ និងអាកាសចរណ៍ និងគោរពច្បាប់អន្តរជាតិនៅក្នុងតំបន់ដ៏សំខាន់នេះ៕

បកប្រែដោយ Huyen Trang