វៀតណាមលើកកម្ពស់អភិក្រមទូលំទូលាយចំពោះសិទ្ធិមនុស្សក្នុងអាស៊ាន

នៅក្នុងសម័យសន្ទនា រដ្ឋមន្ត្រីទាំងឡាយបានអនុម័តលើផែនការការងាររបស់ AICHR សម្រាប់ដំណាក់កាល ២០២៦-២០៣០ ដោយស្នើឱ្យ AICHR អនុវត្តតាមចក្ខុវិស័យសហគមន៍អាស៊ានឆ្នាំ ២០៤៥ យ៉ាងជិតស្និទ្ធ បន្តផ្លាស់ថ្មីការគិត អភិក្រមប្រកបដោយភាពច្នៃប្រឌិត និងភាពបត់បែន  បន្ស៊ាំខ្លួន និងទាន់ពេលវេលាដើម្បីលើកកម្ពស់ និងការពារសិទ្ធិមនុស្ស។

លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម ចូលរួមសកម្មភាពក្នុងក្របខ័ណ្ឌនៃកិច្ចប្រជុំរដ្ឋមន្ត្រីការបរទេសអាស៊ានលើកទី៥៨ (រូបថត៖ baoquocte.vn)

រីឯលោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម បានសង្កត់ធ្ងន់ថា ការលើកកម្ពស់ និងធានាសិទ្ធិមនុស្សរួមបញ្ចូលអន្តរវិស័យ និងសសរស្តម្ភ ទាមទារឱ្យមានអភិក្រមទូលំទូលាយ និងការសម្របសម្រួលរវាង AICHR និងទីភ្នាក់ងារឯកទេសដើម្បីបង្កើនធនធានសម្រាប់កិច្ចសហប្រតិបត្តិការសិទ្ធិមនុស្ស។ លោក Bui Thanh Son បានប្រកាសថា វៀតណាមនឹងរៀបចំសិក្ខាសាលា AICHR ស្តីពីសិទ្ធិអ្នកធ្វើដំណើរតាមសមុទ្រ ដែលគ្រោងនឹងធ្វើឡើងនៅចុងឆ្នាំនេះ ដើម្បីលើកកម្ពស់ការយល់ដឹង និងចែករំលែកការអនុវត្តល្អ និងជំរុញកិច្ចសហប្រតិបត្តិការលើវិស័យនេះ។

ទិដ្ឋភាពនៃកិច្ចសន្ទនា (រូបថត៖ baoquocte.vn)

នៅក្នុងកិច្ចប្រជុំគណៈកម្មការសន្ធិសញ្ញា SEANWFZ រដ្ឋមន្ត្រីទាំងឡាយបានឯកភាពបន្តលើកកម្ពស់ និងលើកតម្កើងតម្លៃ និងតួនាទីនៃសន្ធិសញ្ញានៅកម្រិតពិភពលោក រួមទាំងការបញ្ជូនសេចក្តីសម្រេចចិត្តស្តីពីសន្ធិសញ្ញា SEANWFZ ទៅកាន់សម័យប្រជុំលើកទី ៨០ នៃមហាសន្និបាតអង្គការសហប្រជាជាតិ និងបង្កើនការពិគ្រោះយោបល់ជាមួយប្រទេសកាន់កាប់អាវុធនុយក្លេអ៊ែរលើការចុះហត្ថលេខាលើពិធីសារ SEANWFZ។ រដ្ឋមន្ត្រីទាំងឡាយក៏បានស្វាគមន៍ និងសន្យាបំពេញនីតិវិធីចាំបាច់សម្រាប់ប្រទេសទីម័រខាងកើត ដើម្បីចូលរួមសន្ធិសញ្ញាក្នុងកិច្ចប្រជុំកំពូលអាស៊ានលើកទី៤៧ នៅខែតុលា ឆ្នាំ២០២៥ ដោយហេតុនេះបញ្ជាក់ពីកិច្ចសន្យារបស់តំបន់ចំពោះការរំសាយអាវុធនុយក្លេអ៊ែរ និងការមិនរីកសាយភាយអាវុធនុយក្លេអ៊ែរ។

ក្នុងឱកាសនេះ លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានប្រកាសថា វៀតណាមនឹងទទួលតួនាទីជាប្រធាននៃកិច្ចប្រជុំត្រួតពិនិត្យលើកទី ១១ នៃសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) ក្នុងឆ្នាំ ២០២៦ ហើយទន្ទឹងរង់ចាំការគាំទ្រ និងការសម្របសម្រួលយ៉ាងជិតស្និទ្ធរបស់ប្រទេសនានា៕

បកប្រែដោយ Huyen Trang